Matayo 15 - Biblía Axweesantá Hhohho' ar Mungú 2004

Uunuú múk urén

¹ Qoomaadae múk Farisayo nee intsaahhatuusér hara'ayár Mose nina Yerusalemúr wa tlayé' ay amór Yesu, kuri báy,

² «Ahaá baré eeharuuseerók uunuú múk urén gi iialooeemiská. Asma daba' ki hamtlitiiká qoomár barta /ayín.»

³ Yesu giri báy, «Ahaá, baré kuungá' a hara'ayár Mungú siaasiá' as uunuuhúng.

⁴ Asma Mungú ina oó', ‹Baabuúwók nee aayoorók ilaiwawa/eek.› Nee, ‹Heé baabuúwós gu /ooslisliím, laqaá aayo, gár kuwa hariím a gwa'ara.›

⁵ Ala kuungá' a kata', ‹Hee baabuúwós laqaá aayo birnga báy, gadaádá' geeraawo aníng iwa hariím kuungá' i haniisaro, aníng aga Mungú i haniís,

⁶ heewí daqaní baabuúwós nee aayoorós gár ngis ilaiwawa/i i káhh.› Gawaá adoorihe kuungá' axweesantá Mungú ana warqesé' ar uunuuhúng.

⁷ Kuungá' a hhaahhafuuse. Adoodá' aarusmo Isaya aa aarín as kuungá' i qoón, tidá' iwa kaahi,

⁸ ‹Mukwí aníng in ilaiwawaa/ ar afér tawo, ala muner'ín ka sawen dir'eene.

⁹ Inooín aníng in tawó xirfayeemisiyá', ala gár ta intsaahhatimisi a hara'aydaá muu hariímár axweesantá Mungú wa ale.› »

Muruú hee gu meetaagaamiís

¹⁰ Yesu boo/aay guri ateét guri báy, «Iia qaasaak nee tsaahhaak.

¹¹ Gár hee i /ayi gu meetagaská, ala tidá' baraá afkú heé wa ti'imiit, an tidá' gu meetagaas.»

¹² Eeharuuseerós guri i daqeér guri beér, «Kuúng aga tsáhhi, múk Farisayo /aymuudá' nguwa axaás adór tara buúhh?»

¹³ Giri báy, «Umuúqo dahaasíngw Baabuúeé' oo gawaá doori aa dahaasiiká, ku tuu/.

¹⁴ Mawaagáy. Muksíng a taampu awa tampaá hatlá' geeraharahará'. Taampa bar taampár hatlá' ngi geeraharahát, tsaraawo ta al /e/etín baraá bohoongw.»

¹⁵ Petro iri oó', «Gídaabár slaqsaysíng ooang.»

¹⁶ Yesu iri oó', «Kuungá' ay hamí tsaahha aga sleeri'iikáhe?

¹⁷ Aga tsahhi'iikáhe adór, gár hee aa /aáy ar afa, iri waaráhh ar baraá gura', kari baraá bohoóngwí kwaahh.

¹⁸ Ala muruú baraá afkú heé wa ti'imiít, amór i dahhi a baraá muuná, an muruudá' hee gu meetagaás.

¹⁹ Asma baraá muunuú heewo gár ti'imiit a inslawoó tlákw, nee tsu/uta, nee fuqi, nee tsaatu'uuma, nee fiiso, nee lamabu'úngw lama, nee /ooslisliingw.

²⁰ Muruuwí an muruudá' hee gu meetagaás. Ala heé daba' gaa hamaatliiká dír /aymaaro, i meetagwaaiiká.»

Haratlintaaór /ameenír Kananayo

²¹ Yesu iri tláy didae ay amór yaamaá Tiro nee Sidoni.

²² /Ameenirkar xoorór Kananayo, ar yaamuudá' hoot, Yesu guri i daqeér, iri tsé' ar afór ur, guri beér, «Aáko, Garmoó Daudi, án gurtlawáng. Dasir'eé' neetlaame gaa ló'wa slahhe'eemís.»

²³ Ala Yesu gár ngaa báy i káhh. Eeharuuseerós guri i daqeér, guri firiiriín, guri beér, «Ádbaweek, i tleer, asma ti daawitimís ar tsimaahhi.»

²⁴ Yesu giri báy, «Aníng dír ti ya/aáw a dír múk Israeli kilós, kudá' aa adór bee/ángw wa qwaar.»

²⁵ /Ameenidá' nay hardát, guri i tumbarara'át, guri beér, «Aáko, alee/iisáng.»

²⁶ Yesu gari báy, «I hariindaaká muruú /aymár na/ii kuwa seeaawérií kwakwaahhi.»

²⁷ Inós iri ó', «Ar ló' Aáko, baré ala seeaawe tam muruú /aymár aakooín i paahhamiisi, guqo /ák sleeme.»

²⁸ Yesu gari báy, «Aáyo, haratlintaaoorók ka ló'wa ur. Tidaádá' ta sla' i tleehharut.» Qoomaadár kilae dasiirós iri hungú/.

Yesu múk yaariír nguwa hungu/uumiís

²⁹ Yesu iri tláy didaádae, iri hardáh bihhaá tlawtá Galilaya. Iri tsa/án gawaá tlooma, iri gawaadí iwiít.

³⁰ Boo/oó yaariír guri i daqáy. Nee múk aa sol'omiit kunguri amoorós i huúw, nee taampu nee múk afewaslene, nee taqooraywo, nee awa hatlá' awa yaariir. Mukwí kuri qaás dír ya'aá Yesu, giri hungu/uumiís.

³¹ Tam boo/aydá' iri waa/oó/ múk afewaslén kuwa ár, iwa axweesi, nee múk aa sol'omiit iwa hhooáy, nee taqooraay iwa hi'iimiti, nee taampu iwa xumiisiya'. Boo/aydá' Mungú múk Israeli kuri xirfayeemiís.

/Aymisír múk kume tsiyáhh

³² Yesu eeharuuseerós gari ateét, gari báy, «Aníng guruueé' i tlatláy boo/aywihe, asma deeloorí tamaawo án nee inooín a dinkwár i dir'aitaán, ala muruú /ayma ku konká. Aníng a sla'aaká ngiwa geemaw tawa watli ar qwari, as matawa baraá loohírí /ara/eerimiít.»

³³ Eeharuuseerós guri beér, «Mikaátér yaariir dír kawa slawaan a diimá baraá xaanxaywihe ar boo/oó yaariír kwí kur aaxiisi?»

³⁴ Yesu giri báy, «Mikaátér ta koonda' a magá'?» Tari oó', «A faanqw, nee siyoó niiná kilós.»

³⁵ Aluuwo giri ádbáy boo/aydá' iwa iwiiti.

³⁶ Mikaáteedá' faanqw gari óh, nee siyoódae, iri sluufiís, gari parhhamiís, gari eeharuuseerós i haniís. Nee eeharuuse giri dír boo/aydií qasmís.

³⁷ Sleémeero tari /ayín, tari aáx. Parhheemaá naa meetiye' kiri sleemiís, katatoó faanqw iri haáts.

³⁸ Múk aa /ayin a hhawaate kume tsiyáhh, ala /ameena nee na/ii kaa harafaariiká.

³⁹ Boo/aydá' guri deelór i oó'. Inós iri tsa/án gawaá miringamo, iri tláy amór yaamaá Magadani.