Matayo 10 - Biblía Axweesantá Hhohho' ar Mungú 2004

Ya/abuuse mibaá nee tsár

¹ Yesu ya/abuuseerós ar mibaá nee tsár gari ateét, gari aleesleemií haniís oo neetlaame kawa duxun, nee tiqtuuse sleémeero kawa hungu/uumisi, nee slaqwaatlakwér dimbadimbehe.

² Umér ya/abuuseerí mibaá nee tsár a tí: Oo geera a Simon, kudá' ta babay Petro, nee hhiyaawós Andrea, nee Yakobó Sebedayo nee hhiyaawós Yohane,

³ nee Filipo nee Bartolomayo, nee Tomas, nee Matayo, kuduú ohomusmoó koódi, nee Yakobó Alfayo, nee Tadayo,

⁴ nee Simonudá' yaamuuwós aleeslaáqw, nee Yuda Iskarioti. Kwí an kudá' Yesu gwaa sakii/.

Ya/abtór eeharuuseedá' mibaá nee tsár

⁵ Eeharuuseerí mibaá nee tsár Yesu gari ya/aáw, gari hara'ayár i haniís, giri báy, «Yaamaá xoordaá hatlá' mi kawaara', tam ma dahaara' baraá gixsadaá múk Samariawo.

⁶ Ala tlawsé' amór múk Israeli, kudá' aa adór bee/ángw wa qwaar.

⁷ Baraá aaiihunge dahaareemisé', tawa kata', ‹Waawuti'iimár doori naa naká/.›

⁸ Tiqtuuse hungu/uumisaak, nee múk aa qaatl waasle/atimisaak, nee múk tiqtír tsatimit hhoohhooeemisaak. Neetlaame duxumaak. Aga tawó sleeré', tawo hanmiisaak.

⁹ Baraá tlakwi'ihunge sahaábu mu huuwaara', laqaá peésár /awak, laqaá ar da/aten.

¹⁰ Tam tlakoó aai mu huwaara', tam inqwaruú tsár, tam ya/ata', laqaá tam hhara. Asma heé gadiyuús i harín muruú /ayma nguwa slay.

¹¹ «Umuúqo gixsaro laqaá yaamuwo awa ta i hardata'a, heé inkihhím leelehhaak, ta dír do'ós wa hotá' ay dír ti tleera'.

¹² Kuungá' bara hardaté' dír doó hee, ta oa', ‹Wayda dirhúng.›

¹³ Múk do'dá' bir wayduú wa harín, wayduuhúng i dir'ín wa hooti. Ala mukdá' bir wayduú wa harinká, wayduuhúng ni amorhúngií ki/i.

¹⁴ Nee hee barnaxes nu dahi'iimisiiká, laqaá axweesanayhúng gu axamiisiiká, qoomár bar tlatleerá' dír do'dae, laqaá baraá gixsaadae, teerír gawaá ya'aahúng alií kuukuuaak.

¹⁵ Án a kah, deelór alhhe'eesoó yaamuwo a tsiní gixsár Sodoma nee Gomora sakwasleemar'ín ngiwa ilií oohiya', ta gixsadae.»

Slahh'ámuú hardáh

¹⁶ «Qaytsité', án kuungá' nu adór bee/ángw wa ya/aáw baraá tla/ángw tawer, gawaá adoorihe masók tundun sageloén adór dayshe, slám masók tundun tsaén adór hhooka.

¹⁷ Ti harmagahhe' dír muko, asma kuungá' tundu huuw baraá maraá kwasleema, nee baraá maray'ín awa saaliingw, tunduri muux.

¹⁸ Kuungá' tundu huuw dír geeraá ga/awuuse nee dír waawitá as aníng, asma lamabu'ungw'eé' kuwa dir'ín i oa', nee dír múk xoordaá hatlá'.

¹⁹ Ala qoomár barnaxes kuungá' tundu huwahuuw, gár ta oa' ma leelehhitara', asma qoomaadae gár ta oa' kingi haniis.

²⁰ Asma heé axweés a kuungaeeká, ala a Qeeruú Baabuúhúng in axwees ar loohír kuungá'.

²¹ «Hhiya' hhiyaawós gu sakii/ as kuwa gaasi, nee baabá na/aywós gu sakii/, nee na/ii xwaylitér'ín ngi i haratlayá', ngiri tsu/iyá'.

²² Kuungá' muu sleémeero nu aahh as aníng. Ala heedaádá' aa qiitl ay alhhe'eesaay, an kudá' ba/ám.

²³ Kuungá' bartunda guús baraá gixsarí wa ale, ta gobá' baraá gixsár hatlá'. Asma án a kah, Garmoó hee ni kii/ dír gixsadaá múk Israeli kira faki'iiká.

²⁴ «Eeharusmo intsaahhatusmoowós gur ba/iiká, laqaá tam lawaalmo aakoowós gur ba/iiká.

²⁵ Ala i ya/aán eeharusmo tawa adór intsaahhatusmoowós, tam lawaalmo tawa adór aakoowós sleeme. Bar heé do' loó' kuna ateetín ar Be'elsebuli, xáy dír ta harqaasi dír mukdá' do'ós hoota.»

Heé daér wa hariím

²⁶ «Kuungá' mukwí mu da'ayumitaara'. Asma umuúqo gaaro ar taa tuuntuúk, ka waatlees, nee umuúqo gaaro ar taa luú/, ka geehhooees.

²⁷ Tidá' án naa dirhúng i axweés baraá giwtír wa ale, kuungá' na dír gwa/aát wa ooaak. Nee tidá' tinda saasaáhh ooaro, kuungá' gawaá daandeemaá maraay tiwa alki/ite'.

²⁸ Kudá' slaqwaá tsu/á' mi da'ayumitaara', asma qeeru gaasaro ngu aleeslay'aaká. Ala Mungú na da'ayumitaak, kudá' aleesleemuú koóm oo slaqwa nee qeeru ngiwa qwaareesi baraá asltá baloó gwaa'aaká.

²⁹ Ahaá, qawoó tsár kwaa weerísiíke ar sentimoó wák. Ala tam oo wák i yaamií huiiká dír Baabuúhúng nguwa xuiiká.

³⁰ Tam kuungá' sleeme se'éngw gawaá sagerhúng sleémeero kwaa faár.

³¹ Gawaá adoorihe, ma da'ayumitaara', asma kuungá' tundun ak afhhamít ta qawoó yaariire.»

Yesu kuwa lamabu'un dír geeraá muko

³² «Heé aníng iga lamabu'un dír geeraá muko, aníng inós u ya/aám dír geeraá Baabuúeé' kuduú gawaá dooriiwo.

³³ Ala umuúqo heewo oo án iga sa tlaank dír geeraá muko, aníng inós u sií' dír geeraá Baabuúeé' kuduú gawaá dooriiwo.»

Wayda i kaahh, gaa a slaqwara

³⁴ «Kuungá' ma kaahaara' aníng nina hardáh as wayda nguwa huuw baraaká' yaamuwo. Aasla'áy, ala án gár naa huúw a slaqwara.

³⁵ Asma án nina hardáh as tlaahhi ngiwa qaas dír hee nee baabuúwós, nee dír dasi nee aayoorós, nee dír aayo nee harér garmaawós.

³⁶ Wakuusér hee a múk do'ósuú kilá'.

³⁷ «Heé baabuúwós nee aayo gi slaá' ta aninge, i aníng wa harinká. Slám heé garmaawós gu slaá' laqaá dasiirós, ta aninge, i aníng wa harinká.

³⁸ Umuúqo heewo oo msalaábarós gaa gagaariiká nee naa aluueé' wa eeharinká, inós i aníng wa harinká.

³⁹ Umuúqo heewo oo slafiingós gu amohhe'eemiís, gu qwaarees, nee heé slafiingós gu qwaareés as aníng, gun amohhe'eemiis.»

Intsaahhasa daanduú bu'utu

⁴⁰ «Heé kuungá' naa ilaoh, a aníng ina ilaóh, nee heé aníng iga ilaoh, a kudá' aníng iga ya/aaw guna ilaóh.

⁴¹ Heé aarusmo gwa ilaoh as tawa aarusmo, bu'utú adór kuduú aarusmo gu sláy. Nee heé heé hota ganaá' gwa ilaoh as tawa heé hota ganaá', bu'utú adór kuduú heé hota ganaá' gu sláy.

⁴² Án a kah, umuúqo heewo oo heé wák gwa wahaas, baraá kuká' ninakwe, tam ma'aá niiná awa tsa', as tawa eeharusmooeé', bu'utuuwós i qwaariiká.»