NAHUMU 3 - Biblía Axweesantá Hhohho' ar Mungú 2004

¹ A tsaxwaawók kiíngasír gixsár tseerdaá ku'umamiis, aga háts muruú lamto nee oo al/aymaaro, hara/untsaawók i baloó faakiaaká.

² Afór qaw'i iiárií qaasaak nee tsimaahhír /angegeeamaá xuuruuá' nee faras nee gaardaá slaqwara awa ti'ii'imá'.

³ Slaqwaruusér faras gwa i tsa/aan nun i haraatláy, paangaduuín nee lawluuín i mitsiihhiyá', múk taa tsuú/ a tlaftá yaariir, ufér tu'u i alhhe'eesoó koondaaká, muu ya'aaín giri tuunqala/án gawaá tu'uudá'.

⁴ Asma ar yaaremá sli'imár sli'imuso'odae, aamár hhoohhoo' ar kángw da/ari gu baal, xoordu gina geewaagát ar sli'imarós tidá' nee tlahh'aá muu giri sageeqwaarés ar da/ariiwós.

⁵ AAKOÓ MUNGÚ Aleesleemusmo i kaahi, «Ga/aaweek, aníng a slaáqw nee kiíng, aníng tlabaawók in waatleés ay gawaá sagók, aníng xoordu ngiri /aankwetsuuwók i laqaám, nee waawuti'ima ngiri alsi'imuuwók i laqaám.

⁶ Aníng slasla/ara ngun gawaawók i kwaáhh, iri gár niqaay tleéhh, aníng kiíng iri warqeés tawa gár ta i qaytsimiiti ar waaqa'ama.

⁷ Nee kudá' kiíng i ará' in ilagogoowiyá', tari ooi, ‹Gixsár Ninewi aa hhiturút, heé ga sa tsuunqumiís a heemá? Heé ga gurkwa/ás dír ngway leelehhtuú aw.› »

⁸ Xáy kiíng an ak tsiníhe ta Tebesiro, tidár afaá yaaér Nilírí dirii', kari har'weér nee ma'aay, koo/irós a tlawi, nee koo/irós ar gawít an ma'aay.

⁹ Yaamaá Kushi an /uuruuwós, nee Misri sleeme taa baabaqaasiiká. Yaamaá Puti nee awa Libya an alee/isuuseerós.

¹⁰ Tam adoorihe kana ar tláy amór saáwí ale, mukós kuri ar tláy baraá lawaali'iima, na/iiwós kudaá qaweero kina tlumhhumamiís baraá lohdaá uren, mukós kudá' ta ilaiwawa/i kuna tlaxún, nee mukós kudá' urén sleémeero kuna tsegiít ar qutúr.

¹¹ Kiíng sleeme an oonít tari puungahhamút, tam dír guwaay kari leelehhít as wakuuseerók.

¹² Koo/irók tidá' gawit sleémeero tay adór /aantsír geeraawo aa hamat, ala qoomár barka diingiís in páhh gawaá afkú heé ga /aáy.

¹³ Ga/aaweek, xuumuuseerok a da'ayuuse adór /ameena, afér dahmuú baraá yaamuuwók i kístí dirí' dír wakuuseeroge, asla duuxuteerós sleémeero gaa /ák.

¹⁴ Ma'aay hhekeek as kiíng iwa har'weeriya'. Koo/irók gawdeeseek, tleei leehheek, baa/í lufuu/eek, gufteeraá matofaáli kar da/ amohhe'eeseek.

¹⁵ Amoosinge asla in /ák, paánga iri supaapiín, in /ák adór ingigi ir /ayayin. Gím ti yaarese' adór ingigitá wa ale, ti yaarese' adór tsaxw'i wa ale.

¹⁶ Mukók kudá' halaanu'uumár tleéhh ugwa yaarés ta tsetse/ú dooriwo. Ala hamí naa diyaa/atiyé' adór ingigitá wa ale.

¹⁷ Geeraharuuseerók a adór tsaxwi'i, nee mukók kudá' urén a adór daqooró ingigi, kudá' deelór tsaaqwaro gawaá yáwtá wa iwiiwitá', ala qoomár tsee/amá bira axwaanúy nin tlayá', tam amór ni kaya' heé ga xuú' i kaahh.

¹⁸ Aá waawutmo Ashúru, de'eemuuseerók aa gú', mukók kudá' ta ilaiwawa/i aa gufiís, mukók aa tsiyayaxaát gawaá tlom'i, tam heé gi burumbuuriím i kaahh.

¹⁹ Heé iinkaahhaywók ngu tse'eemiís i kaahh, iinkaahhaywók kwisíng i tsu/uut, kudá' sleémeero kangók ngwa axaasiyé' tsa/ii'ín ngin slahhiyá. Asma heé taa slahh'eská ar tlakweemaawók kudaá daqisleém a heemá?