Matayo 3 - Biblía Axweesantá Hhohho' ar Mungú 2004

Alki/ituú Yohanedá' Baatimaamiís

¹ De'emaadae Yohanedá' Baatimaamiís nina hardáh, axweesantá Mungú gana alki/iít baraá darmuú Yudeár wa ale, iwa kaahi,

² «Hhu'u'umé', asma waawuti'iimár Mungú naa naká/.»

³ Asma Yohanewí an kudá' kangós taa axweés nee aarusmo Isaya iwa kaahi, «Afór hee iiárií qaasaak ar tseeamiim baraá darmuú wa ale, ar kah, ‹Loohír Aako amohhe'eesaak, nee waarahhmawós gan'aasaak.› »

⁴ Yohane tlawuú aa tsiít kuna tleéhh ar se'éngw angamía, nee afetloowós a himuú kaahari, nee muruú /aymaarós a ingigi nee danuú darma.

⁵ Múk Yerusalemu nee yaamaá Yudea sleémeero nee yaamaá bihhér Yordani kuri i daqáy.

⁶ Tlakweemaaín kiwa hhu'uu'ún, giri baatimiís baraá yaaér Yordanír wa ale.

⁷ Múk yaariír oo Farisayo nee oo Sadukayo kuna i daqáy, as ngiwa baatimiisi. Ala Yohane ngiwa ár giri báy, «Kuungá' xwaylár dáyshe, heé kuungá' naa gurbuu' sakwasleemár hi'iit kawa ilagogoba'?

⁸ Tlehhma'aá hhu'u'ungwhúng ngu laqaqamá' na tleehhaak.

⁹ Slám ma baraá munerhúngií kaahara', ‹Abrahamu a baabuúrén.› Án a kah, Mungú ga aleesláy tlaa/eeká' ngiwa na/aá Abrahamu tleehhi.

¹⁰ Hám tsawo kaa qaroó qaás baraá gam'ér xaai. Gawaá adoorihe umuúqo xa'anoó mamaá hho' gi laqwalimaaká, ku tsaat, kway kwaahh baraá asla.

¹¹ Ar ló', aníng gár kuungá' nur baatimiis a ma'aay as tawa hhu'u'uundé'. Ala kudá' aluueé' wa hardáh, inós i /uuruú kón ta aninge. Tam aníng a hariimaaká ya/ataawós ngiwa gagaar. Inós nun baatimiis ar Qeeruú hhoohhoó' oo Mungú nee ar asla.

¹² Iimpeerós ar haritleemis ga kón, nee dirós tidár haritleemis ga fiitsa hhe'ees, nee balaangw guri baraá kuuntír i qaas, ala muundáy gun daa/ ar asltá baloó gwaa'aaká.»

Yesu kuwa baatiís

¹³ Qoomaadae Yesu nina tláy amór Galilayár wa aleeró ay amór Yordani, dír Yohane, as kuwa baatisi nee Yohane.

¹⁴ Ala Yohane aa lak ya/aniká, iri oó', «Án gár ni slaa' bar án kuúng in baatís, adór kuúng nir amor'eéní hardat?»

¹⁵ Yesu iri oó', «Adoorí na ya/aameek, asma gár atén tiwa hariím, tí an tleehhaán as gan'amuú Mungú kuwa boo/eesaan.» Yohane iri ya/án.

¹⁶ Yesu baatisaro kuwa hhe'eés, hamtidár kilae iri baraá yaaér wa ti'iít. Doori nay gweeritiyé', Qeeruú Mungú guri ár iwa gawaawós i awdiiti adór hhookír wa ale.

¹⁷ Afo nay gawaá doorí wa ilawáts iri ó', «Kwí a Garmaaeé', sla'aarusmooeé' oo aníng iga qwal/atis.»