Matayo 19 - Biblía Axweesantá Hhohho' ar Mungú 2004

Intsaahhatimisuú Yesu daanduú talaáka

¹ Qoomár Yesu muruuwí axweesanto nguwa hhe'eés, iri Galilayár wa tláy ay Yudea, amór gayuú yaaér Yordani.

² Kuri eehár nee boo/oó yaariír, inós giri amoodá' wa hungu/uumiís.

³ Yesu kuri i daqáy nee múk Farisayo as kuwa iiari, kuri báy, «Xáy, hee hareerós ngiwa geexay as umuúqo gaaro a hariímáro?»

⁴ Yesu iri oó', «Ahaá, aga soomusi'iikáhe adór tleehharusmoó muu iimír iimu/uungo hhawaata nee /ameeni ngira tleéhh,

⁵ iri oó', ‹Gawaá adoorihe hee baabuúwós nee aayoorós gin geexáy, tiri haragwaaiyá' nee hareerós, nee kuká' tsár tari slaqwtá wák tleehhiit.›

⁶ Gawaá adoorihe inooín a sangw tsareeká, ala a wak. Múk Mungú aa haragaás, hee munguwa paraátl.»

⁷ Nguri bayé', «Ala adór Mose hara'ayaarí ngira haniís a adoomá, tí hee hareerós ngiwa talaákárí haniisi, gari guus?»

⁸ Yesu iri oó', «Mose ina ya/án /ameena kawa gusisiinda' as saga gawdeemaahúng, ala iimír iimu/uungo a adoosingeeká.

⁹ Nee kuungá' nu baw, umuúqo heewo oo hareerós gaa guus, bar aa fuquská, iri duuxún harér hatlae, kwí aa fuquús. Nee heé hareedá' taa guús gaa duux, aa fuquús sleeme.»

¹⁰ Eeharuuse iri ó', «Kángw hee nee hareerós bar qo adoosíng, a tsiní duuxo bar kaa máy.»

¹¹ Yesu giri báy, «Múk axweesantí ilaooharo ga aleesláw, a sleémeerowooká, ala aqo har kudá' taa aleesleemií haniís.

¹² Asma muu i deer oo duuxo ga aleeslawaaká, asma kuna adoodár tleéhh iimír kuwa laqwaali. Múk hatlá' i deer oo duuxo ga aleeslawaaká asma kuna adoodár tleéhh ar dabér muu. Kooko sleeme duuxo ga máy asma waawuti'iimár doori. Múk intsaahhastí ilaooharo ga aleesláw ngi ilaoohi.»

Yesu na/ii ngiwa tsuúq

¹³ Aluuwo na/aá ninakw kiri dirósí huúw as dabaawós ngiwa gawaaín i qaasi nee ngiwa aleefirin. Eeharuuse mukdá' na/ii ngaa huuw guri iigahhát.

¹⁴ Ala Yesu iri oó', «Na/aá ninakw mawaagáy, ni amor'eé' hardihiye', slám mi ila/aamara'. Asma múk adór na/iiká', waawuti'iimár Mungú a tooín.»

¹⁵ Dabaawós giri gawaaín i qaás, iri quútl didae.

Masoomoó daqaarmo

¹⁶ Aluuwo heeko wák ina hardáh dír Yesu, guri báy, «Intsaahhatusámo, gár hhoo' ar ni tleehh a milá as slafíngw alhhe'eesay wásl nguwa slaw?»

¹⁷ Yesu iri oó', «Asma milá mas hhooeemaá yaahamís dir'eé'. Oo hhoó' a wak. Kuúng bar dahmaá slá' baraá slafiingw, hara'aya na ooheek.»

¹⁸ Heedaádá' iri oó', «Hara'aya a gaalá?» Yesu guri báy, «A tí, ‹Hee mu gaasaar, fuqi ma awaar, Gár hee ma fiisaar, Hee mu /aysántí tsataar,

¹⁹ Baabuúwók nee aayo ilaiwawa/eek, nee Inslaawmoowók slaeek adoodá' kuúng tir kilók sla'.› »

²⁰ Masoomoodá' iri oó', «Tisíng sleémeero aga qaro óh, ala gár iga wa /aaruur a male milá?»

²¹ Yesu guri báy, «Barnaxes kuúng a heé ganaá' tlehhitár wa slá', tláw, muruudá' ta koon weeriseek, peésaadá' ka hanís dír narkuute, daqaní aníng ir eehát. Kuúng daqaari'iimarók a gawaá doorií eér.»

²² Masoomoodá' /aymuudá' nguwa axaás, iri quútl ar gurhaami, asma inós a ló'wa daqaarmo.

²³ Yesu eeharuuseerós gari báy, «Án a kah, ka gawit daqaarmo iwa dahi baraá waawuti'iimár doori.

²⁴ Slám nu malé baw, ka inslaahh angamía iwa waarahh ar baraá fooxár laqwa, ta daqaarmo iwa baraá waawuti'iimár Mungií dahi.»

²⁵ Eeharuuse adoodá' ngiwa axás, iri waa/ó/ ló'wa ale, iri ó', «Barqo adoosíng ala heé ba/ám a heemá?»

²⁶ Yesu eeharuuse gari i qaytsiít gari báy, «Dír muko adoosíng i ya/aandaaká, ala dír Munguhe umuúqo gaaro i ya/aán.»

²⁷ Petro iri oó', «Qaytsiít, xáy atén mura' sleémeero ugwa geexawaán, kuúng uri eeharaán, gár atén ta slawaan a milá?»

²⁸ Yesu giri báy, «Án a kah, kuungaásingá' aníng iga eehade', baraá yaamuudá' /aben, kudá' Garmoó Hee iwa iwiiti gawaá kitangwduú xirfuuwós, kuungá' sleeme a iwitá' baraá kiteeriidá' mibaá nee tsár, tlahhi'iidá' mibaá nee tsár awa múk Israeli kiri sakwasleemutá'.

²⁹ Slám malé alé umuúqo heewo oo do'ós gwa geexay, laqaá qaymo, laqaá hhiya', laqaá hho'o, laqaá baabá, laqaá aayo, laqaá na/ii, as aníng, muruuwí sleémeero gu sagaáwa tsiiru wa ilaoh, nee slafíngw alhhe'eesay wásl guri aal.

³⁰ Ala baraá kudá' geeraá hara'a, awa yaariir i alií ki/iyá', nee kudá' alaá hará', ta geerií waaraahh.»