MIKA 6 - Biblía Axweesantá Hhohho' ar Mungú 2004

Sakwasleemár Mungú dír múk Israeli

¹ Kángw AAKOÓ MUNGÚ i kaahi, dír mukós iiárií qaasaak. Gimáy AAKOÓ MUNGÚ, sihhiít, kwasleemarók ooang geeraá tlom'í wa alé, nee gongoama' sleeme afoorók ngi axaasiye'.

² Kuungá' tlóm'i, kwasleemár AAKOÓ MUNGÚ iiárií qaasaak, nee kiíng iihhafiirír gawit ar yaamu ar kureerisleém, iia qaaseek sleeme. Asma AAKOÓ MUNGÚ i kwasleemár kón daanduú mukose, nee muxta ngi huuw amor'ín i alé.

³ AAKOÓ MUNGÚ i kaahi, «Muk'eé', gár naa kuungá' a tleéhh a milá? Nee gár nura slaaqatís a umós? Gimsé', kuungá' ooare'.

⁴ Aníng kuungá' nuna baraá yaamaá Misrír wa duúx, nuna baraá yaamaá lawaali'iimár wa tuú/. Aníng Mose nee Aroni nee Miriamu ngina amorhúng i ya/aáw as nuwa geerahariya'.

⁵ Kuungá' muk'eé', inslawiimé' adór Balaki, waawutmoó yaamaá Moabu nura qwaareesár wa slaá' nee adór aarusmo Bala'amu, garmoó Beori ngwa báw, anuú AAKOÓ MUNGÚ a slaá' kuungá' nuwa gár hhoó' i tleehh. Nee inslawiimé' sleeme adór tara Shitímuú wa tleeré' tay hardaté' ay Gilgali. Muruuwí inslawaak as kawa tsahha' adór án kuungá' nura alee/iimamiís.»

Hotángw Mungú gu sla'atimís

⁶ «Aníng gár ni huuw a milá birni dír geeraá AAKOÓ MUNGÚ káw as Munguúdá' gáwtí dirií' nguwa i tumbarara'aat? Xáy, gár ni huuw a tsa/eetaá naa sangw /oní'i? As ngiwa ilahhooár da/tá wa haniis.

⁷ Xáy, AAKOÓ MUNGÚ gwaandaawér kume gu sla'atísa? Laqaá ku sla'atísi nee di/oó wa/amiím adór ya'aá kumér mibaangw? Laqaá na/ay'eé' oo baris un haniísa as dakuúsar'eé'? Xwaylár slaqwte'eé' an haniísa as bu'utuú tlakweemaaeé'?»

⁸ Aá heewí, AAKOÓ MUNGÚ gár kuúng wa hariim tlehhmuuwo ngaa laqán. AAKOÓ MUNGÚ gár i slai a tí: Gan'amu kuwa tlehh, hhooeema kiwa sla', nee tawa hot dinkwa nee Munguúwók ar tiwa niinaweemis dír geeraawose.

⁹ Heé sagaloó' a kudá' AAKOÓ MUNGÚ gu ilaiwawaá/. Afór AAKOÓ MUNGÚ múk baraá gixsár Yerusalemu gu i /aa/amiín, i kat, «Iia qaasaak, kuungá' múk baraá gixsár Yerusalemúr wa burumburimitá',

¹⁰ Xáy, baraá maraá múk tlakwe daqaari'iimár taa sláy ar qoomoó al/ayma i kumitkáhe? Asma xosluudá' tar qoomeemesi a xoslaá al/ayma, kudá' aníng naa aáhh.

¹¹ Xáy, heé qoomoó gana'aaká gur qoomeemeés, aníng u ya/a/amaakáheéke?

¹² Dirhunge daqaarér narkuutér al/agagiim i deer, kuungá' sleémeero a lamuuse, aferhunge a al/aymár katá'.

¹³ Ga/aawaagáy, aníng kuungá' naa qaroó iimu/uúm muxtaaro, nee nu gaárí geexawaaká, asma tlakweemaahúng.

¹⁴ A /ayiindá', ala a axa'aaká, qwarkuhúng i tsauyká. Kuungá' mura' u koondá' ala tum loohatisa'a amohhe'eesaro u aleesleera'aaká. Tam ugwa aleesleeri'i xuumaro, aníng u qwaareés ar slaqwara.

¹⁵ A dahaasiindá', ala a bu'uunda'aaká. Di/i a tlehhitá', ala a slikiinda'aaká. Na/aá sabiíbu i tsoo/itá', ala ma'aywós i wahaanda'aaká.

¹⁶ Adoorí in tleehharút asma kuungá' hara'aydaá tlakw awa waawutmo Omri ina oté', nee tlehhmi'i sleémeero awa doó garmaawós, waawutmo Ahabu, ina eehadé'. Kuungá' loohir'ín kari eehadé'. Gawaá adoorihe aníng yaamuuhúng i hhitiím, nee kuungá' tari waaqa'atitá'. Múk xoordaá hatlá' sleémeero nuri waaqaa'.»