MIKA 2 - Biblía Axweesantá Hhohho' ar Mungú 2004

Sakwasleemár Mungú daanduú geeraharuuse

¹ Mukdá' sleémeero muruú tlákw qoomeemeés a tsaxwaaín, asma inooín barta baraá qateenoínií qaát amsiwo muruú tlákw kun qoomeemees, Matlaatleero qatuuwo birna tlayé', muruudá' kway tsuwa tleehh, asma aleesleemu ngu koná'.

² Qaymo birnga ilatleeruusiyé', aqo ngin hayohiyá', do' burungwa ilatleeruusiyé', aqo ngun hayohiyá'. Hee nguri baramaanuusiyá', nee múk do'ose, muu nguri aali hayoohiná' sleeme.

³ Gawaá adoorihe AAKOÓ MUNGÚ i kaahi, «Ga/aawaak, aníng sleeme a muruú tlákw qoomeemeés oo ni daanduuhúng i huuw, oo kuungá' ta ilagoba'aaká. Gaarí a qoomar tlaakw, tam kuungá' hi'iitanór daara/aangw kay inki/a'aaká.

⁴ Baalaadá' birna hardát, muu kuungá' nuri daa'ángw kooyaángwí oh, oo adoodá' kuungá' taa mukdá' i tlehhé', tawa adór daa'ángw wa/aa/i, tay ooi, ‹Atén taa /awa/awín ló'wa alé, AAKOÓ MUNGÚ daqaari'iimarén gana warqeés, gari hingeés direne, qamuurén gina qasmiís dír múk wakuuse.›

⁵ Gawaá adoorihe kuungá' geeraharuúse, dirhúng i sangw káhh baraá yaamuukae qoomár AAKOÓ MUNGÚ bar yaamuuká' ngaa ki/ís dír mukós i alé.

⁶ Muu aníng in babay, «/Aymi'iisíng awa sakwasleema mingi atén babawaar, kangwsíng ta kat mu alki/iitaar. Asma Mungú atén ti mureekeesiiká.

⁷ Xaysé' xwaylár Yakobo, axweesanoó adoorí i qóna? Xáy, AAKOÓ MUNGÚ qitluuwós gwaa máyi? Xáy, inós adoorí ga tlehhaahhíti? Xáy, axweesantaeé' ka hhooeekáhe dír kudá' gan'amúr hoota?»

⁸ Aako múk adoorí káh, gu babay, «Kuungá' muk'eé' un hara/uuntsiitsiindá' adór wakuuse. Múk naa baraá slaqwarár wa waatl kawa xui amohhooa i deer, laatí kuungá' in daamaraandá' kiwa inqwar hayota'.

⁹ Kuungá' /ameenár muk'eé' an tsee/ií kwakwahhá' baraá maray'ín kudá' hotaariro naa intsaahhiyé'. Nee na/ii'ín kiri tsuuqaaeé' /ité' slafingw'ín sleémeero.

¹⁰ Quutlé', tlawsé', asma diirí a dír amohhooarhungeeká malé alé. Asma slasla/areemaahúng yaamuuká' ngaa qwaareesiyé', eeít, ar qwaareemisuú iló' ló'wa alé.

¹¹ «Heé kuungá' ta sla'a' a kudá' lamtá dahaaremiís nee al/ayma, oo káh, ‹Xuftár yaariir a sleerá' tawa wahaanda' tay oonimitá'.› Aarusmoó adoorír axweés, an kudá' nee kuungá' ti slawá'.

¹² «Ala múk Yakobo sleémeero un dinkwaárií burumbuúr, Nee panaydá' aa meet oo múk Israeli un haraki/ís, in dinkwaárií qaás tay adór bee/ángw baraá sluma, tay adór daqtá bee/aangw ar baraá qawtántí dirii', yaamuuhúng niri malé hatsiyá' múk tsimaahhuusa as qwala/.»

¹³ AAKOÓ MUNGÚ inooín gi geerahaar, afkú slumtá gixsa gu fee/, inooín niri waarahhiyá' ar afkudá', niwa tsee/ií ti'iitiya'. AAKOÓ MUNGÚ an waawutmooín, kudá' waaraáhh ar afkudá', inósú kilá' i geeraaín wa hi'iimiit ngiwa geeraharahari.