Matayo 20 - Biblía Axweesantá Hhohho' ar Mungú 2004

Doosluusér qaymór sabiíbu

¹ «Waawuti'iimár doori a slaqás nee heé qaymór sabiíbu ga koóm. Inós ina tseewa ti'iít as doosluuse ngiwa leelehhtuú ay, ngiwa huwi baraá qaymoorós ar sabiíbu.

² Tana al'axweés nee inós, umuú heewo nguwa bui ar shilingmoó wák tlaatla/aangw sleémeerowo. Giri huúw ay baraá qaymoorós ar sabiíbu.

³ Qoomár looár tame iri malé tláy, múk hatlá' guna ár i sihhimiit baraá boo/áy wa ale, i gadiyér kon'aaká.

⁴ Inós giri báy, ‹Tlawsé' kuungá' sleeme, gadiyeé awaagáy baraá qaymor'eé' ar sabiíbu. Bu'utuuhúng oo hariím án ngu haniís.›

⁵ Tari daqáy. Qoomár looár lahhooe nee looár gwaleele aqo adoodár kilá' gana malé tleéhh.

⁶ Qoomár looár mibaá nee wake iri malé tláy, awa hatlá' gina malé ár baraá boo/aay, ta sihhimiit tawó alé. Giri báy, ‹Baré tlaatla/aangw sleémeero a tawó diirí sihhimitá', slám a gadiyér koonda'aaká.›

⁷ Inooín nguri bayé', ‹Asma heé atén taa gadiyeé i haniis i kaahh.› Giri báy, ‹Kuungá' sleeme tlawsé' ay baraá qaymór sabiíbu.›

⁸ «Qoomár looa iwa dát, aakooduú qaymo loó' sageesihhitusmoowós guri báy, ‹Doosluuse ateeteegáy, bu'utuuín haniiseek. Bu'utu ku iimu/uún dír kudá' naa aluú wa hardah, nee daqaní ku alhhe'és dír kudá' naa geerií hardah.›

⁹ Mukdaáduú gadiyeé gaa iimu/un qoomár looár mibaá nee wak, umuúqo heewo aqo shilingmoó wák guna sláy.

¹⁰ Kudá' aáng gadiyeé ngaa geerií iimu/un, inooín tindiwa hardáh, inooín geera ngiwa xuiya', bu'utuú úr kun kár sláy. Ala umuúqo heewo gár aa sláy aqo shilingmoó wák.

¹¹ Qoomár ooharo kuwa hhe'eés, tari qununuú/ dír heedaáduú qaymo loó' i alé.

¹² Tari oó', ‹Mukwí naa aluú wa hardah, gadiyeé kana tleéhh ar qoomár looár wák kilós, ahaá kuúng bu'utuuín musa alqoomés nee koorén, ateédá' tsee/amá ugwa saqiqtlaatlimaan tlaatla/aangw sleémeero?›

¹³ «Inós heé wák dir'ine guri báy, ‹Mulqámo, án kuúng ugwa /aytimiiká. Aníng nee kuúng gár taa al'axweesaán a shilingmoówoóke?

¹⁴ Ooheegáy tidá' kuúng wa hariím, waátl. Aníng aga slaá' bu'utuú kudá' naa aluú wa hardah nguwa alqoomees nee kók.

¹⁵ I hariindakáhe aníng muruueé' nguwa ar gadiyuus ar adór án ngur slaa'. Laqaá daxta kuúng gura' un ohína asma aníng tiwa hhoó'?› »

¹⁶ Yesu iri ilawaáts giri báy, «Gawaá adoorihe, kudá' alaá hará' ta geerií waaraahh, nee kudá' geeraá hará' ta alhhe'eesáy kii/.»

Yesu gwa'araarós ngiwa malé sagaáwa tám wa oó'

¹⁷ Qoomár Yesu iwa tsa/aa/an iwa Yerusalémúr kay, eeharuuseedá' mibaá nee tsár kilooín gari huúw dinkwa nee inós. Tawa loohír i dirii'i, gari báy,

¹⁸ «Ga/aawaagáy, hamí a tsa/aa/amaán tawa Yerusalémúr kawaan, nee Garmoó Hee ku qaas baraá dabaá kaahamuusér uren ar Mungú nee intsaahhatuusér hara'ayár Mose. Inooín kuri sakwasleemuut ar kuwa gaasi.

¹⁹ Aluuwo kuri qaas baraá dabaá múk xoordaá hatlá' as kuwa niqin, nee kuwa muxi nee kuri kikii'' gawaá msalaába, nee bál tám kuri waaslee/atis.»

Firór aayór Yakobo nee Yohane

²⁰ Aamaá Sebedayo nee daaqaywós Yesu kuri i daqáy, guri i tumbarara'át, guri firiín gaaro.

²¹ Yesu gari báy, «Gár ta sla' a milá?» Aayoodá' iri ó', «Na/iieé' kuká' tsár ya/aameek niwa iwiitiya' oo wák dakók oo doó /iyáy, kuqá' dakók oo doó basáy baraá waawuti'iimaroge.»

²² Yesu iri oó', «Gár ta fiririinda' a xua'aaká. Xooslmoodá' án ni wah, kuungá' u qitlá'a wahto?» Kuri báy, «Adoosíng a aleeslawaán.»

²³ Yesu giri báy, «Xooslmoodá' án ni wah, uqo watá', ala kángw kuungá' tawa iwita' heeqá' dakw'eé' oo doó /iyáy, kuqá' dakw'eé' oo doó basáy, kangwsíng a kwe'eeneeká. Ala kiteeridá' ki haniis dír mukdá' kisa amohhe'eés nee Baabuúeé'.»

²⁴ Nee eeharuuseedá' mibaangw adoodá' ngiwa axás, hhaeedá' tsár giri i búhh.

²⁵ Ala Yesu eeharuuseedá' gari ateét gari báy, «A xuá' adór waawitú xoordu ir waawuti'ii'ín ar /uuru, nee adór muk'ín oo aleesleemuú koóm tar baaliilín.

²⁶ Ala dirhunge a adoosingeeká. Ala umuúqo heewo oo uroó slaá' dirhunge, masók a sagadiyusmoohúng.

²⁷ Nee umuúqo heewo dirhunge oo geerií waarahhamaá slaá', masók a lawaalmoohúng.

²⁸ Asma tam Garmoó Hee sleeme naa hardihiiká as kuwa sagadiyuusi, ala nina hardáh as muu nguwa sagadiyuusi nee slafiingós nguwa duuxi as tawa bu'utuú múk yaariír ngur tu/i.»

Yesu taampaá tsár ngiwa ila' qaytsitís

²⁹ Qoomár tawa Yerikór wa tláy, Yesu kuri eehár nee boo/oó úr.

³⁰ Naxés mukko tsár oo taampu aa iwiít afaá loohi. Inooín ngiwa axaasiyé' Yesu in waaraahh, tari tseé' ar afór ur, tari oó', «Aáko, Garmoó Daudi, atén ti gurtleer.»

³¹ Mukduú taampu kuri iigahhaát nee boo/aay as iwa xasliitiya', ala inooín tseeamooro tari ak buúhh tari oó', «Aáko, Garmoó Daudi, atén ti gurtleer.»

³² Yesu iri sihhiít, mukduú taampu guri ateét, giri báy, «Adór ta sla'a' ar nu laaq a adoomá?»

³³ Kuri báy, «Aáko, gár ta sla'aan, masók ilaarén in qaytsitiyá'.»

³⁴ Yesu guruuwós iri tláy, ilaaín giri kwatiít. Siiwadár kilae ilaaín niri qaytsitiyé', Yesu kuri eehár.