Matayo 27 - Biblía Axweesantá Hhohho' ar Mungú 2004

Yesu kuwa huúw dír geeraá Pilato

¹ Looa niwa tleér kaahamuusér uren sleémeero ar Mungú nee bariisér múk Yahudi tari al'axweés adór ta laqi daanduú Yesuwo as kuwa gaasi.

² Yesu kuri tseék, kuri huúw ay amór Pilato, ga/aawusmoó taa qaás nee múk Roma.

Gwa'arár Yuda

³ Qoomár Yuda, kudá' Yesu gwa sakii/, ngiwa ár adór Yesu kura qaroó sakwasleemuút, iri gurhaamuút. Shilingidá' mibeeraá tám gari ki/ís dír kaahamuusér uren ar Mungú nee dír bariise,

⁴ giri báy, «Aga dakuús, asma heé tlakweemaá koomaaká nguwa sakií/.» Inooín tari oó', «Gár atén ti huuw gawaá tisinge a milá? Kangwsíng a kók.»

⁵ Peésaadá' gari kwaáhh baraá Doó Mungú, iri tláy, tiri tareereé'.

⁶ Kaahamuusér uren ar Mungú peésaadá' gari léhh, iri ó', «A hariímarooká peésaarí kawa qaasaan baraá sandakmoó ilahhooa, asma a peésár tseere.»

⁷ Tari al'axweés, Qaymór tleeusmo kari tlaáxw ar peésaadá', tawa dír folituú dahaaye.

⁸ Gawaá adoorihe qaymoodá' kari báy «Qaymór tseere» tam ay laarí.

⁹ Gawaá adoorihe /aymuudá' aarusmo Yeremia aa oó' iri boó/, kudá' iwa káh, «Shilingidá' mibeeri tám kari taataáhh. Qoomaywí a kudá' taa axweés nee múk Israeli tawa tlaxór heedaádá'.

¹⁰ Qaymór tleeusmo kari tlaáxw ar peésaadá', ar adór Aako ngira hara'ayín.»

Pilato i Yésú yaahamiis

¹¹ Yesu iri sihhiít dír geeraá ga/aawusmo. Ga/aawusmo Yesu guri yaahaás iri oó', «Kuúng a waawutmoó múk Yahudíro?» Yesu iri oó', «A adoosíng kuúng ta kat.»

¹² Ala qoomár kuwa sakwasleemuút nee kaahamuusér uren ar Mungú, gár aa oó' i káhh.

¹³ Pilato iri oó', «Kuúng a axamisakáhe mura' a magá' oo tindi daanduuwók i kaahi?»

¹⁴ Ala Yesu tam /aymuú wák gwa tlaxwiiká. Tam ga/aawusmo iri ló'wa waa/oó/.

Kwasleemár Yesu kuwa gaasi

¹⁵ Umuúqo deelór Pasaákuwo ga/aawusmo heé wák gun gweer baraá múk taa tsegiiti, heedá' muu i gweerár wa slai.

¹⁶ Deeloodae heeko taa tseék i deer, inós a heé taa xuú' nee muu, umuuwós ku babay Baraba.

¹⁷ Boo/aydá' iwa burumburiít, Pilato iri oó', «Heé ta sla'a' a gaalá, Barabáwo laqaá Yesu, kudá' ta babay Kristo?»

¹⁸ Asma inós gaa xuú' adór gár Yesu kungu sa duúx tar da/i.

¹⁹ Nee Pilato iwa iwiít gawaá kitaangós kuduú kwasleema, hareerós hee nguri ya/áp, guri beér, «Kángw heesíng gan'amuú koóm mu i dahaar. Asma laarí xweeraawo aníng tina slahh'eemaamiís ar baraá tlata as inós.»

²⁰ Kaahamuusér uren ar Mungú nee bariise boo/aay kuri harakeemiís as Baraba kunguwa duuxi, nee Yesu kuwa gaasi.

²¹ Ga/aawusmo iri oó', «Heé ni gweer baraá mukwí tsare a heemá?» Tari oó', «A Baraba.»

²² Pilato iri oó', «Ala Yésuuwí ta babay Kristo án adór ngu laaq a adoomá?» Sleémeero tari oó', «Kikieek gawaá msalaába.»

²³ Pilato iri oó', «Asma milá? Gár aa tlakweés?» Boo/aydá' tsimaahhiro iri ak buúhh, tari oó', «Kikieek gawaá msalaába.»

²⁴ Qoomár Pilato ngiwa ár gár i bui i káhh, ala a tsimaahhi in tlahhaatláhh, ma'aay giri taataáhh, dabaawós giri hamaátl dír geeraá múk wa ale, iri oó', «Aníng tlakweemaá ni koom i kahhiyá' gawaá daanduú heewí gan'amuú kooma. Ala kangwsíng a koohúng.»

²⁵ Muu sleémeero iri oó', «Tseereerós atén nee na/iirene ti i ki/.»

²⁶ Pilato Baraba guri gweér. Nee Yesu muxtár qaw'iwo nguwa hhe'eés, guri dabaaín i qaás as kuwa kikii'i gawaá msalaába.

Askaári Yesu nguwa niqiín

²⁷ Yesu kuri huúw baraá boómár ur nee askaárír Pilato. Nee askaárír yaariir guri i burumburít.

²⁸ Inqwaruuwós kuri duúx, kuri tsiitiís ar inqwaarír sirdaa/aat.

²⁹ Slamángw laqaya' kuri tlaatlaáw, kuri dahaás gawaá sagós. Daai kari haniís dákw doó /iyáy i alé. Tari tseeamín geeraawós wa aleeró kuwa niqimisi, tari káh, «Waawutmoó múk Yahudi, laawaay.»

³⁰ Kuri i nitsimiít, daaidá' kari gawaá dakós wa taataáhh, kuri saga muúx.

³¹ Niqimisuuwo kuwa hhe'eés, inqwaaridá' kari hingeés, kuri inqwaruuwósuú kilá' i dahaás. Kurir tláy, kuri kikiiár áy gawaá msalaába.

Yesu kuwa kikií' gawaá msalaába

³² Qoomár tawa ti'imiiti, heeko kuri ár oo yaamaá Kirenér daáhh, umuuwós a Simon. Heewí kuri harakeés as msalaábár Yesu ngiwa gagaari.

³³ Tawa hardáh dír ta babay Golgota, gídaabárós a «Fartá saga»,

³⁴ difaáír taa garka qarqaárár aleedoók kari haniís. Ala ngiwa tsaáq, gay sií' wahto.

³⁵ Kikiiaro kuwa hhe'eés, inqwaruuwós kuri qasmiís ar loohír tsawdo.

³⁶ Tari iwiít yaamií alé as kuwa xun.

³⁷ Nee gawaá ságw msalaábarose gadá' kusa sakwasleemuút kari gooín tidá' kah, «Heewí a Yesu, waawutmoó múk Yahudi.»

³⁸ Qoomaadae mukko tsár oo fisuuse kuri al kiki'ín nee inós, oo wák dákw doó /iyáy, nee kuqá' dákw doó basáy.

³⁹ Múk loohidae waraáhh Yesu kuri tloqmiís ta hara sager'ín muumukuumiis,

⁴⁰ ta kaahi, «Kuúnguudá' Doó Mungú gu feé/, nee kuri tléhh deelo tame, ti kilók alee/is, kuúng barnaxes aqo Garmoó Mungú, aweeráng gawaá msalaábaro.»

⁴¹ Slám kaahamuusér Mungú guri niqimís, nee intsaahhatuusér hara'ayár Mose, nee bariise, kuri babáy,

⁴² «Múk hatlá' guna alee/iimiís, ala inós kilós alee/iisaro ti aleeslayká. Inós a waawutmoó múk Israeli. Axáy, i aweeri gawaá msalaábár wa ale hamír kilá', daqaní atén u haratlintiaán.

⁴³ Inós Mungú gu haratlintatii'. Barnaxes Mungú inós ngu slaa', ngu ba/amisi hamí. Asma inós ina aaín, ‹Aníng a Garmoó Mungú.› »

⁴⁴ Slám mukduú fisuuse oo nee Yesu taa al kiki'ín, nguna adoodár /ooslisliné' sleeme.

Gwa'arár Yesu

⁴⁵ Looár lahhoó' iwa xeér, iimi iri gíp yaamu sleémeero ay looár gwaleél.

⁴⁶ Looár gwaleele Yesu iri tseé' ar afór ur, iri oó', «Eloi, Eloi, laama sabaktani.» Gídaabárós a «Munguúeé', Munguúeé', án misa geexeér.»

⁴⁷ Múk didaádí dirií' bahh'alé adoodá' ngiwa axaás, tari oó', «Heewí i Eliyá ateetín.»

⁴⁸ Hamtidár kilae heeko wák dir'ine iri ta'aaín, warqamooko guri tikiís maraá difaáír qarqaar gari siíhh gawaá afkú daai, Yesu guri wahaás ar warqamoodá'.

⁴⁹ Ala múk hatlá' iri oó', «Lakiité' u araán, axáy Eliya ngu aweeriisár áya?»

⁵⁰ Yesu iri malé tseé' ar afór ur, iri tsatiít.

⁵¹ Inqwaarír baraá Doó Mungú, ar do' gwa qasis, iri tla/a feehhít gáwtá wa ale ay baraay. Yaamu nay daaraxaatiyé' as kunseeli, tla/u nay feehhamitiyé',

⁵² /aantu nay kisiitiyé' nee múk yaariír oo hhohhó' oo aa qaatl nari waasleé/,

⁵³ baraá /aantu ngay geexáy. Nee alaá Yesu niwa waasleé/ niri dahiyé' baraá Gixsadá' Hhoohhoo' nee múk yaariír giri araa'ár.

⁵⁴ Geeraharusmooduú askaári nee mukdá' Yesu xuuma, kunseelidá' kawa axaás, nee muruudá' aa tleehharuuti, tari ló'wa da'ayuút, tari oó', «Ar ló', heewí a tsuwá Garmoó Mungú.»

⁵⁵ Nee /ameenarka yaariir i amorqá' saáw wa xumís. Inooín an kudá' Yesu ngwa eehariye' amór Galilayár wa ale, nee nguri sagadiyusiyé'.

⁵⁶ Baraaine heé dáw a Maria Magdalene, nee Maria aayór Yakobo nee Yosefu, nee aayór doó Sebedayo.

Foolár Yesu

⁵⁷ Qoomár tsiindo niwa xayé', heeko daqaarmo nay hardáh. Inós a heé yaamaá Arimataya. Umuuwós a Yosefu. Nee slám inós a eeharusmoó Yesu.

⁵⁸ Heewí ina dír Pilato káy as slaqwtá Yesu ngiwa firin. Pilato iri ya/án.

⁵⁹ Yosefu slaqwtá Yesu gari aweeriís, gari untsuús ar inqwaarír /awaak.

⁶⁰ Gari qaás baraá baa'aarós ar /aben, tidá' aa foól gawaá tlaa/a as inós. Tlaa/ár yangaariir gari gwangwaraá' gawaá afkú /aantaadá' i aleeró, iri quútl.

⁶¹ Ín Maria Magdalene nee Maria tidár tsár i didá' wa iwiwiitiyá', ta amór /aantaadá' ga/áy.

Askaári i /aantár Yésú xuún

⁶² Tam bál tsár, baalaadár alaá deelór amohhe'eemisuú deelór ur ar Pasaákuwo kaahamuusér uren ar Mungú nee múk Farisayo Pilato kuri i burumburiít,

⁶³ tari oó', «Aáko, aga inslawaán adór heedaáduú al/aymusmo qoomár iwa slafi ira oó', ‹Deelo tám bira waaráhh án ni waasleé/.›

⁶⁴ Gawaá adoorihe hara'aya haniseek /aanta ka xun ay bál tám. Aluuwo eeharuuseerós munguwa fiisór eér, nee muu guri beer, ‹Aa waasleé/ baraá múk aa qaátl wa ale.› Al/aymár alhhe'eesaay tidár geera gari bá/.»

⁶⁵ Pilato iri oó', «Askaári a koondá'. Tlawsé', /aanta xuumaak adoodá' kar xua'.»

⁶⁶ Tari tláy, duguno kuri qaás gawaá tlaa/adá'. Askaári kari qaás as /aantadá' ngiwa xuun.