Matayo 28 - Biblía Axweesantá Hhohho' ar Mungú 2004

Yesu niwa waasleé/

¹ Tam deelór Sabaáto iwa fák, matlaatlér boo/ ar deelór Jumapiíliro, Maria Magdalene nee Maria tidár tsár tana /aantár qaytsuú áy.

² Kunseelír ur niri hardát. Asma malaykamoó Aako nina aweér gawaá doorí wa aleeró. Inós tlaa/adá' gari gwangwaraá' gawaá afkú /aantaaro, iri gawaadí iwiít.

³ Gitsee/aá malaykamoodá' a adór mankari, nee inqwaruuwós ku ló'wa /awák adór tlaa/aá tluwaay.

⁴ Askaáridá' /aantár xuum malaykamoodá' guri da'ayút, tari slar/amiít, tari adór múk aa qaatl.

⁵ Malaykamo /ameenadá' gari báy, «Kuungá' ma da'ayumitaara'. Aníng a xuú' heé kuungá' ta leelehhita' a Yesu, kudá' taa kikií' gawaá msalaába.

⁶ Diirihe i kaahh, asma aa qaroó waasleé/ adoodá' inós ngira oó'. Qwalaasé', dír kway qaatiís artá awaare'.

⁷ Kuungá' tlawsé' ar gaanslaay, eeharuuseerós ka beera', ‹Aa waasleé/ baraá múk aa qaátl wa ale. Hamí inós aa geerií tláy Galilayár i alé. Amoodae u aandá'.› Hám daxta naa ádbáw.»

⁸ Tari tláy ar gaanslaay dír /aantár wa ale, ar dae nee qwal/uú úr. Tari ta'aaín, eeharuuse kari ádbeemuú áy.

⁹ Naxés Yesu nee inooín tiri doogiyé', iri oó', «Laawaay.» Tari dirósí tseewúy, kuri ya'a' óh, kuri i tumbarara'aát.

¹⁰ Yesu iri oó', «Ma da'ayumitaara'. Tlawsé', hhaee'eé' ádbawaak, i Galiláyár i tlaye', amoodae aníng i ariyá'.»

Alki/ituú askaáridá' aa xuun

¹¹ Qoomár /ameenadá' iwa tleér, askaáridá' /aantár xuum bahh'alé tari hardáh baraá gixsa. Muruudá' sleémeero aa tleehharuut kuri xu'utís dír kaahamuusér uren ar Mungú.

¹² Tari burumburiít dinkwa nee bariise, tari al'axweés. Askaári kari peésár yaariír i haniís,

¹³ kari báy, «Kuungá' ta oa', ‹Eeharuuseerós nina hardát xweeraawo, guri fís qoomár atén tawa guaán.›

¹⁴ Ala kaangwí ga/aawusmo burngwa axaás, daqaní atén nee inós a axweesaán. Kuungá' ma da'ayumitaara' kangwsinge.»

¹⁵ Askaáridá' peésar'ín gari ót, adoodá' kaa báy gari tléhh. Gawaá adoorihe axweesanaydá' iri tsiyaayaaxaát dír múk Yahudiro tam ay laarí.

Ya/abtór kudaá mibaá nee wak

¹⁶ Eeharuuseedá' mibaá nee wak iri tleér ay yaamaá Galilaya, ay dír tloomadá' Yesu aa dir'ín i hara'ayín.

¹⁷ Inooín Yesu kuwa ár, kuri i tumbarara'aát. Ala bahh'alé baraaine nina xuruumitiyé'.

¹⁸ Yesu giri i tseewúy, giri báy, «Aleesleemu sleémeero oo gawaá doori nee oo baraá yaamu kunga aníng i haniís.

¹⁹ Gawaá adoorihe tlawsé', xoordu sleémeero eeharuuse tleehhaak, ki baatimisá' ar umuú Baabá nee oo Garma nee oo Qeeruú hhoohhoó' oo Mungú.

²⁰ Muruudá' sleémeero naa kuungií intsaahhatimís, dir'ínií intsaahhatisak ku oohi. Ga/aawaak aníng a dinkwa nee kuungá' deelo sleémeero ay alhhe'eesoó yaamu.»