NEHEMIA 12 - Biblía Axweesantá Hhohho' ar Mungú 2004

Gaarí a umér múk tlahhoó Laáwi nee ar kaahamuusér Mungú

¹ Gaarí an umér múk tlahhoó Laáwi nee ar kaahamuusér Mungú kudá' tinda ki/ís baraá looháy wa aleeró, dinkwa nee Serubabeli garmoó Shealtieli, nee kaahamusmoó úr Yoshua. Kaahamuuse an ín, Seraya, nee Yeremia, nee Esra,

² nee Amaria, nee Maluku, nee Hatushi,

³ nee Shekania, nee Rehumu, nee Meremoti,

⁴ nee Ido, nee Ginetoni, nee Abiya,

⁵ nee Miyamini, nee Ma'adia, nee Bilga,

⁶ nee Shemaya, nee Yoyaribu, nee Yedaya,

⁷ nee Salu, nee Amoki, nee Hilkia nee Yedaya. Kuká' an kaahamuusér uren ar Mungú nee hhaeeín qoomár Yeshuawo.

⁸ Múk tlahhoó Laáwi a Yeshua, nee Binui, nee Kadmieli, nee Sherebia, nee Yuda, nee Matania, kudá' daa'ángw sluufaay gwaa geeraharahaar dinkwa nee hhaeewós.

⁹ Bakbukia nee Uno, nee mulqer'ín, nina sihhiitiyé' baraá saaliingo.

Xwaylár Yeshua kaahamusmoó úr

¹⁰ Yeshua Yoyakimu guna laqwaál, Yoyakimu Eliashibu guna laqwaál, Eliashibu Yoyada guna laqwaál.

¹¹ Yoyada Yonatan guna laqwaál, Yonatan Yadua guna laqwaál.

Geeraharuusér tlahh'aá kaahamuuse

¹² Qoomár Yoyakimu tawa kaahamusmoó úr oo Mungú, kukaá hatlá' an geeraharuusér tlahhi'ii'ín: Meraya oo tlahhoó Seraya, Hanania oo tlahhoó Yeremia,

¹³ Meshulamu oo tlahhoó Esra, Yehohanani oo tlahhoó Amaria,

¹⁴ Yonatan oo tlahhoó Maluki, Yosefu oo tlahhoó Shebania,

¹⁵ Adna oo tlahhoó Harimu, Helkai oo tlahhoó Meraioti,

¹⁶ Sekaria oo tlahhoó Ido, Meshulamu oo tlahhoó Ginetoni,

¹⁷ Sikri oo tlahhoó Abiya, oo tlahhoó Miniamini, Piltai oo tlahhoó Moadia,

¹⁸ Shamua oo tlahhoó Bilga, Yehonatani oo tlahhoó Shemaya,

¹⁹ Matenai oo tlahhoó Yoaribu, Usi oo tlahhoó Yedaya,

²⁰ Kalai oo tlahhoó Salai, Eberi oo tlahhoó Amoki,

²¹ Heshabia oo tlahhoó Hilkia, nee Netaneli oo tlahhoó Yedaya.

Gooír tlahhoó kaahamuuse nee oo Laáwi

²² Qoomaadár Eliashibu, nee Yoyada, nee Yohanani nee Yadua múk urén oo tlahhoó Laáwi, kuna gooín. Qoomár waawuti'iimár Dario waawutmoó Persia múk urén oo kaahamuusér Mungú kuna gooín sleeme.

²³ Múk urén oo tlahhoó Laáwi kuna gooín baraá kitaábuú qom'i ay qoomár Yohanani nángw naangoó Eliashibu.

Baalaqaasír gadiyér doó Mungú

²⁴ Geeraharuusér múk tlahhoó Laáwi a Hashabia, nee Sherebia, nee Yeshua garmoó Kadmieli, nina alsihhiitiyé' nee hhaeeín, as daa'ángw ilahhooa nguwa daaiya' nee oo xirfayeemisuuwo, ar adoodá' waawutmo Daudi heé Mungú ngira oó'.

²⁵ Múk afkú do' a kwí: Matania, nee Bakbukia, nee Obadia, nee Meshulamu, nee Talmoni nee Akubu, kuká' sleeme a xuumuusér afér maraá kuuntáy.

²⁶ Mukwí ina hoót qoomaadár Yoyakimu garmoó Yeshua, garmoó Yosadaki, nee qoomár Nehemia tawa ga/aawusmo, nee Esra tawa kaahamusmoó Mungú nee goousmo.

Nehemia koo/ír gixsa ngiwa paraátl as Mungú

²⁷ Qoomár koo/ír Yerusalemu kawa paraatlár wa slai múk tlahhoó Laáwi kuna leelehhiít umuúqo dír i diri'iia, as niwa hardihiya' Yerusalemu deelór ur ar koo/i kawa paraatli as Mungú kawa sluufmiisi, nee tawa daai ar mitingiraay nee ar mariímba nee ar gindaandoori.

²⁸ Xwaylár daauuse ina dinkwárií burumburít iimír ayeemaá Yerusalemu ngaa harweeriye', nee ayeemaá múk Netofati.

²⁹ Bahh'ale ni Bet-gilgali dahhiyá' nee ayeemaá Geba, nee Asmaweti, asma daauuse maray'ín gina tléhh ayeemaá Yerusalemu ngaa harweeriye'.

³⁰ Kaahamuusér Mungú nee múk tlahhoó Laáwi tina hhoohhooeesiyé' nee muko, nee afér do' nee koo/iro.

³¹ Geeraharuuse sleémeero ar Yuda ana burumbuúr dír koo/i, ngiri tsaát baraá daqooráy tsár oo daá' nee oo sluufmiís inooín bara/ ngwa duuruxiyé'. Daqtá wák ina bihhaá /iyáy xú' ay amór Afkuduú Xwaansláy.

³² Daauuseerí kana alu haár nee Hoshaya ta dinkwa nee tlaqtá geeraharuusér Yuda.

³³ Múk nee inós taa kone' a: Asariya, nee Esra, nee Meshulamu,

³⁴ nee Yuda, nee Benyamini, nee Shemaya nee Yeremia.

³⁵ Xwaylár kaahamuuse bahh'ale in tarumbeétadaá koná', inooín an ín, Sekaria garmoó Yonatan, garmoó Shemaya kuduú garmoó Matania, garmoó Mikaya, garmoó Sakuri, garmoó Asafu.

³⁶ Hhaeewós bahh'ale nina daaiyé' ar xooslaá daa'aangw awa waawutmo Daudi, heé Mungú. Inooín a ín Shemaya, nee Asareli, nee Milalai, nee Gilalai, nee Ma'ai, nee Netaneli, nee Yuda nee Hanani, kina geerahaár nee goousmo Esra.

³⁷ Dír Afkuduú Tsiinqaro nina gáwtí tsa/ané' ay amór gixsár Daudi, tana waaraáhh ar dír doó Daudi, alaá koo/i kana xuú' ay Afkuduú Ma'aay bihhaá da/aáw awa gixsa.

³⁸ Daqtá hatlá' ar Munguú sluufmiis tana bihhaá doó basáy xuú', aníng nee inooín tina koomaán dinkwa nee tlaqtá muu tari amór koo/ír xuú' ay amór /Aampaadár Asltá gufteeri ay amór Koo/idár Daqa Ur.

³⁹ Tawa didá' wa tlawaán ana waarahhaán ar Afkuduú Efraimu nee Afkuduú Yeshana ay amór Afkuduú Siyó tay kumitaán ay /Ampadár Hananeli ay amór /Ampadár Tsiiru ay Afkuduú Doó Bee/aangw. Hi'itanoorén kay alhhe'eesaán dír Afkú Doó Tseegmo.

⁴⁰ Gawaá adoorihe, daqooráywí tsaraawo ta daa'ángw ilahhooár daa' taa sihhiít baraá doó Mungú, dinkwa nee aninge nee tlaqtá geeraharuuse.

⁴¹ Kaahamuusér Mungú ar tarumbeétadaá koom, a Eliakimu, nee Ma'aseya, nee Miniamini, nee Mikaya, nee Eliehoenai, nee Sekaria nee Hanania,

⁴² nee Ma'aseya, nee Shemaya, nee Eleasari, nee Usi, nee Yehohanani, nee Malkiya, nee Elamu nee Eseri. Daauuse iwa da' kina geerahaár nee Yesrahia.

⁴³ Baalaarihe inooín ilahhooár muruú ta tsu/i kana haniís tari ló'wa qwalaá/. Asma Mungú gina ló'wa qwal/aás ar qwal/uú úr, /ameena nee na/iiwo sleeme tari qwalaá/. Bar/uú qwala/ oo baraá Yerusalemu kuri amór saáw wa axamiís.

Ilahhooár taa haniís as sluufaay baraá Doó Munguhe

⁴⁴ Qoomaarihe muu kuna tsawaár oo kutuwoó kuuntáy gu amohhe'eemiís kudá' ta ilahhooárí qamin, ilahhooár bu'úngw geera nee gár wák baraá muruú mibaango, nee muruú tinda baraá qamaá gixsár wa burumburín as kaahamuuse nee múk tlahhoó Laáwi ar adoodá' dabe i kat. Asma múk Yuda kaahamuusér Mungú nee múk tlahhoó Laáwi kudá' gadiyuusa' kiri sa qwalalaá/.

⁴⁵ Inooín adór Munguúín kur sluufmiisi kana qoomeés, nee adór tir hhohhoeemisiya' ar adoodá' daauuse nee xuumuusér afér do'o taa tleéhh, ar adoodá' waawutmo Daudi ngira oó' nee garmaawós Solomon.

⁴⁶ Iimír qoomár waawutmo Daudi nee Asafuwo geeraharusmoó daauuse aqo in daadeer nee daa'ángw xirif nee oo Mungú sluufmiisuuwo.

⁴⁷ Múk Israeli sleémeero, iimír qoomár Serubabeli nee Nehemiawo umuú baalaaro ilahhooa kana hanmiís as daauuse nee xuumuusér afkú do'. Múk Israeli tooka ngina partlitiyé' as múk tlahhoó Laáwi, múk tlahhoó Laáwi tooka ngina paraatliyé' as xwaylár Aroni.