Matayo 26 - Biblía Axweesantá Hhohho' ar Mungú 2004

Ta loohír leelehhiit ar Yesu kur oohi

¹ Yesu axweesanaywí sleémeero ooaro nguwa hhe'eés, eeharuuseerós gari báy,

² «A xuá' deelo tsár bira waaráhh, a deeloodár ur ar Pasaáka, nee Garmoó Hee ku sakii/ as kuwa kikii'i.»

³ Qoomaadae kaahamuusér uren ar Mungú nee bariisér muu tari burumburiít baraá afeenír doó kaahamusmoó Mungú, kudá' umuuwós ta bay Kayafa.

⁴ Tari dinkwár wa axweés as Yesu kuwa qawti oohi, nee kuwa gaasi.

⁵ Ala tari oó', «Adoosíng a tleehhanaaká baraá deeloorí ure, as muu muwa tlaahhírár awaán.»

Yesu kuwa Betaníár wa sliík ar mooyaangw

⁶ Qoomár Yesu iwa Betaniár i dirii'i, dír doó Simonidá' tiqtír tsatimituú koóm,

⁷ /ameenirka nina hardát. /Ameenidá' i chupiito'ór mooyángw koón, Chupiito'oodá' kana tleéhh ar tleeír ta bay Alabasta. Mooyangwdá' tlaxoorós ka ur. Iri tseewuúr dír Yesu, chupiito'oodá' gari gawaá ságw Yesú ii ku'ús, qoomár Yesu iwa dír muruú /aymár i dirii'i.

⁸ Eeharuuse adoodá' ngiwa aán, iri búhh, iri ó', «Gár mooyangwqá' kus adooqár hhitin a milá?

⁹ Asma bar geera kwaa weeriís, peésár yaariir ga sláy, kari haniis dír liitlakuuse.»

¹⁰ Yesu axweesanay'ín nguwa tsaáhh, iri oó', «Asma milá /ameenirí mas daawitimisá'? Gadiyeérí naa aníng i tléhh ka hhoo'.

¹¹ Asma liitlakuuse nee kuungá' a dinkwa umuúqo daqto, ala án nee kuungá' umuú baalaaro a dinkwaarooká.

¹² Inós mooyaangw nguna ku'ús gawaá slaqwte'eé', as slaqwte'eé' ngiwa geerií slik, as amohhe'eesár bál foolar'eé'.

¹³ Án a kah, umuúqo diiro ar Ya/abtór hho' kawa alki/iiti baraá yaamu sleémeero, tí /ameenirí aa tléhh sleeme ka alki/iit as inslaslaangós.»

Yuda iwa ya/án Yesu nguwa saki/i

¹⁴ Eeharusmoó wák baraá kudá' mibaá nee tsare, oo ta bay Yuda Iskarioti, iri hardáh dír kaahamuusér uren ar Mungú.

¹⁵ Iri oó', «Án barnaxes ngu dirhúng i sakií/, gár ni hanisa' a milá?» shiliíngi mibeeri tám kay dirósí haniís.

¹⁶ Iimír qoomaadá' Yuda pa/aangw guri leelehhiít oo Yesu ngur saki/i.

Yesu nee eeharuuseerós muruú /aymár Pasaáka kuwa dinkwár wa /aáy

¹⁷ Baalár deelór geera ar deeloodá' ur ar Mikaátér taa sluuftisiiká, Yesu eeharuuseerós guri i daqeér guri beér, «Dír kuúng ta sla' a diimá ar muruú /aymár Pasaáka kway amohhe'eesaan?»

¹⁸ Yesu iri oó', «Tlawsé' baraá gixsa, dír doó heeko, ku beera', ‹Intsaahhatusmo i kaahi, Qoomar'eé' naa tseewuúr. Án muruú /aymár Pasaáka u dír do'ók wa /aáy, dinkwa nee eeharuuser'eé'.› »

¹⁹ Eeharuuse adoodá' Yesu ngaa báy gari tléhh. Muruú /aymár Pasaáka kuri amohhe'eés.

²⁰ Qoomár tsiindowo, tawa iwiít dír muruú /ayma dinkwa nee eeharuuseedá' mibaá nee tsár,

²¹ qoomár tawa /ayin, Yesu iri oó', «Án a kah, heé wák baraá tla/angwhunge aníng i sakii/.»

²² Eeharuuse iri ló'wa gurhaamuút. Tiri wakeetiné' yaahamisuwo tawa kaahi, «A anínge, Aáko?»

²³ Yesu iri oó', «Heé nee aníng aga altsaakwaan baraá isaangi, an kudá' aníng i sakií/.

²⁴ Garmoó Hee inqo tawo amór gwa'arár i hi'iit, adoodá' gooi i kat daanduuwose. Ala heedá' Garmoó Hee gu sakií/, hhiintluuwós ku gawít. Inós a tsiní geera bur kwa laqwaaliiká.»

²⁵ Yudadá' Yesu gu sakií/ iri oó', «Intsaahhatusámo, a anínge?» Yesu iri oó', «Kuúng aga ó'.»

Muruú /aymár Aako

²⁶ Qoomár tawa /ayin, Yesu mukatmo guna óh, iri sluufiís, guri parhhamiís, guri eeharuuseerós i haniís, iri oó', «Oohaak, /ayaak, gaarí a slaqwte'eé'.»

²⁷ Xooslmoó wahaangw guri óh, iri sluufiís, guri haniís, iri oó', «Kuungá' sleémeero gaarír baraá xooslmoowí wahaak.

²⁸ Asma gaarí a tseerer'eé' ar alqado, ar ku'uut as múk yaariír as hingeemisuú tlakweema.

²⁹ Án a kah, ma'aá sabiíbu i baloó wahaaká ay baalaadá' awa /aben ngiwa wah dinkwa nee kuungá' baraá waawuti'iimár Baabuúeene.»

³⁰ Tawa hhe'eés daa'ango, tari tsa/án gawaá tloomár xaaiikaari ta bay seituúni.

Yesu tlaankuú Petro nguwa geerií oó'

³¹ Yesu eeharuuseerós gari báy, «Xweeraaká' laarihe kuungá' sleémeero insereehhi nu eér as aníng, nee aníng iri geexeerá'. Asma kaa gooín, ‹De'eemusmoó bee/aangw u slaáhh, nee daqtá bee/aangw iri diyaa/át.›

³² Ala án binda waasleé/, án a geerií tláw Galilayár i alé.»

³³ Petro iri oó', «Tam sleémeero insereehhi ngi eera as kuúng, ala aníng i baloó eeraaká.»

³⁴ Yesu guri báy, «Án a kah, konkomo iwa uui xweeraakaá laarihe, kuúng an iga sagaáwa tám wa satlánk.»

³⁵ Petro iri oó', «Barnaxes gár tiwa hariím a tawa alqatlaan nee kuúng, tam adoorihe u baloó satlankaaká.» Eeharuuse sleémeero adoorí sleeme gari ó'.

Firór Yesu baraá Getsemane

³⁶ Yesu nee eeharuuseerós tari tláy dirka ta bay Getsemane. Eeharuuseerós gari báy, «Diirí iwiitaak, daa aníng a amorqií firór áw.»

³⁷ Petro gurir tláy dinkwa nee daaqaydá' tsár oo Sebedayo. Gurhaamír ur guri iimu/uún, nee iri amoqwaqwadín.

³⁸ Giri báy, «Muunaáeé' gurhaamír yaariir gwa eér ar tsaxwaá gwa'ara. Diirí wa iwiiwitaak, dalaaé' dinkwa nee aníng.»

³⁹ Iri geerií kumiít gár niinawe, giti gari yaamúr óh, iri firín iri oó', «Baabuúeé', barnaxes i ya/aán, qoomaarír slahh'amu aníng i wa pa/. Ala ma tleehhaar ar adoodá' án ngir slaa', na tleehheek ar adoodá' kuúng ta sla'.»

⁴⁰ Yesu iri kií/ dír eeharuuseerós, naxés naa guiyé'. Petro guri báy, «Ahaá, aga aleesleeri'iikáhe tawa dal'a' dinkwa nee aníng tam qoomár niinawe?

⁴¹ Dalaaé', firiiriimé', mutunduwa ar baá/ iiara'aduuwo. Muuná ga mak slaa' ala slaqwa kan daqatlaakw.»

⁴² Yesu iri malé kií/ sagaáwa tsare, iri firín iri oó', «Baabuúeé', barnaxes slahh'amuuwí hingeesaro i ya/anaká, barqo ay dír ngway slaw, sla'aarirók i bo/.»

⁴³ Yesu nay malé kií/, naxés naa guiyé', asma ilaaín naa il'uu'uyé'.

⁴⁴ Yesu eeharuuseerós gari malé didí geexáy, iri tláy iri malé firín sagaáwa tame, /aymi'i aqo kudá' kilá' gina inkií/.

⁴⁵ Yesu iri kií/ dír eeharuuseerós, gari báy, «A kumitá'a gu'uteero as tawa hungu/usa'? Ga/aawaagáy, qooma aa xeér, Garmoó Hee ku qaas baraá dabaá múk tlakuuse.

⁴⁶ Tlawaaré', diirí geexawaare'. Ga/aawaagáy, kudá' aníng i sakií/ naa tseewúy.»

Yesu kuwa óh

⁴⁷ Qoomár Yesu iwa baraá axweesanaydí kahhi, naxés Yuda, oo wák baraá eeharuuseedár mibaá nee tsare, niri hardáh nee boo/oó úr oo muu. I paangadaá koná' nee guhhuli'i. Mukwí amór i dahhi a amór kaahamuusér uren ar Mungú nee bariisér muu.

⁴⁸ Yudadá' Yesu gu sakií/ laya gaa qaro geerií haniís iwa kaahi, «Heedaádá' án ni ma'aas an inós, ku otá'.»

⁴⁹ Siiwadár kilae Yuda niri hardáh dír Yesu, iri oó', «Intsaahhatusámo laawaay!» Guri ma'aás.

⁵⁰ Yesu iri oó', «Mulqámo, tidá' nisa hardát tleehheek.» Mukdá' ngwa oohár ay niri hardáh, Yesu kuri hara /akuút, kuri óh.

⁵¹ Nee heeko wák oo nee Yesu ti koomá', paángarós gari óh, gari duúx baraá qawáy wa ale, lawaalmoó kaahamusmoó úr oo Mungú guri iia tsaát.

⁵² Yesu iri oó', «Paángarók ki/iseek baraá qawaay, asma mukdá' slaáqw ar paangadu, ta qwaar ar paangadu.

⁵³ Kuúng ka xu', aníng Baabuúeé' u aleeslawaakáhe firooro, as slawá mibaá nee tsár ngi ba/a awa malayke, ngiwa haniisi hamír kilá'?

⁵⁴ Ala án adoorí bara tleéhh, adór Gooi ir bo/ a adoomá, tí kah muruuwí gár kuwa hariím aqo in tleehharuut.»

⁵⁵ Siiwadár kilae Yesu boo/aay guri báy, «Ahaá baré ina i haratleeré' ar paangadu nee guhhuli'i, adór múk fisusmoó oohár áw. Umuúqo baalaaro aníng a baraá Doó Mungú wa iwaawiít niwa intsaahhatimaamis, ala kuungá' i uhahinda'aaká.

⁵⁶ Ala tí sleémeero in tleehharút as gooír aaruuse iwa bo/.» Eeharuuseerós sleémeero guri geexeér, iri góp.

Yesu i dír doó kwasleema

⁵⁷ Yesu kuri óh, kway huúw amór doó kaahamusmoó úr oo Mungú kudá' ta bay Kayafa. Diirí an dír intsaahhatuusér hara'ayár Mose nee bariise i burumburít.

⁵⁸ Petro iri amorqá' saáwá magegeamiít iri eeharaarín ay dír afeenír doó kaahamusmoó úr oo Mungú. Iri dáh baraá do', iri iwiít dinkwa nee sagadiyuusér do'dá', as alhhe'eesaydá' nguwa ari.

⁵⁹ Kaahamuusér uren ar Mungú nee múk doó kwasleema sleémeero lamabu'úngw lama kuri leelehhiít daanduú Yesuwo as kuwa gaasi.

⁶⁰ Ala lamabu'úngw taa sláy i kaahh, tam lamabu'uusér yaariir ar lama naa ti'iti. Aluuwo múk tsár niri hardáh,

⁶¹ tari káh, «Heewí ina oó', ‹Án do'wí oo Doó Mungú fee/aro u aleesláw nee nguri tleéhh deelo tám.› »

⁶² Kaahamusmoó úr oo Mungú iri sihhiít, Yesu guri báy, «Masa xaslít? Mukwí gár daanduuwoge i kaahi a umós?»

⁶³ Ala Yesu aa ilawatsiiká. Kaahamusmoó úr oo Mungú Yesu guri báy, «Án kuúng u baw, lo'o huweek ar Munguúdá' slaáf. Atén ti ádbeer kuúng barnaxes aqo Kristo, Garmoó Mungú.»

⁶⁴ Yesu iri oó', «Kuúng aga ó'. Ala án a kah, iimír hamí Garmoó Hee u aandá' aa iwiít dákw doó /iyáy oo kudá' aleesleemuú koóm, nee nay kii/ ar huunkoó doori.»

⁶⁵ Kaahamusmoó úr oo Mungú inqwaruuwós guri feehhamiís, iri oó', «I Mungú /ooslislín. Gár lamabu'úngw hatlá' ngus ala leelehhiitaan a milá? Qaytsité', /ooslisliingós kwí hám ugwa axasé'.

⁶⁶ Xáy, kuungá' ma katá'?» Tari oó', «Gár iwa harin a gaasa.»

⁶⁷ Kuri gitsee/a i nitsimiít, kuri tuu'uút ar kundi'i. Nee bahh'alé nguri tlaaqarma' muxiyé',

⁶⁸ tari káh, «Aá Krísto, atén i ooang, heé kuúng ugwa muux a heemá?»

Petro Yesu nguwa satlaánk

⁶⁹ Qoomár Petro iwa baraá afeenidá' wa iwiwiiti sagadiyuso'orká wák guna i daqeér, guri beér, «Kuúng a heé wák baraá mukdá' nee Yesú Galilaya ti alkooma'a.»

⁷⁰ Petro iri dír geeraá muu sleémeero wa tlaánk, iri oó', «Gár kiíng ta kat án a xuaaká.»

⁷¹ Petro iwa tsee/ií ti'iít, iwa dír afkú dó' i hardáh, dasír hatlá' guri aán. Dasiidá' mukko didaádí dirií' guri beér, «Heewí toomák i dinkwa nee Yesú Nasareti.»

⁷² Petro iri malé tlaánk ar lo'o, iri oó', «Án heesíng u xuaaká.»

⁷³ Deelór niiná iwa gwá', mukdaádá' naa baraadí hardah Petro kuri i daqáy, kuri báy, «Ar ló', kuúng a heé wák dir'ine. Asma tam axweesanaywók sleeme kuúng u laqaaqán.»

⁷⁴ Petro lo'o gari huúw iri oó', «Án heesíng burqo xuú' ni gwaá'.» Siiwadár kilae konkomo iri uú'.

⁷⁵ Petro /aymuudá' Yesu aa oó' guri insláy, kudá' iwa káh, «Konkomo iwa uui, án kuúng iga sagaáwa tám wa satlank.» Petro iri tsee/ií ti'iít, iri ló'wa /aa/amín.