MIKA 1 - Biblía Axweesantá Hhohho' ar Mungú 2004

¹ Kaangwí an axweesantá AAKOÓ MUNGÚ, tidá' Mika aa axaás, heé gixsár Moresheti, de'emaá waawituú yaamaá Yuda tawa Yotam nee Ahasi nee Hesekia. Inós axweesantí gana axaás ar loohír iigu'utuú aa araa'ár daanduú gixsár Samaria nee ar Yerusalemuro.

Tsuunqusmoó daanduú Samaria nee Yerusalemu

² Kuungá' múk xoordu sleémeero, iia qaasaak, kuungá' baraá yaamu sleeme iia qaasaak nee umuúqo gár baraá yaamií diriia. Aakoó MUNGÚ nusa kwasleemuut iimír amór Do'ós kudá' hhoohhoó' wa ale.

³ Ga/aawaak, AAKOÓ MUNGÚ ni hardah amór hotaangós ngin wa tláy. Inós ni aweer nee gongoama' giri adarah.

⁴ Tlom'i gay ya'ár weeqatis adór boohhayángw bihhaá ásltí dirií'. Xatso nay feehhamiitiyá' adór ma'aá hhaahháy.

⁵ Tí sleémeero i tleehharút as dakuúsár múk Yakobo nee as tlakweemaá múk Israeli. Xáy, dakuúsar múk Yakobo a milá? Ahaá, a gixsar'ín tidá' ur ar Samariároke? Xáy, tlakweemaá múk Yuda a milá? Ahaá, a gixsar'ín tidá' ur ar Yerusalemuúwoóke?

⁶ Aako i kaahi, «Gawaá adoorihe aníng gixsár Samaria a /aantani tleéhh baraá tla/ángw xatsto, tari adór dír ta xaa'aá sabiíbú i dahamamisi. Nee tlaa/eedá' tara tleehhiít in kwaáhh baraá xatsa, iihhafiiriirós ngiri geehhoeés.

⁷ Slaqsi'iiwós kudá' mungui sleémeero kin naasúy, nee umuúqo gaarose kari daa/ ar asla. Nee slaqsi'iiwós kudá' ngiri hhaamiís. Asma muruudá' sleémeero taa burumbuurín as bu'utuú tsaatuso'o, Kunar tláy tawa bu'utuú tsaatuuse sleeme.»

⁸ Gawaá adoorihe aníng a tsuunqumiís niri /aa/amiím as kaangwí, tsitay'eé' un duúx niri hi'iimiít ar /aankwets, niri tsuunqumiís adór iintsaawér wa alé, nee niri /aa/amiím adór sakwel.

⁹ Inkahha'aá Samaria i baloó hungu/iaaká, múk Yuda sleeme inkahhi'iidá' gaa sláy, naa hardihiyé' ay afér maraá Yerusalemu, didár muk'eé' i dirii'i.

Wakuuse aa Yerusalemúr i tseewuúr

¹⁰ Tí ma alki/iitara' dír wakuuseerén tidár baraá gixsár Gati, nee sleeme ma baloó /aa/ara'. Kuungá' múk gixsár Bet-leafra, baraá teerír wa gwangwara'amité' as gurhaami.

¹¹ Kuungaásingá' yaamuloousér baraá gixsár Shafírí, tlawsé' ar mure nee /aankwets. Kuungaásingá' baraá gixsár Sa'ananír wa hootá', ma tsee/ií ti'iitara' baraá gixsaro. Asma múk baraá gixsár Bet-eseli ta tsuunqumiis, asma alee/isaydá' ta slaslay dirhúng wa ale aa faák.

¹² Asma múk baraá gixsár Marotír wa hoót alee/isaay ngun ló'wa ilatleeruusiyá'. AAKOÓ MUNGÚ amotlakwe gana huúw, ay dír afkú gixsár Yerusalemu.

¹³ Kuungaásingá' yaamuloouusér Lakishír hoot, gaardaá slaqwara farsuú isláhh ti tsege'. Asma kuungá' tlakweemaá múk Israeli ina alealusé', nee múk Siyoni kuri tlakweemár eeré' sleeme.

¹⁴ Kuungá' múk yaamaá Yuda, múk gixsár Moreshet-gati deelór i ooaak, asma wakuuser'ín naa naká/. Waawituú múk Israeli alee/iisaay kun dír múk gixsár Aksibuú i daamaarán, ala gár ta slay i káhh.

¹⁵ Kuungá' múk gixsár Maresha, Aako hee ngu ya/aaw oo kuungá' nu malé baál. Geeraharuusér múk yaamaá Israeli sleeme i góp ay baraá mar'ír Adulamu.

¹⁶ Kuungá' múk yaamaá Yuda, se'eemerhúng deeqwaak tawa tsuunqumisa' as na/iihúng kudá' ta sla'a'. Sagerhúng adór tiqár gwares tleehhaak, asma na/iihúng kir tláy nee wakuuse ay yaamaá saawá'.