Matayo 16 - Biblía Axweesantá Hhohho' ar Mungú 2004

Múk tlákw i layár leelehhiit

¹ Múk Farisayo nee múk Sadukayo Yesu kuri i daqáy as kuwa iiari, kuri firín layár gawaá dooraá daahh ngiwa laqan.

² Yesu giri báy, «Looa bir darát, kuungá' a kata', ‹Matlo doori ki /awaak, asma doori kiwa daa/aát.›

³ Looa binda tleér a kata', ‹Laarí tluwaay i tluuw, asma doori ki daa/aat, slám i huunkoó koná'.› Kuungá' a hhaahhafuuse. Afaá doori tsatsahhaango i aleesleerá', ala layár de'emuuká' tsaahharo mas aleesleera'aaká.

⁴ Qartá tlaakw nee ar tsaatuuse i layár leelehhít. Ala layár ta slay i káhh, aqo har layár Yona kilós.» Giri geexáy iri quútl.

Gár ta mikaátér sluuftamamisi ar múk Farisayo nar múk Sadukayo

⁵ Eeharuuse iri tleér iri waaráhh ay gayuú hatlá'. Laatí mikaáte kaa gunqaareés huwto.

⁶ Yesu iri oó', «Qaytsité', ti harmagahhe' nee gadaádá' ta mikaátér sluuftimiisi ar múk Farisayo nee ar múk Sadukayo.»

⁷ Eeharuuseedá' iri kilooín axwés, tari káh, «Adoorí gana oó' asma adoodá' mikaáte ngiwa gunqareesaán.»

⁸ Yesu inslaway'ín guri tsaáhh giri báy, «Kuungaásingá' haratlintaao niina. Ahaá adoosíng mikaáte kawa koonda'aakáhe?

⁹ Aga tsahhi'iikáhe tam hamí? Slám a insleera'aakáhe mikaáteedá' kooán, tidá' múk kumér kooán aa /aáy, katatoó taa hatsisé' a magá'?

¹⁰ Nee slám mikaáteedá' faanqw, tidá' múk kumér tsiyáhh aa /aáy, katatoó taa hatsisé' a magá'?

¹¹ Ala mas insleera'aaká gár adoorí án ngisa oó' a mikaáteerooká. Ala ti harmagahhe' nee gadaádá' ta mikaátér sluuftamamisi ar múk Farisayo nee ar múk Sadukayo.»

¹² Nee qoomaadae eeharuuse gari sangw tsáhh ar gídaabá, gaa ádbayká tiwa harmagahhiya' nee gadaádá' ta mikaátér sluuftimiisi, ala gina adoodá' báy as tiwa harmagaahhiya' nee intsaahhatimisuú múk Farisayo nee oo múk Sadukayo.

Lamabu'úngw Petro aa oó' daanduú Yesuwo

¹³ Yesu iri tláy ay yaamaá Kaisarea Filipi. Eeharuuseerós gari yaahaás gari báy, «Muu gár i kaahi a milá daanduú Garmoó Heewo, inós a heemá?»

¹⁴ Eeharuuse iri ó', «Ta kaahi kuúng a Yohanedá' Baatimaamiís. Bahh'alé ta kaahi a Eliya, nee bahh'alé ta kaahi a Yeremia, laqaá aarusmoó wák baraá aaruuseedár aange.»

¹⁵ Yesu iri oó', «Ala kuungá' ma kata' daanduueene, aníng a heemá?»

¹⁶ Simon Petro iri oó', «Kuúng a Kristo, Garmoó Munguúdá' slaáf.»

¹⁷ Yesu iri oó', «Símon, garmoó Yona, kuúng a heé amohhoó', asma kaangwí heé ngwa dirók i xu'utis i kaahh, ala aqo Baabuúeé' kuduú gawaá doorí dirií'.

¹⁸ Ala aníng kuúng u baw, kuúng a Petro, gidaabárós a tlaa/a. Gawaá tlaa/arihe aníng mukdá' iga haratlintii' u gawdeemiís. Tam gwa'ara sleeme muk'eé' kwí gu aleesleeraaká arba/ato.

¹⁹ Nee aníng gweermór waawuti'iimár doori ngi dirógií haniís. Nee umuúqo gaaro ar kuúng ta tsek baraaká' yaamuwo, gawaá dooriiwo sleeme ka tseek. Slám umuúqo gaaro ar kuúng ta gwet baraaká' yaamuwo, gawaá dooriiwo sleeme ka gweer.»

²⁰ Siiwadár kilae eeharuuseerós gari ló'wa hara'ayín gari báy, «Kaangwí mu heé bawaara' oo án tawa Kristo.»

Yesu gwa'araarós ngiwa geerií oó'

²¹ Iimír qoomaadae Yesu eeharuuseerós gari iimu/ún xu'utimisuuwo iwa kaahi, «Aníng gár tiwa hariím an Yerusalemúr káw, nee slahh'eemisuú yaariír nguri sláw dír bariisér wa ale, nee dír kaahamuusér uren ar Mungú nee dír intsaahhatuusér hara'ayár Mose, nee tiri gaas. Ala bál tame niri waasleé/.»

²² Yesu kurir bihhí suruúk nee Petro guri iigahhaát, guri báy, «Aasla'áy Aáko, Mungú tisíng ngi pa/asi, kuúng muwa sleér.»

²³ Yesu iri warqáy amór Petro, guri báy «Quútl dír geeraaeene Neétlaangw! Kuúng a dukutsmo dir'eene. Asma inslawaywók kwisíng oo Munguheeká ala oo muu.»

²⁴ Qoomaadár kilae Yesu eeharuuseerós gari báy, «Umuúqo heewo oo aníng i eehartá wa slaá', gar kuwa hariím a sla'aarirós gan gunqarees, nee msalaábarós gari gagaar, aníng iri eehar.

²⁵ Asma heé slafiingós gu ba/amisár wa slaá', gun qwaarees. Nee heé slafiingós qwaareesaro gwa ya/an as aníng, a gun ba/amis.

²⁶ Ala tam hee yaamu sleémeero ngi slaya, gár nguwa buiya' a milá, bar slafiingós aa qwaár? Laqaá hee gár i duuxi a umós ar slafiingós ngur ki/isi?

²⁷ Asma Garmoó Hee i hardah ar baraá xirfuú Baabuúwós dinkwa nee malaykeerós. Qoomaadá' an qoomár umuú heewo nguwa bui ar qoomoó tlehhemi'iiwós.

²⁸ Án a kah, muu i deer baraá tla/ángw mukwí sihhimiita, oo baloó qatlaaká, ay dír Garmoó Hee kway ari birna hardáh ar baraá waawuti'iimarós.»