MIKA 7 - Biblía Axweesantá Hhohho' ar Mungú 2004

Tlakweemaá múk Israeli

¹ Tsaxwaaeé'! Asma aníng a adór heé qwariít, oo bururú gwaa sleemisuú ay. Ala laatí tam /aroó wák oo taa meetiís ugwa slawiiká. /Ar'i sleémeero kaa buú'

² Heé inkihhím i kaahh baraá ayaawihe, Heé gan'amuú tlehhiít i kaahh. Umuúqo heewo gár i leelehhiiti a hee nguwa gaasi. Umuúqo heewo hhiyaawós gun tsaaxweelír i qamín.

³ Sleémeero kin ilakaaharen muruú tlákw tlehhtuuwo. Ga/awuuse nee múk doó sakwasleema slukma ngin slaiyá'. Tam heedá' úr ta ilaiwawa/i tós ar i slai gan oo', sleémeero tin bardarahiyá'.

⁴ Tam kudá' hhoó' baraá tla/angw'ine a adór fuquráy, nee heé ganaá' baraá tla/angw'ine a adór yawtá laqeelo. Qooma naa hardát ar Mungú mukwí nguwa muxi, adoodá' xuumuuser'ín ngira geerií gurbuú', asma xuumuuser'ín a aaruuse. Mukwí qoomaarihe dae gway eér, nay amoqwaariyá'.

⁵ Inslaawmoowók mu harahhiifaar, nee mulqumoowók mu harahhiifaar. Afkók de'eemeek tam dír hareeroge, tidá' ta sla' nee kuúng alguaaimá'.

⁶ Asma qoomaarihe garma baabuúwós gun waaqaqaa', tam dasi in aayiírós tlaampa'aamís, nee harér garma in aayiír hhawaatuuwós tlaampa'aamís sleeme. Wakuusér hee a múk do'ósú kilá'.

⁷ Ala aníng guruueé' un amór AAKOÓ MUNGÚ xu'ús ar sla'aari, Munguúeé' kudá' aníng i ba/amís un daamaaraám. Munguúeé' aníng i axaas.

Aako mukós gu ba/amis

⁸ Ma qwalaala/aar, wakusmooeé', án bar aga huú', a malé sihhiít. Bar baraá giwtír i dirií', AAKOÓ MUNGÚ a gwa/aateemaeé'.

⁹ Aníng tlakweema ina tleéhh. Gawaá adoorihe buhhtaá AAKOÓ MUNGÚ in saqiqtliím ala alé ay dír i aleekalaa/i. Inós sakwasleemar'eé' gan tleehh aluuwo, as hariímar'eé' ngiwa slaw. Aníng i tsee/á i duux amór gwa/aateema, adór inós ira ba/amís ngay ár.

¹⁰ Wakusmooeé' iri muruut adoorí birnga ár, tam kudá' káh, «AAKOÓ MUNGÚ, Munguúwók i amá?» Aníng a qwalalaá/ daxta, asma wakusmooeé' u ár kuwa kal/an adór baa/ír baraá loohi.

¹¹ Kuungá' múk Yerusalemu, qooma ni hardát ar koo/ír Yerusalemu kawa tleehhi. Baalaadae digeemiiwók kin ló'wa sawees.

¹² Baalaadae mukók nin bihhe sleémeero wá harakii/. Da/aawe nin amór yaamaá Ashuru nee yaaér Eufrate wa kii/. Basko nin amór yaamaá Misrír wa kii/. Nin haraki/iyá' iimír amór tlabeemaá sawen, nee iimír amór tlom'aá sawén wá alé.

¹³ Ala Mungú yaamu gi hhitín, asma tlehhma'aá tlakw awa múk baraadá' wa hoót.

Aako mukós gu gurtláy

¹⁴ Aakoó Mungú, mukók de'eemeek ar hhartók, daqtók tidá' taa tsawát. Inooín tam ta kilooín hooti baraá sla/atá wa alé, ala yaamuuín kaa harweér nee yaamaá gitsór hhó' koomá'. Daqtók i qawór eer baraá qawtantadá' hhoo' ar baraá yaamaá Bashani nee Gileadi, adoodár aáng wa alé.

¹⁵ Aakoó Mungú, muruú waa/oo/amo tleehheek dirén i alé, adoodár aáng kura tléhh atén tiwa baraá yaamaá Misrír wa dúx.

¹⁶ Múk xoordaá hatlá' adoorí kan ar, inooín tay muruumiit, tam ta /uureemaá kona. Mureero afe kay tuuntuuk ar dabaaín, tay mafaa' adór múk iawásl.

¹⁷ Inooín tay hi'imiit ar gur'e hhape ngiri naatsiná' adór dayshe, niri baraá boh'er'ín wa ti'iitiyá' ar dae nee daaraxaay. Inooín de'eero nay amór AAKOÓ MUNGÚ, Munguúrén, i hardihiyá'. Niri dír geeraawósí sihhitiyá' ar de'e

¹⁸ Munguú adór kuúng i deéro? Asma kuúng tlakweemaá mukók kudá' aa meet in gurtleér, nee dakuúsar'ín an hingeemís. Kuúng buhhtaawós i alkomkakondaaká deelo sleémeerowo. Ala gár ta ló'wa sla' a sla'aarír warqawaaká,

¹⁹ Kuúng atén tin malé gurtleér, dakuúsarén kari yaamií kalá/, kuúng tlakweemaarén sleémeero in kwáhh baraá iltá tlawi.

²⁰ Kuúng inkihhimuuwók kuri dír xwaylár Yakobówí laqaán, sla'aarirók ar warqawaaká kari dír xwaylár Abrahámúwí laqaán, adoodá' iimír aange kara dír xwayliiteéréní al'axwés.