NAHUMU 1 - Biblía Axweesantá Hhohho' ar Mungú 2004

¹ Kitaábuuwí gár i kaahi a iigu'utuú daanduú gixsár Ninewi, kudá' Nahumu aa ár, heé yaamaá Elkoshi.

Buhhtaá Mungú as Ninewi

² AAKOÓ MUNGÚ a Munguú da/usmo nee oo li/usmo, ga slaiiká munguú hatlá' kuwa sluufmiisi, AAKOÓ MUNGÚ i li/oó bu'ún, nee i xaaraasl kángw kilá' wa alé, AAKOÓ MUNGÚ li/aay gu buu' gawaá daanduú wakuseerós nee xarasleemawós gin amohhe'eemaamiis as wakuuseerós.

³ AAKOÓ MUNGÚ ku inslaahheeká buhhtaawo, ala aleesleemuú yaariír gu kón, slám heé tlakusmo gu baloó harafaariiká tawa heé dakuús wásl. Lohduuwós i baraá fur'ár bambaao nee tluwoó duki, nee huunkáy a teerír ya'aawós.

⁴ Inós tlawi gan i gahhaat gari kahaas, yau sleémeero giri kahaas, Bashani nee Karmeliro niri /ootsiyá', tam /ayór Lebanoni in /óts.

⁵ Tlom'i nin daaraxaatiyá' dír geeraawose, tam gongoama' niri weeqiyá'. Yaamu kin daaraxaas dír geeraawós wa alé, yaamu dinkwa nee muruudá' sleémeero oo baraá yaamaá hoota.

⁶ Heé buhhtaawós gi ilií óh a heemá? Heé xarasleemaawós gi aleedaám a heemá? Xarasleemaawós gin tsaafmiis adór asla, tam tlaa/e gin feehhamiis sleeme.

⁷ AAKOÓ MUNGÚ ku hhoó', inós a koo/ír gawit deelór slahh'amuwo, inós mukdá' sleémeero gu i gogoów gu xún.

⁸ Ala ar alwuoodá' wa/amiima, hotaá wakusmoowós gin qwaarees, wakuuseerós gari guus ay baraá giwti.

⁹ Gár tlaakw ar ta aldakuta' daanduú AAKOÓ MUNGUHE a milá? Inós alhhe'eesayhúng oo ganaá' gwaa qaás, slahh'amu i ki/iiká sagaáwa tsare.

¹⁰ Inooín tam adór laqayaá taa nagwahhii'i, tam ni hirqamitiia nari ma'aay tleehhiiyá' as xuftár difaáir'ín, ala kin qororo'oos, adór hhaanslaá kaaharén wa alé.

¹¹ Heé wák i deéroóke oo ayaawók daáhh, oo muruú tlákw aldakuút daanduú AAKOÓ MUNGUHE, oo hara'ayár tlakw ga oiím?

¹² AAKOÓ MUNGÚ i kaahi, «Tam inooín i /uuruú kona'a, nee tam ki yaariire, ala kin suwa tsaat kiri hhaamiis. Tam aníng kuungá' naa slahh'eemisi, daxta nu male slahh'eesaaká.

¹³ Ala daxta taaqwanay'ín un giqáw gawaahunge, nee muqslaadá' tundura tsegiit ngari supaapiím.»

¹⁴ AAKOÓ MUNGÚ hara'aya ngaa oó' daanduwoge, i kaahi, «Hee tumu wák oo tlahhaywók gu doók u sleeraaká. Murslaaqatuuwók kudá' taa tléhh, nee kudá' taa weeqatís, in naasúw baraá doó Munguúwók wa alé. /Antaarók an foól asma kuúng tu tlaákw.»

¹⁵ Gawaá tlooma i qaatsitaak, ga/aawaak heé ya/abtór hho' ngi huúw, heé wayduú dahareemiís. Aá Yúda, deelorhúng ar ur tleehhaak, al'axweesantahúng boo/eesaak, asma heedá' tlaákw nu baloó tlaampa'aasiiká, asma kwaa qaroó suwa tsaát.