MIKA 4 - Biblía Axweesantá Hhohho' ar Mungú 2004

Mungú yaamu sleémeero gi sawaawuti'ín ar wayda

¹ Ala qoomár alhhe'eesáy birna xeér, tloomadá' taa Doó AAKOÓ MUNGÚ i tleéhh, ka gawdees, nee kari gáwtí tleerees ta tlom'aá hatlá' sleémeero. Xoordaá amoodá' kakaawá' hhay i tsatitiiká.

² Nee xoorduuká' yaariir niri hardihiyá' tari ooi, «Qwalaasé', a tsa/amán gawaá tloomár AAKOÓ MUNGÚ, amór Doó Munguú Yakobo. Inós atén tiri intsaahhatis lohduwose, atén niri hi'imiitaán ar baraá irwaarós.» Asma intsaahhasa baraá Siyoni ngin dáhh, nee AAKOÓ MUNGÚ axweesantós ngin baraá Yerusalemúr wa oo'.

³ Inós xoordu sleémeero gin sakwasleemuut. Inós xoordaá sawen awa /uuruú koomá' giri iigahhaat. Inooín paangaduuín ngiri warqeesiyá' tari kureemi, nee lawluín ngiri tsataa'aá tsaaráy tleehhiyá'. Xooro i baloó paángár tleská malé ale daanduú xoorór hatlae. Tiri baloó intsaahhatimisiaaká slaqwaraaro.

⁴ Ala umuúqo heewo iri iwiwiit baraá mahhtuú xa'anoó sabiíbuuwós wa ale, nee mahhtuú /aantsírós. Nee tam heé gi baloó dae tsaát i kaahh, asma AAKOÓ MUNGÚ Aleesleemusmo kaangwí ngwaa oó'.

⁵ Asma xoordu sleémeero nin hootiyá' nee umuú xoorooro ar baraá umér mungu'ii'ín. Ala atén an hootaán ar baraá umuú AAKOÓ MUNGÚ, Munguúrén, ay kureeraá kureér.

Múk Israeli ni baraá lawali'iimár wa harakii/

⁶ AAKOÓ MUNGÚ i kaahi, «Baalaadae aníng kudaádá' soopiím un haraki/ís. Aníng kudaádá' taa guús un ki/ís, nee kudaádá' aníng naa slahh'eemisi sleeme.

⁷ Aníng kudaádá' soopimá' in meetiís, nee kudaádá' taa sií' ngiri xoorór /uuruú koom tleéhh.» Anuú AAKOÓ MUNGÚ ngiri sawaawuti'iím baraá tloomár Siyoni wa ale kureerisleém.

⁸ Kiíng, tloomár múk Siyoni, baraawoge Aakoó Mungú i mukós de'én, adór de'eemusmoó gawaá /aampár wa xumiís amór bee/aangós i alé. Kiísíng gixsár Yerusalemu a malé gixsár ur tleehhít ar waawuti'iim malé alé adoodár aáng tara waawuti'iín.

⁹ Waáy, kiíng ma har tsimaahhús? Ahaá, waawutmoowók i káhhi? Hara'ayusmoowók aa qwaári? Nee slahh'amaaye iga óti adór slahh'amaayér asltá xwayla?

¹⁰ Kuungá' múk Yerusalemu, kumiité' baraá slahh'amaayeero nee /ifooro, adór /ameenír xwayla. Asma daxta kuungá' a ti'itá' baraá gixsaro, tari hotaá eerá' baraá tsee/aá /awaak. Aqo an yaamaá Babulónírí hardatá'. Ala amoodae kuungá' tundu tuu/ AAKOÓ MUNGÚ kuungá' nu ba/amis, nuri baraá dabaá wakuuserhúng wa gweer.

¹¹ Hám daxta xoordaá yaariir naa burumburitiyé', gixsár Yerusalemu ngaa harweeriyé', as kuungá' múk Yerusalemu tunduwa i haratlay, ta kaahi, «Gixsár Yerusalemu ka hhitin. Ilaarén taangór gixsarí ngi ariye'.»

¹² Ala laatí xoorduuká', inslawoó AAKOÓ MUNGÚ ngu xuiaaká, tam gár i tleehhamór wa slai ngaa tsaahhi'iiká. AAKOÓ MUNGÚ inooín ngina adór angaáno wa haraki/ís, oo taa burumbuúr as kuwa slahhan.

¹³ Mungú i kaahi, «Gimsé', kuungá' múk Siyoni, sihhiité', wakuuserhúng muxaak. Asma aníng kuungá' nu /uurií haniís tay adór awuú xareemiiwós adór muqsla, nee funqaáruuwós adór muqslír sirdaa/aat. Adoorí an adór kuungá' xoordaá yaariir kir bala'. Haasánguín kudá' naa baraá slaqwarár wa slayé' kuungá' ngu hubá' amor'eé' alé, nee daqaari'iimar'ín ngi hubá' amor'eé' as tawa te'eé', anuú Aakoó yaamu sleémeero.