Matayo 11 - Biblía Axweesantá Hhohho' ar Mungú 2004

Ya/abtór amór Yohanedá Baatimaamiís daahh

¹ Yesu eeharuuseerós tidá' mibaá nee tsár hara'ayaaro ngiwa hhe'eés, iri tláy didae, iri intsaahhatimisuú áy, Ya/abtór hho' gari alki/iít baraá gixsaduuín wa ale.

² Yohane kángw tlehhema'aá Kristo aa tleéhh nguwa axaás, baraá doó tseegamór wa ale, eeharuuseerós gari ya/aáw amór Yesu as kuwa yaahasi,

³ «Kuúng a kudá' hardáha, laqaá heé hatlá' un daamaán?»

⁴ Yesu giri mu/aywaáts giri báy, «Tlawsé' tí taa aandé' nee taa axasé' Yohane ti beere',

⁵ ‹Taampu i xumiisiyá', taqooraay i hi'iimiit, múk tiqtír tsatmit ku hheehhe'eemiis, múk iia wásl i axamiis, tu'u ki waasle/atimis nee liitlakuuse ka Ya/abtór hhó' i alki/iit.

⁶ Heé amohhoó' a kudá' insarehhír koomaaká daanduueene.› »

⁷ Eeharuusér Yohane iwa tleér, Yesu kángw Yohane guri alki/iít dír boo/aydá', giri báy, «Kuungá' tawa baraá darmuú keeré', maga qaytsuú eeré'? Gár taa qaytsuú eeré' a gitsoodá' fur'a i dingimísa?

⁸ Bar gitsoorooká, ala a milá? A heé inqwaruú hhohhó' gu tsitatíta? Ala baré múk inqwaruú hhohhó' gu tsitatiít i baraá maraá waawitá.

⁹ Maga qaytsuú eeré' ala? Ana aarusmoó artá eerí'i? Eeít ar ló'. Án a kah, heé úr ta aarusmoowo una aandé'.

¹⁰ Kwí an kudá' tí kasa gooín, ‹Ga/aaweek, aníng ya/abusmooeé' u ya/aáw geeraawók wa ale, oo loohirók ga amohhe'eés geeraawoge.›

¹¹ «Án a kah, baraá múk /ameena naa laqwali, heé úr oo Yohanedá' Baatimaamiís gu baá/ i kaahh. Ala kudá' niiná baraá waawuti'iimár dooriiwo kun úr dirose.

¹² Iimír de'emaá Yohanedá' Baatimaamiís ay hamí waawuti'iimár doori kan i qwatliit ar /uuru, nee múk /uuruú koóm ga hayoohín ar /uuru.

¹³ Asma aaruuse sleémeero nee hara'ayár Mosewo, waawuti'iimár Mungú kana aariirín ay qoomár Yohane niwa ti'iít.

¹⁴ Ala kuungá' bar sla'á' haratlintaaooro, inós an Eliadá' hardáh.

¹⁵ Heé iaá axamis gi koóm i axaasi.

¹⁶ «Ala mukuú de'emaká' gár ngur qoomees a milá? Gár ngur qoomees a na/aá naa iwiitiye' dír boo/aay, i didá' wa na/aá hatlá' ateetiná',

¹⁷ ta kaahi, ‹Filiímbi ngiwa ufaahhaán, aga neti'iiká, tawa tsuunqumisaán, aga /a/i'iiká.›

¹⁸ «Asma Yohane niwa hardáh, i /ayinká, slám i wahanká, tari oó', ‹Kwí neetlaame gwa eér.›

¹⁹ Garmoó Hee nina hardáh i /ayín nee i wahán, tari oó', ‹Kwí a hheehhusmo, nee xuufiitusmo, mulqumoó ohomuusér koódi nee múk tlakuuse.› Ala sagalooár Mungú adór tar ló' kingina laqán nee tlehhemi'iiwós.»

Iigahhamituú gixsadaá naa hhu'u'un'iiká

²⁰ Yesu muruú xuawaslén oo yaariír guna tlehhiít baraá gixsaduukae, ala múk baraá gixsaduuká' aa hhu'u'unká. Gawaá adoorihe Yesu gixsaduuká' giri naanaáq iri oó',

²¹ «A tsaxwaahúng kuungaá gixsár Korasini, nee kuungaá gixsár Bet-saida. Asma muruuduú waa/oo/amo muruudá' xuawaslén aa tleehharumiit dirhunge geera bar ina tleehharuút baraá Tiro nee Sidonír wa ale, taa qaroó hhu'u'ún, nee guniyadu kay tsiit, tay iwiit gawaá da/ara as hhu'u'ungw'ín kuwa laqan.

²² Ala aníng kuungá' nun baw, bál deelór sakwasleemaro Tiro nee Sidoni a tsiní sakwasleemar'ín kawa ilí oohi, ta kuungane.

²³ Nee kiíng gixsár Kapernaumu, xáy, ti tsa/aási ay gawaá doori? Aasla'áy, tin /aytiis ay baraá gi'i. Asma muruú waa/oo/amo oo aa tleehharuut diroge, geera dír iwa tleehharuút bar an baraá Sodoma, geera Sodoma i deer ay laarí.

²⁴ Ala aníng kuungá' nun baw, bál deelór sakwasleemaro yaamaá Sodoma a tsiní sakwasleemar'ín ngiwa ilí oohiya', ta kuungae.»

Qwalaasé' amor'eé' hungu/uusé'

²⁵ Qoomaadae Yesu iri axweés iri oó', «Aníng kuúng u sluufiís, Baabá, Aakoó doori nee yaamu, asma muruuwí ugwa lú/ dír múk sagalooár kooma nee fuquraangw, kuri laqaán dír na/aá ninakw.

²⁶ Eeít, Baabá, asma adoorí an adoodá' kuúng kara slá'.»

²⁷ Iri oó', «Baabuúeé' umuú gaaro nga gawaá dabaaeénií qaás. Ala heé Garma gu xuú' i kaahh, aqo har Baabá kilós. Slám heé Baabá gu xuú' i kaahh, aqo har Garma kilós nee kudá' Garma xu'utisaro aa slaá'.

²⁸ «Qwalaasé' amor'eé' kuungá' sleémeero awa daawiimitá' nee awa huwa aa al iiloouúr, án kuungá' nu hungu/uús.

²⁹ Taqwante'eé' gawaá sum'iihúngií qaasaak, dir'eé' wa intsatsaahhaak. Asma aníng ti tsatsaa'aár, nee muunaáeé' ku gurhhoó'. Daqaní kuungá' amohhooa a sleerá' baraá munerhunge.

³⁰ Asma taaqwante'eé' i natsaatsá' nee huwar'eé' ka inslaahh.»