NEHEMIA 1 - Biblía Axweesantá Hhohho' ar Mungú 2004

Firór Nehemia as Yerusalemu

¹ Kaangwí an axweesantá Nehemia garmoó Hakalia. Qoomár slahhángw ta bay Kislefu oo kurkú mibeeri tsár, aníng a baraá gixsadá' ur ar Susarí dirií'.

Firór Nehemia as Yerusalemu

² Hanani hhiyaeé' oo wák aníng ina i hardáh. Inós nee múk hatlá' oo baraá yaamaá Yuda daáhh, aníng ngiri yaahamiís kángw múk Yahudi kudá' aa meeti, mukdá' aa /uy loohatisaro, nee kángw Yerusalemuro.

³ Tina báy, «Múk aa /uy loohatisaro, kudá' aa baraá yaamuudá' i meet, i baraá slahh'amuú yaariír nee mureekesaay. Slám koo/idár Yerusalemu kaa feé/, nee afeerós kaa daá/ ar asla.»

⁴ Qoomár /aymi'iiká' ngiwa axaás ana yaamií iwiít nay /a/amiím, nari tsuunqumiís deelór hhaawakahe. Nee nari gwaawiím, nee niri fiririím dír geeraá Munguú doorí wa ale.

⁵ Niri oó', «Un firiím kuúng AAKOÓ MUNGÚ, Munguú doori, Munguúdá' Úr, kudá' ta da'ayumiiti, kudá' alqadoorós ga gawdemiís nee sla'aarirós ar warqawaaká dír kudá' inós ngu sla'a'a, nee awa hara'ayaarós nga oohi'i.

⁶ Iiarók qaaseek, ilaawók ni qaytsitiye' as firór anuú sagadiyusmoowók kawa iiárií qas, tí hamí ni dír geeraawók wa fiririim tlatla/aangw nee xweeraawo as xoorór Israeli, lawaaleerók. Aníng a tlakweemaá xoorór Israeli hhu'u'uúm, kudá' taa tleehhaán daanduuwoge, asma aníng nee múk doó baabuúeé' tlakweema iga tleehhaán.

⁷ Tlakweemaá yaariir iga tleehhaán daanduuwoge, tam hara'ayarók aga oohaniiká laqaá kaahirók, laqaá sakwasleemarók, tidá' sagadiyusmoowók Mose kwa beér.

⁸ Aníng kuúng un firiím, /aymuudá' taa ó' dír lawaalmoowók Mose inslaweek, kudá' tawa ó', ‹Bar tlakweema iga tlehhé' nu tsiyayaáx baraá xoordu.

⁹ Ala barna ki/é' dir'eé', nee hara'ayar'eé' kari oté' nee kari eehadé', tam mukók kwaa diyaa/i ay baraá alhhe'eesoó yaamu, aníng i burumbuúr amoodá' wa alé, nee ngay huúw ay didá' aníng naa tsawaár ngiwa umueéní qaas.›

¹⁰ «Mukwí an lawaaleerók nee an mukók kudá' taa ba/amís ar aleesleemuwók kudá' yaariír, nee ar dakók kudá' /uuruú koóm.

¹¹ Aá Aáko, un fiririím iiarók qaaseek, firór anuú sagadiyusmoowók iiarií qaaseek, nee firór sagadiyuuseerók tidá' qwalalaa/ umuuwók kuwa ilaiwawa/i. Un firiím án iwa iiárií qas, nee anuú sagadiyusmoowók iwa loohírí tlehh as waawutmo iwa gurtlay.» Asma aníng muruú wahángw waawutmo un amohhe'eemamiís.