Matayo 13 - Biblía Axweesantá Hhohho' ar Mungú 2004

Slaqsoó dahaasusmo

¹ Looarka wake Yesu ina dír dó' wa tláy, iri iwiít afaá tlawi.

² Boo/oó yaariír iri dirósií burumburiít, tam Yesu iri gawaá miringamoó i tsa/án, iri iwiít gawaadí alé. Boo/ayduú muu sleémeero iri afaá tlawtí sihhiít.

³ Yesu muruú yaariír guri dir'ín i axweés ar slaqsi'i, iri káh, «Heeko wák ina dahaasíngw áy.

⁴ Nee qoomár iwa dahaasin, bahh'alé ina paáhh afaá loohi. Tsir/o niri hardát, dahaasingwdá' guri /ák.

⁵ Oo hatlá' ina paáhh gawaá tla/u, didaádá' hhapér yaariir iwa kahh. Nari ti'iít ar gaanslaay, as hhapér bu'uut iwa kahh gawaá daanduú tla/uudae.

⁶ Nee tam tsee/amá iwa gwa/aát iri káh, asma dír dee/ár nguy sihhi i káhh.

⁷ Oo hatlá' ina paáhh baraá laqaya', laqayaadá' niri uraarayé', dahaasingwdá' kuri tliíq.

⁸ Nee dahaasíngw hatlá' iri paáhh dír hhapér hho', iri laqwaál, oo wák tsiiru, nee oo wák mibeeri lahhoó', nee oo hatlá' mibeeri tám.

⁹ «Heé iaá axamis gi koóm, i axaasi.»

Gár slaqsi'i kisar intsaahhatimisi

¹⁰ Eeharuuse nari hardát, Yesu guri beér, «Asma milá, mas axwés nee inooín ar slaqsi'i?»

¹¹ Yesu giri i ilawaáts, giri báy, «Kuungá' naaqór waawuti'iimár doori aga xue'. Ala inooín ka xuiiká.

¹² Asma umuúqo heewo oo gár koóm, ka dook. Slám kay tlahhasa hhe'ees. Ala umuúqo heewo oo gár koomaaká, tam tidá' niina i kon ka hayoh.

¹³ Gawaá adoorihe aníng an dir'ínií axweés ar slaqsi'i. Asma inooín barta xumiis, gár ta ara'ari i káhh, nee barta axamiis, gár ta axamiisi i káhh, slám gár ta tsatsahhan i káhh sleeme.

¹⁴ Nee /aymuú aarusmo Isaya aa boó/ dir'ine, kudá' iwa káh, ‹Axaasaro a axasá', ala a tsahha'aaká. Qaytsitaro a qaytsitá', ala a aanda'aaká.

¹⁵ Asma munér mukwí ka gawden, nee iiaawo i ak axamiisiaaká, nee ilaaín kaa gumamaá', as makawa ár ilaaine, matawa axaás iaaine, makawa tsaáhh ar muner'ín, mindiwa warqayé', nee aníng ngiri hungu/uús.›

¹⁶ «Ala kuungá' a múk amohhoó', asma ilaahúng ngi ga/ayá', nee iaahúng i axamiisiyá'.

¹⁷ Án a kah, aaruusér yaariir nee múk hota ganaa'aá' kana slaá' arto tidá' kuungá' ta ga/eera', ala kaa ariiká. Nee kari slaá' axaasaro tidá' kuungá' ta axamisa', ala kaa axaasiiká.»

Gídaabár slaqsoó dahaasusmo

¹⁸ «Ala kuungá' slaqsoó dahaasusmo iiárií qaasaak.

¹⁹ Umuúqo heewo oo axweesantá waawuti'iima gaa axaas, nee gídaabárós birnga tsaahhiiká, kudá' tlaákw nin hardah, nee /aymuudá' taa baraá muunuú heéwi dahaás guri hingees. Kwí an kudá' aa paahh afaá loohi.

²⁰ Nee kudá' aa paahh gawaá tla/u, an slaqsoó mukdá' axweesani gaa axaas, nee axweesantadá' kari ilaóh ar qwala/.

²¹ Ala dee/árú ta kon i kaahh, nee deelór tawa hooti ka ureeká. Slahh'ámu binda ti'iít as axweesantadá', laqaá gusiisiingw, axweesantadá' kari máy.

²² Nee kudá' aa paahh baraá laqaya', an slaqsoó múk axweesantadá' gaa axaas, ala daawitimér yaamu nee al/aymár daqaari'iima axweesantadá' gari tlíq, axweesantadá' iri laqwaliká.

²³ Nee kudá' aa paahh baraá hhapér hho', an slaqsoó múk axweesantadá' gaa axaas, nee gár i kat gari tsaáhh. Axweesantadá' baraá muner'ine iri laqwál, oo wák mamu ay tsiiru, nee kuqá' mamu mibeeri lahhoó', nee oo hatlá' mamu mibeeri tám.»

Slaqsoó sla/atá taa dahaás baraá qaymór angaáno

²⁴ Yesu gina slaqsoó hatlá' báy, iri oó', «Waawuti'iimár doori a slaqás nee heé dahaasíngw hhó' gwa baraá qaymoorós i dahaas.

²⁵ Qoomár xweeraawo sleémeero tawa guú', wakusmo ina hardáh, sla/a gari dahaás baraá tla/ángw angaáno, iri quútl.

²⁶ Qoomár angaáno iwa hapapaa'amiít nee iwa /uuntluumisi, sla/a sleeme iri geehhoouúr.

²⁷ Heedaáduú qaymo loó' lawaaleerós guri i daqeér, guri yaahás, guri beér, ‹Ahaá, baré kuúng dahaasíngw hhó' una dahás, ala sla/atadá' i dáhh?›

²⁸ Inós giri báy, ‹Wakusmo adoosíng gana tleéhh.› Inooín nguri bayé', ‹A slá'a sla/atadá' ngiwa burumburtá awaan?›

²⁹ Inós iri oó', ‹Aasla'áy, mawaak, asma aluuwo dahaasingwdá' hhó' u sla/atá altu/uundá'.

³⁰ Mawaagáy sleémeero ay dír i uraaraya' nee dír qoomár bu'uungw ni xeer. Daqaní qoomár bu'uungo aníng mukdá' bu'uúm un baw, «Sla/a ala tu/aak, daqaní ka dinkwárií tsegá', nee ka kwahhá' baraá asla. Daqaní angaáno ku baraá meewér'eéní burumbudá'.› »

Slaqsoó ilmoó haradaáli

³¹ Yesu slaqsoó hatlá' guri dir'ín i káh, iri oó', «Waawuti'iimár doori a slaqás nee ilmoó xa'anooko ta bay haradaáli, oo hee aa baraá qaymoorósí dahaás.

³² Nee ilmoodá' ku ló'wa niiná ta dahaasíngw hatlá' sleémeerowo. Ala binda ti'iít, ku ló'wa úr xaa'aá mamu sleémeero ba/a, iri xa'aanoó úr tleehhiit. Tam tsir/o iri hardát, maray'ín giri gawaá haleemiidí tlehhít.»

Slaqsoó gár ta mikaátér sluuftimisi

³³ Yesu slaqsoó hatlá' guri dir'ín i káh, iri oó', «Waawuti'iimár doori a slaqás nee gár mikaáte ir sluufaasluf, ar /ameeni aa qás baraá puuruú, oo har afi qoomoó deebadaá tsár, tam puuruúdá' sleémeero iri sluúf.»

Yesu adór ira axweés ar slaqsi'i

³⁴ Muruuwí sleémeero Yesu guna dír boo/áy axweés ar slaqsi'i. Umuúqo gaaro gana dir'íní axweesi ar slaqsi'i,

³⁵ as /aymuuduú aarusmo aa oó' iwa boo/i, kudá' iwa káh, «Aníng an axweés ar slaqsi'i, Muruudá' taa luú/ iimír tlehhmuú yaamuwo un alki/iít.»

Gídaabár slaqsoó sla/atá baraá angaáno

³⁶ Yesu boo/aay guri deelór i oó', iri dáh baraá dó' i i alé. Eeharuuseerós guri i daqeér, guri beér, «Slaqsaywú sla/atadá' baraá qaymo, gídaabárós atén i ooang.»

³⁷ Yesu iri oó', «Heedaádá' dahaasíngw hhó' gwa dahaas a Garmoó Hee.

³⁸ Qaymoodá' a yaamu. Dahaasingwdá' hhó' a mukdá' baraá waawuti'iimár Mungú i dirií'. Nee sla/atadár baraá qaymo a múk kudá' tlaákw.

³⁹ Wakusmoodá' aa dahaasin a Neetlaangw. Bu'uungw a alhhe'eesoó yaamu. Nee mukdá' bu'uúm a malayke.

⁴⁰ Ala adoodá' sla/a kar burumburaarin nee kari daa/ baraá asla, an adór bál deelór alhhe'eesoó yaamuwo tleehharuut.

⁴¹ Garmoó Hee malaykeerós ngi ya/aaw, nee malaykeedá' mukdá' sleémeero oo múk gee/asliím baraá tlakweema nee mukdá' tlakweemaá tlehhiít, guri burumbút, guri hingés baraá waawuti'iimár Garmoó Heewo.

⁴² Kuri kwaahh baraá asltá ur. Didaádá' an dír /aa/e nee sihhina' kiwa qirirtlimiisi.

⁴³ Mukdá' hota ganaá' qoomaadae baraá waawuti'iimár Baabuúine tan gwa/aat adór tsee/amá. Heé iaá axamis gi koóm, i axaasi.»

Slaqsoó daqaari'iimár taa luú/

⁴⁴ «Slám waawuti'iimár doori a slaqás nee daqaari'iimár taa foól baraá qaymorka. Nee hee ngiwa ár, gari luú/, iri tláy ar qwala/, muruuwós kudá' sleémeero i kon dír do'o guri weeriís, qaymoodá' gari tlaáxw.»

Slaqsoó miisli

⁴⁵ «Slám waawuti'iimár doori a slaqás nee heé halaanu'uumár tlehhahhiít, oo miislír hhoohhoo' ga leelehhiít.

⁴⁶ Nee inós miislirka wák ngiwa ár, ar tlaxo ur, iri tláy, muruuwós kudá' i kon sleémeero guri weeriís, miislidá' gari tlaáxw.»

Slaqsoó baratsufaay

⁴⁷ «Slám waawuti'iimár doori a slaqás nee baratsufoó taa kwaáhh baraá tlawi. Baratsufaydá' siyoó umuúqo daa'awto ngway ohín.

⁴⁸ Iwa haáts, kuri uuruúx afaá tlawi. Tari yaamií iwiít, siyoódá' kuri partliít, oo hhó' kuri amohhe'eés. Ala kudá' tlákw kuri kwaáhh.

⁴⁹ Adoorí an adór tleehharuut bál deelór alhhe'eesoó yaamuwo. Malayke nin hardát, mukdá' tlákw guri amór saáwí parátl dír kudá' hota ganaa'a.

⁵⁰ Nee kudá' tlákw kuri kwaahh baraá asltá ur. Didaádá' an dír /aa/e nee sihhina' kiwa qirirtlimiisi.»

Slaqsoó daqaari'iimár /aben nee ar qaren

⁵¹ Yesu giri yaahaás iri oó', «Tí sleémeero aga tsahhí'i?» Tari oó', «Eeít.»

⁵² Yesu giri báy, «Gawaá adoorihe umuúqo intsaahhatusmoó hara'ayár Mosewo, oo sagalooár waawuti'iimár doori ga koóm, a slaqás nee heé do' loó', oo baraá daqaari'iimarose muruú /abén nee oo qarene gu hanmiís.»

Yesu kuwa Nasaretír wa sií'

⁵³ Yesu slaqsi'iiká' axweesanto ngiwa hhe'eés, iri ti'iít iri tláy.

⁵⁴ Nee iwa amór ayaawós i hardáh, muu guri intsaahhatimís baraá doó saalingw'ín wa ale, tam mukdá' iri waa/oó/, tari káh, «Kwí dír sagalooarí ngiwa sláy a diimá, nee muruuwí oo waa/oo/amo i tlehhiiti.

⁵⁵ Kwí a garmoó heedá' maraá tlehhahhítaáke? Nee aayoorós a tidá' ta babáyke Maria? Hhaeewós awa daaqaay a Yakobo nee Yosefúwoóke, nee Simon nee Yuda?

⁵⁶ Nee hhaeewós awa dasu i ayaarén i dirii'iíaáke? Ala kwí tí sleémeero amór ngiwa sláy a amá?»

⁵⁷ Yesu kuri insareéhh. Yesu giri báy, «Aarusmo dír kuwa ilaiwawa/iiká i káhh, aqo har dír yaamuuwós nee dír do'ósuú kilá'.»

⁵⁸ Ala inós muruú waa/oo/amo oo yaariír gwa tleehhiiká amoodae, asma inooín kuwa haratlinti'iiká.