NAHUMU 2 - Biblía Axweesantá Hhohho' ar Mungú 2004

Hu'umaá Ninewi

¹ Heé nu suwawa'aám hanoos i hi'iit. Do'ók xuumeek, loohi xuumeek, siinootiím, ti ló'wa amohhe'es.

² Asma AAKOÓ MUNGÚ xirfuú Yakobo gu ki/is, adoodá' xirfuú Israeli sleeme ngur ki/isi. Asma kudá' muruú hayoohimá' umuú gaaro ngina hayoohiyé', tam haleemá sabiíbuuín ngiri hhitiné'.

³ Gambaá slaqwaruuser'ín ki da/ten, slaqwaruuser'ín tlabaá ló'wa da/ten ngaa tsít. Gaardá farasuín i qwiiri/iiyá' adór tsángw asla, bál birka burumbuúr kiri amohhe'eés, nee lawlu kin miriri/iimiis ar adór dae tlaaq.

⁴ Gaarduuín in xwiishmitiyá' ti'iingo baraá lohduuwo, in tawo taambeeruusiyá' baraá xatsto, i qwiirii/iyá' adór tsángw asla, in gaanslár ti'ii'iná' adór maankaro.

⁵ Geeraharuuseerós gaa ateét. Ya'aaín ngin tunqala/aná' bir amoorós kayá'. Nin gaanslár tsa/aa/aná' gawaá koo/írí aleeró. Slám baqamoó gaa qaroó amohhe'eés.

⁶ Afér yau aa gweerít, doó waawutmo aa hirqamiít daeero.

⁷ Harér waawutmo ka tlaba' wasl karir tláy, nee sagadiyuuseerós ga satsuunqumís, in /ifír /aa/eewo adór hhookár wa ale, da/eewer'ín ngin pupuxumisiyá' ar gurhaami.

⁸ Ala Ninewi iimír aange a adór ma'aá naa kotsqotiye', mukos hamí in tawo ti'ii'ín, afo i kat, «Sihhiité', sihhiité',» ala tam heé wák oo alií qaytsimiít i kaahh.

⁹ Gimsé', peésa ar tlawaak, sahaábu ar tlawaak, asma a daqaari'iimár baloó faakaaká, umuúqo xooslomoó afhhamite i deer.

¹⁰ Ninewi ina mét ar gaa wasl nee ar deewa'ame nee hhituru'uuma, tam gur'ér muu ma'aay ngay dalaa/iyé', gurungeeri'ín tiri tuu'utiyé', afeetler'ín aa sikimít, gitsee/er'ín iri bahyuyuúr as dae.

¹¹ Gár múk gixsarí gu slaw a milá? Inooín ki saxamaár baraadae, ta direeraá /uureemaá kooma'a awa baraá mar'i. Kudá' hee i baloó qitliiká gwarangwarto.

¹² Inooín a slaqás nee direeri kudá' sluqor'ín ngi ohiimá' ar xaraasleema aluuwo muruudá' naa ohiné' nguri qasmiisiyá' dír na/ii'ín.

¹³ Ga/aaweek, AAKOÓ MUNGÚ Aleesleemusmo i kaahi, «Án a slaáqw nee kuúng, gaarduwók kudaá slaqwara i hhamiís ar asla, slaqwaruuseerók tidár adór direeri ngari tsuú/ ar paánga. Sluqoorók tidá' sleémeero an amór saáwí kwaáhh baraá yaamuwo, nee afór ya/abuuseerók kay malé axasiiká baloó alé.»