Matayo 14 - Biblía Axweesantá Hhohho' ar Mungú 2004

Gwa'arár Yohanedá' Baatimaamiís

¹ Qoomaadae waawutmo Herode kángw Yesu guri axaás,

² lawaaleerós gari báy, «Kwisíng an Yohanedá' Baatimaamiís nina waasleé/ baraá gi'i wa ale. Gawaá adoorihe /uuruuduú baraawós i dirií' in gadiyér tleehh.»

³ Asma aáng Herode Yohane guna óh guri tseék, guri dahaás baraá doó tseegamo as Herodia, harér Filipo hhiyoó Herode.

⁴ Asma Yohane Herode guna báy, «A hariímarooká kuúng harér hhiyaawók kawa dux.»

⁵ Herode Yohane guri gaasár wa slaá', ala muu guna da'ayuút. Asma muu Yohane guna tsaáhh adór tar aarusmo.

⁶ Ala deeloodá' ur ar Herode kuwa laqwaál niwa xeér, baalaadae dasír Herodia ina dír geeraá múk wa nét, nee Herode guri qwal/atís.

⁷ Tam Herode al'axweesani gari oó' ar lo'o. Iri oó', «Umuúqo gaaro ar kiíng ta sla' firiimang.»

⁸ As dasi kawa dukaakín nee aayoorós, Herode guri beér, «Gár ni slaa' a ságw Yohanedá' Baatimaamiís ngun baraá xooslmoowí qás.» Ala gár dasi adoorí ngisa ó', a aayír'ín ngina adoorí beér.

⁹ Waawutmo Herode iri gurhaamuút, ala as lo'odá' aa huúw, nee as mukdá' didá' wa /ayiima, hara'aya gari haniís saga kuwa haniisi.

¹⁰ Hee guri ya/aáw baraá doó tseegamo, as ságw Yohane nguwa tsati.

¹¹ Sagwdá' kunguri xooslmór huúw, kuri haniís dír dasiidá', nee dasiidá' guri húp amór aayoorós.

¹² Ala eeharuusér Yohane niri hardát, slaqwtá Yohane garir tleér, kari foól. Nee aluuwo tari tláy, kaangwí kuri xu'utisár áy dír Yesu.

/Aymisír múk kume kooán

¹³ Nee Yesu kangwdá' nguwa axaás, iri tláy ar miringamo ay dír inós tawa kilós. Nee boo/oó muu adoodá' ngiwa axaás, kuri eehár ar ya'a' amór gixsaduuín wa ale.

¹⁴ Qoomár Yesu niwa baraá miringamoó wa ti'iít, boo/oó yaariír guri ár, guri gurtleemuú wa ár. Tiqtuuser'ín gari hungu/uumiís.

¹⁵ Tsiindo niwa xayé', eeharuuseerós guri i daqeér, guri beér, «Diirí tay diriiaan a baraá darma, nee slám looa aa dát. Boo/aywí deeloórí ooeek i tlaye' baraá gixsadu muruú /aymar'ín ngu tlaxór aye'.»

¹⁶ Yesu giri báy, «Gár tas tlay i káhh, kuungá' muruú /aymaárií hanisaak.»

¹⁷ Kuri báy, «Gár ta koomaan i káhh, ala a har mikaáte kooán nee siyoó tsár.»

¹⁸ Iri oó', «Diirí huwaare'.»

¹⁹ Giri ádbáy, boo/aay iwa iwiiti gawaá gitso. Mikaáteedá' kooán nee siyoódá' tsár giri óh, iri gawaá doorí qaytsiít, iri sluufiís, gari eeharuuseerós i haniís. Eeharuuse gari dír boo/aydí hanmís.

²⁰ Sleémeero tari /ayín, tari aáx. Parhheemaá naa meetiye' kiri sleemiís, katatoó mibaá nee tsár iri haáts.

²¹ Nee múk aa /ayin a hhawaate kume kooán, ala /ameena nee na/ii kaa harafaariiká.

Yesu iwa gawaá daanduú ma'áy wa hi'iimiít ar ya'a

²² Siiwadár kilae eeharuuseerós gari báy, «Tsa/amé' gawaá miringamo, ta geerií waarahhá' ay gayuuqá', dír án nir deelór kah dír boo/aay.»

²³ Deelo ooaro ngiwa hhe'eés, iri tsa/án gawaá tlooma, as iwa firór ay dír muu iwa kahhi. Qoomár axweesuwo i gawaadí dirii' inós kilós.

²⁴ Nee miringamoodá' i tla/ángw tláwtí dirii', ku daawitimiis kángw kilá' wa ale nee gwaanduú ma'aay. Asma fur'a gi ló'wa ila/aán.

²⁵ Qoomár dakiingo Yesu giri harahardáh, i gawaá daanduú ma'ár hi'iimiit.

²⁶ Eeharuuse nguwa aán i gawaá ma'ár hi'iimiit, tari da'ayuút, ta kaahi, «Gaa a hhaantamo.» Tari daeérár tseé'.

²⁷ Yesu gina adaá i ilawaáts, giri báy, «Gur'e gawdeesaak. Hee a aníng. Ma da'ayumitaara'.»

²⁸ Petro guri bay, «Aáko, hee bar kuúng, án ateetáng, ni hardáh amoorók i alé, ar gawaá daanduú ma'aay.»

²⁹ Yesu iri oó', «Qwaláng.» Petro iri aweér gawaá miringamoó wa ale, iri hi'iít ar gawaá daanduú ma'aay, as iwa amór Yesú kay.

³⁰ Ala Petro fur'aadá' ngiwa ár iri da'ayuút, naxés i /e/etín baraá ma'aay, iri tseé', «Aáko, aníng ba/amisáng.»

³¹ Siiwadár kilae Yesu dakós guri gan'aás, dákw Petro guri óh, guri báy, «Kuúng haratlintaaoorók ka tsuwa niina. Asma milá masa xurút?»

³² Qoomár inooín tawa gawaá miringamoó i tsa/án, fur'a iri xaslít.

³³ Nee kudá' baraá miringamoó i diriiá', Yesu nguri i tumbarara'atiyé', tari oó', «Ar ló', kuúng a Garmoó Mungú.»

Yesu tiqtuuse ngiwa Genesaretír wa hungu/uumiís

³⁴ Qoomár tlawi kawa waaraáhh, tari hardáh baraá yaamaá Genesareti.

³⁵ Múk yaamuudá' Yesu nguwa tsaáhh, muu kuri ya/aáw amór yaamaá iisaapaydá', tiqtuuse sleémeero kingiri huúw dír Yesu.

³⁶ Kuri firín tam pasltá inqwaarirós kilós ngiwa kwatiitiya'. Nee mukdá' sleémeero pasltá inqwaarirós gaa kwatiit, iri hungaguú/.