Matayo 8 - Biblía Axweesantá Hhohho' ar Mungú 2004

Yesu heé tiqtír tsatmit nguwa hungu/uús

¹ Yesu iwa gawaá tloomár wa aweér, boo/oó úr oo muu guri eehár.

² Heé tiqtír tsatmituú koóm iri amoorós i hardáh, guri i tumbarara'aát, iri oó', «Aáko, kuúng bar slá', i aleesleér iwa hheehhe'es.»

³ Yesu guri dakós i gan'aás guri kwatiít, guri báy, «Án a slaá', hhoohhooúw.» Hamtidár kilae tiqtirós tidár tsatmit iri hungú/.

⁴ Yesu guri báy, «Ga/aaweek, tí ma heé bawaar, ala tláw, ti laqaan dír kaahamusmoó Mungú. Muruudá' Mose aa hara'ayín haniiseek, as kahhó' inooín adór kuúng tara hungú/ ngiwa ariya'.»

Yesu lawaalmoó geeraharusmoó askaári nguwa hungu/uús

⁵ Yesu iwa dáh baraá gixsár Kapernaumu, geeraharusmooko askaári iri hardáh dír Yesu, iri oó',

⁶ «Aáko, lawaalmooeé' i dír dó' wa tiiq, tiqtír sol'omituuwo i ló'wa slahhaa'.»

⁷ Yesu iri oó', «Án ni hardáh, ngu hungu/uusár áw.»

⁸ Geeraharusmooduú askaári iri oó', «Aáko, aníng a hariimaaká kuúng niwa baraá dooeé' dát. Ala kuúng /aymu na ooeek, nee lawaalmooeé' i hunguu/.

⁹ Asma aníng sleeme múk i baliít i deer, slám askaárír án ni baliit i deer. Kwí bura báw, ‹Tláw,› aqo in tláy, nee kwí bura báw, ‹Qwaláng,› aqo nin hardah. Nee lawaalmooeé' bura báw, ‹Adoorí tleehheek,› aqo gan tleehh.»

¹⁰ Yesu /aymi'iidá' ngiwa axaás, iri waa/oó/, mukdá' nee inós ti alkoomá' guri báy, «Án a kah, haratlintaaór ur ar adór tí aga baloó ariiká tam dír heé wake baraá múk Israeliwo.

¹¹ Án a kah, múk yaariír ni hardah, oo da/aá daáhh nee /uwaawo. Inooín ta al iwiit dír muruú /ayma dinkwa nee Abrahamu nee Isaka nee Yakobo baraá waawuti'iimár dooriiwo.

¹² Ala mukduú waawuti'iimarí kun kwaahh tsee/áy alé baraá giwti, an didá' tawa /aa/amin nee sihhina' kiwa qirirtlimiisi.»

¹³ Ala Yesu geeraharusmooduú askaári guri báy, «Tláw waátl, tisíng taa haratlintí' i tleehharut diroge.» Lawaalmoowós kudá' iri hunguú/ siiwaadár kilae.

Yesu múk yaariír nguwa hungu/uumiís

¹⁴ Yesu iri hardáh dír doó Petro. Aayór harér Petro gari didí áy, i gawaá qatani, i tíq ga/atanto.

¹⁵ Yesu dákw aayoodá' guri kwatiít. Ga/atanto iri hungú/, iri tleér, guri sagadiyús.

¹⁶ Qoomár tsiindoowo múk yaariír oo neetlaame aa eér kuna huwahuúw dír Yesu. Inós neetlaameedá' gari hingeemiís ar /aymi'iiwós, muu sleémeero oo tiqtír dimbadimbé koóm guri hungu/uumiís.

¹⁷ Asma /aymuudá' aarusmo Isaya aa oó' iwa boo/i, kudá' iwa káh, «Inósuú kilá' slaqwaatlakweerén gana óh, nee tiqtirén gari gagaár.»

Múk Yesu gu eehartá wa slaá'

¹⁸ Yesu ngiwa ár adór boo/oó yaariír oo muu ngura harweér, eeharuuseerose gari ádbáy tawa waaraahhi gayuú hatlá' oo tlawi.

¹⁹ Intsaahhatusmooko wák oo hara'ayár Mose guri i daqáy guri báy, «Intsaahhatusámo, án kuúng u eehár umuúqo dír ta keera.»

²⁰ Yesu iri oó', «Intsaawe i mar'ór koón, nee tsir/o i maray'ín koón, ala Garmoó Hee tam dír sagós nguy qaasi i káhh.»

²¹ Eeharusmoowós oo hatlá' ina oó', «Aáko, ala ya/aám, baabuúeé' ngu ala foól.»

²² Ala Yesu guri báy, «Án eeharáng. Mawaagáy múk adór tu'u, tuaá muk'ín ngi foliitiye'.»

Yesu tlawi ngiwa xasltís

²³ Yesu iri tsa/án gawaá miringamo, eeharuuseerós guri eehát.

²⁴ Naxés fur'a tlawi gana ló'wa leexwaanduúr, tam ma'aay niri tsifaqamiitiyé' baraá miringamo. Ala Yesu qoomaadae aa guú'.

²⁵ Eeharuuseerós guri i daqeér, guri tlés, guri beér, «Aáko, atén ti ba/amis, aga qwaaraán.»

²⁶ Giri báy, «Mas da'ayuumitá', kuungaásingá' haratlintaao niina.» Siiwadár kilae iri tláy, fur'a nee tlawto giri iigahhaát, umuúqo gaaro iri xaslít.

²⁷ Mukdá' iri waa/oó/, tari oó', «Heewí a heé adoomá, asma tam fur'a nee tlawto ngun ilaiwawa/iyá'.»

Yesu múk neetlaame aa eér koóm nguwa hungu/uús

²⁸ Yesu iri gayuú hatlá' oo yaaeérií waaraáhh amór yaamaá múk Gadara. Tiri doogiyé' nee múk tsár oo neetlaame aa eér, i amór /aantaá dahhiyá'. Slám a múk xaraásl. Tam hee waarahhamuú loohidá' gu qiitliiká.

²⁹ Mukdá' iri tseé', tari oó', «Garmoó Mungú, atén nee kuúng a milá? Nina hardáti as atén tiwa slahh'eemis dír qoomaarén ira xeeriiká?»

³⁰ Daqtaka yaariir ar baynu i deer ar qaw, dir'ín tidae ka saaw.

³¹ Neetlaameedá' Yesu guri harhheehhe'és, iri ó', «Atén birta gús, ti meer, atén a dahamaá awaán baraá daqtaqár baynu.»

³² Gari báy, «Tlawsé'.» Tari ti'iít, tari dahamaá áy baraá baynuudá'. Naxés daqtadár baynu sleémeero iri /e/eetiín ar ti'iingw ay baraá tlawi, iri baraá ma'áy qátl.

³³ Ala de'eemuusér baynuudá' iri ta'aiín ay baraá gixsa. Kangwdá' sleémeero kuri alki/iít, nee oo neetlaameedá' sleeme.

³⁴ Múk gixsadá' niri ti'iít as Yesu kuwa artá ay. Qoomár kuwa ár, kuri harhheehhe'eés iwa quutli baraá ayaaine.