Matayo 21 - Biblía Axweesantá Hhohho' ar Mungú 2004

Yesu iwa bar/úr dáh Yerusalemu

¹ Tari Yerusalemií tseewúy, tari hardáh Betfage, dír tloomár xaaiikaari ta babay seituúni. Yesu eeharuusér tsár gari ya/aáw,

² gari báy, «Tlawsé' ay amór gixsarqá' geeraahúng i dirii'. Bara hardaté' daqwaay uqo aandá', kwaa tseék, dinkwa nee gwarendmoó daqwaaywo. Gweerare', ngi amor'eénií hubá'.

³ Bar hee naa yaahaás, ku beera', ‹Aako gan slaa'.› Daqaní inós ngi ki/is ar gaanslaay.»

⁴ Tí sleémeero ina tleehharút as tidá' aarusmo aa oó' iwa bo/,

⁵ «Múk gixsár Siyoni bawaak. Ga/aawaak, waawutmoohúng ni amorhúngií hardáh. Inós ku tsá'. Aa tsa/án gawaá daqwaay, nee gawaá gwarendmoó daqwaay.»

⁶ Eeharuusér aáng iri tleér, adoodá' Yesu ngira oó' kari tleéhh.

⁷ Daqwaydá' nee gwarendmooduú daqwaaywo kiri huúw, inqwaruuín kuri hhaáf gawaá daandeemaá daqwaayeedá', Yesu iri gawaadí iwiít.

⁸ Múk yaariír baraá boo/aydae inqwaruuín guri hhafín baraá loohi, bahh'alé haleemaá xaai ngiri tlaaqiyé', ngiri hhafiné' baraá loohi.

⁹ Nee boo/aydá' geeraá wa hi'iít, nee oo aluuwo ta tseeamín ta kaahi, «Hosana, Garmoó Daudi, i xirfuuti kudá' hardáh ar umuú Aako, i xirfuuti Munguú gawaá doori.»

¹⁰ Qoomár iwa dáh baraá Yerusalemu, muu sleémeero oo baraá gixsadá' i dirií' iri amoqwaqwadín, tari káh, «Heewí a heemá?»

¹¹ Boo/aydá' Yesu gwa eehar iri oó', «Heewí a aarusmo Yesu, oo baraá Nasaretír Galilayár daáhh.»

Yesu múk baraá Doó Mungú wa weerimiís nguwa guús

¹² Yesu iri dáh baraá Doó Mungú, muu sleémeero, kudá' muruú weerimiís nee kudá' muruú tlaxuuma guri baraá Doó Mungú wa gusiisín. Meesadaá múk peésár gaamiís giri /aankwartsín, nee kiteeraá múk hhookár weerimiisa.

¹³ Iri oó', «Kaa gooín, ‹Dooeé' ku bay a doó saaliingw.› Ala hám daxta kuungá' ugwa mar'ír fisuuse tlehhé'.»

¹⁴ Qoomár Yesu iwa baraá Doó Mungú i dirii'i, taampu nee taqooraywo nguna i daqayé', inós giri hungu/uumiís.

¹⁵ Ala kaahamuusér uren ar Mungú nee intsaahhatuusér hara'ayár Mosewo tari buúhh, asma muruuduú waa/oo/amo Yesu aa tlehhiít, nee asma na/ii niwa baraá Doó Mungú wa tseeaminé' ar afór ur, iwa kaahiya', «Hosana, Garmoó Daudi i xirfuuti.»

¹⁶ Yesu kuri báy, «Aga axási adór i kaahiya'?» Yesu iri oó', «Eeít, aga axaás. Kuungá' aga soomusi'iikáhe gídaabá, ‹Kuúng xirfuuwók ugwa amohhe'és kuwa boo/eesi ar afér na/aá ninakw nee awa du'uumá'.› »

¹⁷ Yesu giri didí geexáy, iri tsee/aá gixsár ti'iít, iri tláy ay Betania, iri amoodií deél.

Yesu /aantsí ngiwa lu'ús

¹⁸ Matlaatleero looa niwa tleér, Yesu iwa baraá gixsár kay, ina qwariít.

¹⁹ /Aantsírka wák ar afaá loohírí dirii' gari artá áy. Ala naxés i mamaá koondaaká, aqo har loo/o kilós. /Aantsídá' gari báy, «Iimír laarí mamu mikiwa baloó sláy gawaawoge.» /Aantsídá' iri kát siiwadár kilae.

²⁰ Eeharuuse adoodá' ngiwa aán, iri waa/ó/, iri ó', «Adoorí a milá, /aantsírí misa gaanslár kát?»

²¹ Yesu giri báy, «Án a kah, kuungá' bar haratlintaao a koondá', nee a xuruumita'aaká, ar ta tlehha' a tír /aantsí kiloseeká. Tam tloomarí sleeme bara beeré', ‹Quútl, tláw ti kwahhtá eer baraá tlawi,› adoorí i tleehharút.

²² Slám umuúqo gár ta firiinda'a baraá firorhunge, bar aga haratlintié', a sleerá'.»

Múk aleesleemuú Yesu gu yaahamiís

²³ Yesu iri dáh baraá Doó Mungú. Kaahamuusér uren ar Mungú nee bariisér múk Yahudi Yesu kuri i daqáy qoomár iwa intsaahhatimisi, kuri báy, «Muruuwí aleesleemuú kur tlehhit a gaalá? Nee heé aleesleemuuwí ngwa kuúng i haniis a heemá?»

²⁴ Yesu giri báy, «Aníng sleeme gár wák ngi dirhúng i yaahaás, kuungá' ngi oá'. Daqaní aníng sleeme aleesleemuú muruuwí ngur tlehhiit ngu dirhúngií oó'.

²⁵ Baatiísmoó Yohane amór naa daáhh a amá? A amór Mungúhe laqaá a amór muu?» Tari kilooín axweés ta kaahi, «Bara ooaán, ‹Amór naa daáhh a amór Mungú,› ti bay, ‹Ahaá ala, Yohane musa haratlinti'i'iiká?›

²⁶ Ala bara ooaán, ‹Amór muu,› boo/aay u da'ayumitaán. Asma muu sleémeero Yohane gwaa tsaáhh adór tar aarusmo.»

²⁷ Yesu kuri báy, «A xuanaaká.» Yesu inooín giri báy, «Aníng sleeme aleesleemuú muruuwí ngur tlehhiit ngu dirhúng i ooaaká.»

Slaqsoó daaqoó tsár

²⁸ «Kuungá' ma katá' daanduú kaangwihe? Heeko wák daaqoó tsár gu kón. Garmoó úr guri i daqáy, guri báy, ‹Garmaaeé', tláw laarí gadiyeé aweek baraá qaymór sabiíbu.›

²⁹ Garmaadá' iri oó', ‹Ka hhoo', baabá.› Ala aa daqayká.

³⁰ Aakoodá' iri tlay amór garmoó niiná, guri adoodá' báy sleeme. Ala garmoó niiná iri oó', ‹Án a daqawká.› Aluuwo iri hhu'u'ún, iri daqáy.

³¹ Xáy, baraá daaqaywí tsare heé sla'aarír baabuúín gaa tleehh a gaalá?» Tari oó', «A kudá' niiná.» Yesu giri báy, «Án a kah, ohomuusér koódi nee tsaatuuseero ta geeraahúng i waaraahh tari dah baraá waawuti'iimár Mungú.

³² Asma Yohane nina dirhúng i hardáh ar loohír gan'amu, kuungá' kuri haratlinti'i'iiká. Ohomuusér koódi nee tsaatuuseero kuri haratlintií'. Kuungá' adoodá' kawa aandé' tam sleeme aga hhu'u'uundi'iiká as kuwa haratlintia'.»

Slaqsoó qaymór sabiíbu ar taa saayín

³³ «Slaqsoó hatlá' iiárií qaasaak. Heeko i deer oo do'ós koóm. Inós sabiíbu guna dahaás baraá qaymoorós. Qaymo gari yaáw. Bohóngw mamaá sabiíbu ngiwa tsoo/iti guri foól baraá tla/ángw qaymo. /Aampár xuuma gari tleéhh. Qaymo gari saayín dír doosluuse, iri aa'aá káy.

³⁴ Qoomár bu'uungw iwa naká/, sagadiyuuseerós gari ya/aáw amór doosluuseedá', as bu'uungós kuwa leehhi.

³⁵ Ala doosluuseedá' sagadiyuuseedá' gari ohiín, oo wák kuri muúx, oo hatlá' kuri gaás, nee kuqá' kuri tlaquút ar tlaa/e.

³⁶ Sagadiyuusér hatlá' ar yaariir, tidár geera ba/a gari malé ya/aáw. Kari malé adoodá' laáq.

³⁷ Alhhe'eesaywo garmaawós guri amor'ín i ya/aáw, iwa kaahi, ‹Garmaaeé' ku ilaiwaa/.›

³⁸ Ala qoomár doosluuseedá' garmaadá' nguwa aán, tari kilooín axweés ta kaahi, ‹Kwí a aalitmoowós. Qwalaas un gaasaán, as daqaní aali tawa toorén.›

³⁹ Kuri óh, kuri tsee/áy kwaáhh baraá qaymór sabiíbuwo, kuri gaás.

⁴⁰ «Xáy, aakoó qaymo loó' birna hardáh, adór doosluuseedá' ngi laqi a adoomá?»

⁴¹ Tari oó', «Mukdá' tlákw gu ló'wa hhaamiis. Nee qaymór sabiíbu gari doosluusér hatlá' i saayín, tidá' bu'uungós gu haniis ar qoomár hariim.»

⁴² Yesu giri báy, «Aga soomusi'iikáhe baraá Gooiro, ‹Tlaa/adá' qwatsiiruuse aa sí', aa tlaa/ár ur tleehhít ar do' ira gawdúy. /Aymuuwí amór i dahhi a amór Aako. Slám a waa/oo/amo dír ilaarene.›

⁴³ «Gawaá adoorihe án kuungá' nu baw, ‹Waawuti'iimár Mungú ka hingees dirhunge, nee kari haniis dír xoorór tlehhema'aá waawuti'iimadá' wa hariim gi tlehhiit.› [

⁴⁴ Umuúqo heewo oo gawaá tlaa/arí huú', aqo in qeqtaatín, nee slám umuúqo heewo oo tlaa/arí i i hu', aqo gun naasuúr.]»

⁴⁵ Kaahamuusér uren ar Mungú nee múk Farisayo slaqsi'iiwós kudá' kiwa axaás, kari tsaáhh adór múk i kaahi tar inooín.

⁴⁶ Gawaá adoorihe Yesu kuna loohi leelehhiít ar kur oohi, ala boo/oó muu kuri da'ayuút, asma Yesu muu gwaa tsaáhh adór tar aarusmo.