Matayo 9 - Biblía Axweesantá Hhohho' ar Mungú 2004

Yesu heé tiqtír sol'omit nguwa hungu/uús

¹ Yesu iri tsa/án gawaá miringamo, iri waaraáhh ar baraá tla/ángw tlawi, iri hardáh ay baraá gixsadá' inós i hooti.

² Heé tiqtír sol'omit kuri huúw dír Yesu, aa qaát gawaá shafta. Nee Yesu haratlintaaor'ín ngiwa ár, heedaáduú tiqtír sol'omit guri báy, «Ma da'ayumiitaar, garmaaeé'. Tlakweemaawók kaa gurtláy.»

³ Intsaahhatuusér hara'ayár Mose bahh'alé tari baraá muner'ín i káh, «Heewí i Munguú /ooslislín.»

⁴ Ala Yesu tidá' ta baraá muner'ín i axweesi gari tsaáhh, iri oó', «Muruusíng tlákw mus baraá munerhúngí axwesá'?

⁵ Gár ák inslaahh a gaalá, a tawa oói, ‹Tlakweemaawók kaa gurtláy›, laqaá tawa ooi, ‹Sihhiít, hi'iít›?

⁶ Ala kuungá' xuaak adór Garmoó Hee aleesleemu ngur kón baraá yaamuwo oo tlakweema ngiwa gurtlay.» Tiqtusmoodá' guri báy, «Sihhiít, hhaftuuwók gagaareek, waátl amór do'ók.»

⁷ Iri sihhiít, iri waátl amór do'ós.

⁸ Boo/aydá' didií dirií' adoodá' ngiwa ár iri da'ayuút. Mungú kuri xirfayeemiís, oo aleesleemuú adoorí gwa dír múkwí haniis.

Yesu Matayo nguwa ateét

⁹ Yesu iri tláy didaádae. Qoomár tawa hi'iiti Yesu heeko guna ár, aa iwiít dír doó ohme. Umuuwós a Matayo. Yesu guri báy, «Án eeharáng.» Iri tláy, guri eehár.

¹⁰ Qoomár Yesu iwa iwiít dír muruú /ayma dír doó Matayo, ohomuusér koódi ar yaariir nee múk tlakuuse tari hardáh, tari iwiít dinkwa nee Yesu nee eeharuuseerós.

¹¹ Múk Farisayo adoodá' ngiwa ár, eeharuusér Yesu kari báy, «Ahaá, asma milá, intsaahhatusmoohúng mis /ayín dinkwa nee ohomuusér koódi nee tlakuuse?»

¹² Yesu axweesanay'ín kudá' nguwa axaás giri báy, «Múk slaqo hhó' i qwaslaarmoó leelehhiitiiká, aqo har tiqtuuse.

¹³ Ala tlawsé', gídaabár /aymi'iiká' aldakuutaak, ‹Ilahhooár muruú ta tsu/i a sla'aaká, ala gár ni slaa' a gurtleemu.› Aníng naa hardihiiká asma múk hota ganaá' nguwa ateetiim, ala a múk tlakuuse.»

Yaahasa daanduú gwaawito

¹⁴ Qoomaadae eeharuusér Yohane Yesu guri i daqeér, guri beér, «Ahaá, atén nee múk Farisayo mas gwaawawimaán, ala eeharuuseerók gaálaay i gwaawawiin?»

¹⁵ Yesu gari báy, «War/aá heé duuxuuxuúm adór ir tsuunqumiisiya' a doomá, qoomár bar ta dinkwárií dirii' nee heedaádá' duuxuxuúm? Ala deelo i hardát ar heedaádá' duuxuuxuúm kuwa hingeesi. Daqaní an qoomár inooín tawa sangw gwaawin.

¹⁶ «Hee i kaahh oo warqamoó inqwaarír /abén gu tsaát, guri waraaq ar inqwaarír qaren. Asma warqamoodá' /abén taa qaás, inqwaaridá' qaren ga hhitín, nee didaádá' aa fox iri tláhh.

¹⁷ Tam muu difaáír /aben ga qamaaminká baraá tlakwa'aá kaahari awa qaren. Ala birnga qaás, difaáidá' /aben tlakwi'iidá' gi tsú/, difaái iri ku'út, nee tlakwi'iidaá kaahari niri hhitirutiyá'. Ala difaáír /aben dír ki qamaamin a baraá tlakwa'aá kaahari awa /aben, daqaní muruuwí tsaraawo ku amohhoó'.»

Waaslee/atisár dasi nee /ameenír inqwaarír Yesu gaa kwatit

¹⁸ Qoomár Yesu iwa dir'ínií axweesi naxés heeko úr oo múk Yahudi nina hardáh, guri i tumbarara'aát, iri oó', «Dasir'eé' hamír kilá' aa gwá', ala kuúng qwaláng, dakók i qaaseek, inós daqaní i sláf.»

¹⁹ Yesu nee eeharuuseerose tari tláy, heedaádá' kuri eehár.

²⁰ Siiwadár kilae /ameenirka wák ar tiqtír ubíngw tseerdu nina hardát. Inós i tiqaaqiín ay kureeri mibaá nee tsár. Ina amór alaá Yésúr ót, guri pasltá inqwaari kwatít.

²¹ Asma /ameenidá' ina baraá muunaáwósií ó', «Pasltá inqwaarirós bara sa kwatiít, a hunguú/.»

²² Yesu iri alií warqáy, gari ár, gari báy, «Mune hhe'eés, dasir'eé', haratlintaaoorók iga hungu/ús.» Siiwadár kilae /ameenidá' iri hungú/.

²³ Yesu iwa dír doó waawutmoodií hardáh, múk filiímboó ufhhaám guna didií áy, nee boo/oó muu oo tsuunqumiís.

²⁴ Giri báy, «Quutlé', asma dasiirí aa gwaiká, in gú'.» Kuri ló'wa wa qasén.

²⁵ Alaá boo/aydá' kuwa surkuús, Yesu ina dáh, dasiidá' gari dawa óh, iri sihhít.

²⁶ Kaangwí iri xu'utiít baraá yaamuudá' sleémeerowo.

Yesu taampaá tsár ngiwa ila' qaytsitís

²⁷ Yesu iwa didá' wa tláy, iri geerií kumiít, kuri eehár nee múk tsár oo taampu i tseeamín, ta kaahi, «Garmoó Daudi atén ti gurtleer.»

²⁸ Yesu iwa dír dó' i hardáh, taampuudá' nguri i daqayé'. Yesu giri báy, «Kuungá' aga haratlinti'í'i adór aníng tlehhmuú adoosíng ngur aleesláw?» Tari oó', «Eeít, Aáko.»

²⁹ Ilaaín giri kwatimiít, iri oó', «Ar qoomoó haratlintaaorhunge tisíng ta sla'a' slawaak.»

³⁰ Ilaaín niri qaytsitiyé'. Ala Yesu giri ló'wa gurbuú', giri báy, «Kaangwí mu baloó heé bawaara'.»

³¹ Ala inooín tari tláy, kaangwí kuri tsiyayaáx baraá yaamuudá' sleémeero.

Yesu heé afa wasli nguwa hungu/uús

³² Qoomár mukwí iwa ti'imiiti, heé afa wásl oo neetlaame aa eér kunguri huúw dír Yesu.

³³ Qoomár neetlaameedá' kawa hingeés, heedá' afa wásl iri axweés. Boo/oó muu iri waa/oó/, iri káh, «Gár adoorí aga araaniiká qooma sleémeerowo baraá Israeliro.»

³⁴ Ala múk Farisayo tana oó', «I neetlaamér gusiisín ar /uuruú neetlángw úr.»

Yesu guruuwós iwa tláy as muu

³⁵ Aluuwo Yesu gixsadu sleémeero nee ayeemo gina alhi'iimiít. Iri baraá maraá saalingw'ín wa intsaahhatimís. Ya/abtór hho' ar waawuti'iimár Mungú gari alki/iít, nee tiqtuuse sleémeero gari hungu/uumiís, nee slaqwaatlakwér dimbadimbé sleeme.

³⁶ Yesu boo/oó muu nguwa ár, iri gurhaamuút, asma boo/aydá' iwa slaaqamiít nee iwa diyayaa/aát adór bee/ángw de'eemusmo wásl.

³⁷ Yesu eeharuuseerós gari báy, «Bu'uungw ku yaariír, ala múk gadiyeé ku niiná.

³⁸ Gawaá adoorihe Aakoó bu'uungw loó' firiimaak as múk gadiyeé nguwa ya/aawi baraá bu'uungós.»