Matayo 4 - Biblía Axweesantá Hhohho' ar Mungú 2004

Yesu kuwa iiaraa'ár

¹ Yesu kuri huúw nee Qeeruú hhoohhoó' oo Mungú ay baraá darma, as kuwa iiaraa'ari nee Neetlaangw.

² Iri gwaawín deelo mibeeri tsiyáhh, tlaatla/aangw nee xweeraawo, iri qwariít.

³ Neetlaangw guri i daqáy, guri báy, «Kuúng barqo Garmoó Mungú, tlaa/anoowí i ilawatseek i muruú /ayma tleehhiti.»

⁴ Ala Yesu iri oó', «Kaa gooín, ‹Hee gár ir slafi a muruú /ayma kiloseeká, ala aqo har umuúqo axweesantá amór Mungú daahh.› »

⁵ Yesu kuri huúw nee Neetlaangw ay baraá Gixsár Hhoohhoo' ar Yerusalemu, guri qaás gawaá tsintá Doó Mungú.

⁶ Guri báy, «Kuúng barqo Garmoó Mungú, ti yaamií kwahh, asma kaa gooín, ‹Malaykeerós ngi amoorók i ya/aaw.› Nee sleeme kaa gooín, ‹Kuúng u gagát ar dabaaín, as yaaeerók tlaa/a mingiwa tunqalá/.› »

⁷ Yesu guri báy, «Ala tí sleeme kaa gooín, ‹Aakoó Munguúwók mu iiaraa'araar.› »

⁸ Neetlaangw Yesu guri malé gáwtí tsa/aás gawaá tloomár ló'wa tleer, guri waawuti'iimár yaamií laqán sleémeero, nee xirfuuwose,

⁹ guri báy, «Muruuwí sleémeero aníng ngu kuúng i haniís, aníng bira i tumbararaa'át iri sluufmís.»

¹⁰ Yesu iri oó', «Neétlaangw, quútl. Asma kaa gooín, ‹Aakoó Munguúwók na sluufmiseek, nee inós kilós ku sagadiyús.› »

¹¹ Aluuwo Neetlaangw iri quútl dír Yesuwo malayke nay hardát, Yesu guri sagadiyús.

Yesu gadiyeérós ngiwa iimu/ún baraá Galilayaro

¹² Yesu ngiwa axaás adór Yohane kura tseék, iri kií/ ay yaamaá Galilaya.

¹³ Iri gixsár Nasaretír wa lóh iri hotángw áy gixsár Kapernaumu. Kapernaumu a gixsár afaá tlawtá Galilayár i dirii', baraá yaamaá Sebuluni nee Naftali.

¹⁴ Adoorí ina tleehharút asma /aymuuwí aarusmo Isaya aa oó' iwa boo/i, kudá' iwa oó',

¹⁵ «Yaamaá Sebuluni nee yaamaá Naftali, yaamaá bihhaá tlawtí tseew, gayuú Yordani, Galilayár bartá xoordaá hatlá',

¹⁶ mukdá' aa hoot baraá giwtír wa ale gwa/aateemaá ur kaa ár. Nee kudá' naa baraá yaamaá geehhaantamoó gwa'arár wa hootiye', gwa/aateema ngaa i gwa/aatiyé'.»

¹⁷ Iimír qoomaadá' wa tleemu Yesu axweesantá Mungú gari iimu/ún dahareemisuuwo, iri káh, «Hhu'u'umé' asma waawuti'iimár doori naa naká/.»

Yesu múk tsiyáhh oo siyoó ohahiím nguwa ateét

¹⁸ Qoomár Yesu iwa afaá tlawtá Galilayár wa hi'iimiti, hha'aá tsár gina ár. Kooko a Simon, kudá' ta babay Petro, nee hhiyaawós Andrea, ta baratsufoó kwakwaahh baraá tlawi, asma tawa inooín a múk siyoó ohahiím.

¹⁹ Yesu giri báy, «Qwalaasé', án eeharaaré', án kuungá' nu intsaahhatís adór muu ngur amor'eé' huwahuba'.»

²⁰ Siiwadár kilae baratsufay'ín nguri geexayé' Yesu kuri eehár.

²¹ Yesu iwa geerií kumiít hha'aá tsár awa hatlá' giri ár. Inooín a Yakobo nee Yohane, daaqoó Sebedayo. Inooín ta baraá miringamooín i dirii' dinkwa nee baabuúín Sebedayo, ta baratsufay'ín amohhe'eemiis. Giri ateét.

²² Hamtidár kilae miringamooín nee baabuúine kiri geexáy, Yesu kuri eehár.

Yesu boo/oó yaariír nguwa sagadiyuús

²³ Yesu ina hi'iimiít baraá yaamaá Galilaya sleémeero, iri baraá maraá saalíngw wa intsaahhatimís, nee Ya/abtór hho' ar waawuti'iimár Mungú gari alki/iít. Múk tiqtuuse guri hungu/uumiís nee kudá' slaqo tlakwen sleémeero.

²⁴ Kaangós iri tsiyaayaaxaát baraá yaamaá Shamu sleémeero. Múk tiqtír dimbadimbé kunguri huúw dirós i alé, nee kudá' slahh'amuú koomá', nee múk neetlaame aa eér, nee múk /araraám, nee múk tiqtír sol'omit, sleémeero giri hungu/umiís.

²⁵ Yesu kway eehár nee boo/oó yaariír oo amór Galilayár daáhh, nee yaamaá Dekapoli nee Yerusalemu, nee yaamaá Yudea nee gayuú Yordani.