Matayo 2 - Biblía Axweesantá Hhohho' ar Mungú 2004

Xu'utuusér tsatse/ ar da/aá daahh

¹ Yesu kuna laqwaál baraá gixsár Betilehemu ar baraá yaamaá Yudea, qoomár waawutmo tawa Herode. Qoomaadae xu'utuuserka ar tsatse/ nina da/aáw wa tleér ay Yerusalemu.

² Iri ó', «Waawutmooduú múk Yahudi taa laqwaál i amá? Asma atén tsatsee/irós ana araán da/aáw wa ale. Nee atén nguna xirfayeemisuú awaán.»

³ Waawutmo Herode adoorí ngiwa axaás iri kwisliít, tam múk Yerusalemu sleémeero iri kwisliít.

⁴ Herode kaahamuusér uren sleémeero ar Mungú nee intsaahhatuusér hara'ayár Mosewo giri ateét, giri yaahamiís iwa kaahi, «Kristo dír kuy laqwaali a diimá?»

⁵ Inooín kuri báy, «Baraá gixsár Betilehemu ar baraá yaamaá Yudea, asma aarusmo adoorí gana alki/iít iwa kaahi,

⁶ ‹Kiíng gixsár Betilehemu ar baraá yaamaá Yudea, kiíng ti baloó niinaweeká baraá gixsadaá Yudeawo, asma waawutmo i ti'iit baraawoge oo muk'eé' oo Israeli gu de'eém.› »

⁷ Aluuwo Herode mukduú xu'utuusér tsatse/ guri dimbé ateét ar sufa, kaangw guri dir'ín wa sláy oo tsatsee/idá' iimír kawa ár.

⁸ Giri ya/aáw ay Betilehemu, giri báy, «Tlawsé', kángw na/aay yaahasa hhe'eesaak. Nee bura aandé', kangwsíng ngu amor'eé' hubá', as aníng sleeme nguwa sluufmisuú aw.»

⁹ Inooín axweesanoó waawutmo kuwa axaás, tari tláy, nee tsatsee/idá' taa da/í ár giri geerahát, iri sihhít didár do'duú na/aay i dirii'i.

¹⁰ Tsatsee/idá' kawa ár, tari qwalaá/ kángw kilá' wa ale.

¹¹ Tari dáh baraá do', na/aydá' kuri ár nee aayoorós Mariawo. Kuri i tumbarara'aát kuri sluufmiís. Nee inooín muruuín kudá' i kona' nguri gweeriyé', nguri haniisiyé' dír na/aay. Muruú taa hanimiís a kwí: Sahaábu nee mooyángw tsuú', nee mooyangwko ta babay manemane.

¹² Inooín Mungú giri gurbuú' ar baraá tlata as mindiwa dír Herodér ki/iyé'. Inooín tari waátl ar loohír hatlá'.

Tawa goów Misri

¹³ alaá xu'utuuseedár tsatse/ iwa tleér, malaykamoó Aako iri hardáh dír Yosefu ar baraá tlata, iri oó', «Tláw na/aay nee aayooro ar guweek ay baraá yaamaá Misri, amoodá' wa hootaak ay dír án kuúng uy ateet. Asma Herode i na/oó leelehhiit as nguwa gaasi.»

¹⁴ Qoomár xweeraawo Yosefu na/aay nee aayo girir tláy ay yaamaá Misri.

¹⁵ Tari amoodá' wa hotaatín ay qoomár Herode iwa gwaá'. Adoorí ina tleehharút as /aymuudá' Aako aa oó' ar afkú aarusmo, iwa boo/i kudá' iwa oó', «Garmaaeé' una ateét niwa baraá yaamaá Misrír wa ti'iiti.»

Tsu/utár na/ii

¹⁶ Herode ngiwa ár adór kura al/aáy nee xu'utuuseedár tsatse/, iri ló'wa buúhh. Muu guri ya/aáw na/aá daaqaay sleémeero awa baraá gixsár Betilehemu nee inslaawaywose kiwa tsu/i, awa har kureeraá tsár nee awa kureeraá tsár ngaa ay'iiká sleémeero, ar adoodá' ngira yaahamiís dír xu'utuuseedár tsatse/uwo.

¹⁷ Gawaá adoorihe /aymi'iidá' aarusmo Yeremia aa oó' niri boo/iyé' kudá' iwa káh,

¹⁸ «Afo kana baraá Ramár i axaás, /aa/e nee tsuunqusmoó yaariír, Raheli na/iiwós ale/aa/amiín, tam gurkwa/asa gaa ya/aandiiká asma iwa kahhiya'.»

Tindawa Misrír wa kií/

¹⁹ Herode iwa gwaá', malaykamoó Aako iri hardáh baraá Misri dír Yosefu ar baraá tlata, iri oó',

²⁰ «Tláw, na/aay nee aayoorose ar ki/eek ay baraá yaamaá Israeli. Asma mukdá' na/oó gaasár wa slaá' aa qaátl.»

²¹ Yosefu iri tláy, na/aay nee aayooro girir kií/ ay yaamaá Israeli.

²² Ala Yosefu ngiwa axaás adór Arkelao tar waawutmoó yaamaá Yudea, kitángw baabuúwós Herode, iri da'ayuút amoodá' keemuuwo. Alaá inós gurbu'utá baraá tlataawo kuwa hhe'eés, iri tláy ay yaamaá Galilaya.

²³ Iri hotaá áy baraá gixsár Nasareti. Adoorí ina tleehharút as /aymuudá' aaruuse aa ó' iwa boo/i, kudá' tawa káh, «Inós ku bay a heé Nasareti.»