Matayo 7 - Biblía Axweesantá Hhohho' ar Mungú 2004

Muu mu sakwasleemuutara'

¹ «Muu mu sakwasleemuutara' as kuungá' mutunduwa sakwasleemuút.

² Asma sakwasleemadá' kuungá' muu kur sakwasleemuta', kingi kuungár sakwasleemuut. Harqoomaydá' tar qoomeemesa', kungu dirhúng i qoomeemees sleeme.

³ Kuúng mas suwito'ór baraá iltá heewók an ara'aán, ala waaqaasír baraá iltók a tsatsahhaandaaká?

⁴ Laqaá adór heewók kur beer, ‹Xáda, suwito'oosír baraá iltók án ngi hingeés›, bar waaqaasi i baraá iltók i dirí'.

⁵ Kuúng adoosinge a hhaahhafusmo. Waaqaasír baraá iltók ala geerií hingeeseek, daqaní suwito'oodár baraá iltá heewók i dirii' a tsaahha hhe'és nee kawa hinges.

⁶ «Gár hhoohhoo' ma seeaawérií haniisara', asma inooín kuungá' nun harawarqayá' nuri kikiihhiyá'. Slám miisli ma baynuú i kwakwaahhara', asma inooín mingiwa yaamií adaraahiyé'.»

Firo

⁷ «Firiiriimé', kuungá' tundu qáy, leelehhiitaak kuungá' a sleerá', ateetimé' afkú dó' wa ale, piindo ka qo duux.

⁸ Asma umuúqo heé firiiriím ku qáy, nee kudá' leelehhiít ga sláy, nee kudá' afkú doó wa ateetiím, piindo ka qo duux.

⁹ Baraá tla/angwhunge hee i deéro oo na/aywós gu tlaa/anoó i haniís mukatmo burngwa firín?

¹⁰ Laqaá siyó burngwa firín, dayshamo gu haniísi?

¹¹ Ala bar kuungaásingá' tlakw muruú hhó' u xuá' kuwa na/iihúng i hanmisa'. Xáy, Baabuúhúng oo gawaá doorí dirií' i ak waaraáhhiíke muruú hhó' nguwa haniisi dír kudá' inós ngu firiiriima'a.

¹² «Gawaá adoorihe umuúqo gaaro ar kuungá' ta sla'a' muu ni kuungií tleehhi, kuungá' adoodá' tleehhaak sleeme dir'ine. Asma hara'ayár Mose nee gooír aaruuse adoorí gan kát.»

Afkú iiraákw

¹³ «Daraahé', afkú iiraákw ar oohaak, asma afkú iintlaáxw nee loohír iintlaaxw in baraá qwanoó kayá'. Nee múk loohidá' ga óh ku úr.

¹⁴ Ala afkú iiraákw nee loohír iiraakw in baraá slafíngw kayá'. Nee múk loohidá' ga sláw ku niiná.»

Xa'ano nee mamuuwós

¹⁵ «Ti harmagahhe' dír aaruusér lamuuseero, inooín birni amorhúng kayá' tlabaá bee/aangw nga tsiitiyé', ala laatí baraaine a taweruú xaraásl.

¹⁶ Múk adoorí uqo tsahhá' ar tlehhmi'ii'ín. Xáy, muu sabiíbu gu gawaá xaa'aá laqayaá wa buaaína? Laqaá /aantsí ka gawaá xaa'aá laqayaá wa buaaína?

¹⁷ Gawaá adoorihe umuúqo xa'anoó hhoó' mamaá hho' gin laqwaal. Nee xa'anoó tlaákw mamaá tlakw gin laqwaal.

¹⁸ Xa'anoó hhoó' mamaá tlakw gi laqwaaliiká. Slám xa'anoó tlaákw mamaá hho' gi laqwaaliiká.

¹⁹ Umuú xa'anoó mamaá hhó' gi laqwaliimaaká, kun tsaat, kway baraá ásltí kwaahh.

²⁰ Gawaá adoorihe kuungá' mukdaádá' u tsahhá' ar tlehhmi'ii'ín kudá' ta tlehhiiti.»

Án kuungá' nu baloó xuaaká

²¹ «Heé aní tawó babáw, ‹Aáko, Aáko,› i dahiiká baraá waawuti'iimár dooriiwo. Heé dáh a kudá' sla'aarír Baabuúeé' oo gawaá doorí dirií' ga tlehhiít.

²² Baldá' múk yaariír aníng i bay, ‹Aáko, Aáko, atén aga ariirimániíke ar umuuwók, nee neetlaame aga gusisimániíke ar umuuwók, tam muruú yaariír oo waa/oo/amo ugwa tlehhiitániíke ar umuuwók, kudá' naa aténií hanís.›

²³ Aluuwo án ngiri baw ar gwa/aateema, ‹Án kuungá' nu baloó xuaaká. Quutlé' dir'eene, kuungaásingá' muruú tlákw tlehhahhitá'.› »

Maraá tsár

²⁴ «Umuúqo heé axweesanay'eé' kwí gwa axaas nee adoodá' i kaahi gay tleéhh, a slaqás nee heé fuqurángw koóm, oo do'ós gwa tleehh gawaá daanduú tlaa/a.

²⁵ Tluwaay iri tluúw, yau niri wa/iyé' amór dó' i alé, nee fur'a guri i fukuukú', ala do'dá' aa huuiiká, asma koo/irós kaa tleéhh gawaá daanduú tlaa/a.

²⁶ «Nee heé axweesanay'eé' kwí gwa axaas, ala adoodá' i kaahi gay tleehhiiká, a slaqás nee heé daktani, oo do'ós gwa tleehh gawaá daanduú hhasaangw.

²⁷ Tluwaay iri tluúw, yau nay wa/iyé' amór dó' i alé, nee fur'a guri i fukuukú', do'dá' guri diingís iri huú'. Nee adór do'dá' ira huú' ka ló'wa slasla/aar.»

Aleesleemuú Yesu

²⁸ Qoomár Yesu muruuwí kaahaango nguwa hhe'eés, boo/oó yaariír oo muu ina waa/oó/ ló'wa aleeró asma intsaahhatimisuuwós.

²⁹ Asma gina intsaahhatimís adór heé aleesleemuú koóm, tam a adór intsaahhatuusér hara'ayár Mosewooká.