Matayo 1 - Biblía Axweesantá Hhohho' ar Mungú 2004

Tlahhoó Yesu Kristo

¹ Kaangwí an adór alki/ituú tlahhoó Yesu Kristo kura gooín. Inós oo xwaylár Daudi, Daudi oo xwaylár Abrahamu.

² Abrahamu ina laqwaál Isaka. Isaka ina laqwaál Yakobo. Yakobo ina laqwaál Yuda, nee hhaeewós.

³ Yuda Peresi nee Sera gina laqwaál, aayír'ín a Tamari. Peresi ina laqwaál Hesroni. Hesroni ina laqwaál Aramu.

⁴ Aramu ina laqwaál Aminadabu. Aminadabu ina laqwaál Nahshoni. Nahshoni ina laqwaál Salmon.

⁵ Salmon ina laqwál Boasi, nee aayírós a Rahabu. Boasi ina laqwaál Obedi, nee aayírós a Ruti. Obedi ina laqwaál Yese.

⁶ Yese ina laqwaál waawutmo Daudi. Daudi ina laqwaál Solomon, nee aayírós a harér Uria.

⁷ Solomon ina laqwaál Rehoboamu. Rehoboamu ina laqwaál Abiya. Abiya ina laqwaál Asa.

⁸ Asa ina laqwaál Yehoshafati. Yehoshafati ina laqwaál Yoram. Yoram ina laqwaál Usia.

⁹ Usia ina laqwaál Yotam. Yotam ina laqwaál Ahasi. Ahasi ina laqwaál Hesekia.

¹⁰ Hesekia ina laqwaál Manase. Manase ina laqwaál Amoni. Amoni ina laqwaál Yosia.

¹¹ Yosia ina laqwaál Yekonia nee hhaeewós, qoomár múk Israeli kuwa loohatís baraá yaamaá Babuloni.

¹² Nee alaá muu kuwa loohatís baraá Babuloni, Yekonia ina laqwaál Shealtieli. Shealtieli ina laqwaál Serubabeli.

¹³ Serubabeli ina laqwaál Abiudi. Abiudi ina laqwaál Eliakimu. Eliakimu ina laqwaál Asori.

¹⁴ Asori ina laqwaál Sadoki. Sadoki ina laqwaál Akimu. Akimu ina laqwaál Eliudi.

¹⁵ Eliudi ina laqwaál Eleasari. Eleasari ina laqwaál Matani. Matani ina laqwaál Yakobo.

¹⁶ Yakobo ina laqwaál Yosefu, hhawaatuú Maria aayór Yesu kudá' ta babay Kristo.

¹⁷ Gawaá adoorihe iimír Abrahamu wa tleemu ay Daudi a qari mibaá nee tsiyáhh. Nee iimír Daudi wa tleemu ay qoomár loohatimisuú muu baraá yaamaá Babuloni a qari mibaá nee tsiyáhh. Nee iimír loohatimisuú muu baraá yaamaá Babuloni ay Kristo kuwa laqwaál a qari mibaá nee tsiyáhh.

Yesu Kristo kuwa laqwaál

¹⁸ Xwaylár Yesu Kristo a adoorí: Maria aayór Yesu, Yosefu gana sa'axweés. Nee dír inooín tira duxuuti'iiká, naxés Maria kari tsaáhh tawa tsiiháy ar /uuruú Qeeruú hhoohhoó' oo Mungú.

¹⁹ Yosefu, hhawaatuú Maria, a heé ganaá', nee gaa slaiiká ngiwa mureekeesi. Iri baraá muunaáwósí oó', «A qawtí máw.»

²⁰ Ala qoomár iwa kaangwí axweesi malaykamoó Aako guna i daqáy ar baraá tlata, guri báy, «Yoséfu garmoó Daudi, ma da'ayuutaar Maria kawa dux, tawa hareerók, asma tsiihaywós oo Qeeruú hhoohhoó' oo Mungú.

²¹ Inós na/oó garma gu xwayluúr, nee umuuwós kway beer Yesu, asma inós mukós gu ba/amis baraá tlakweemaaine.»

²² Tí sleémeero ina tleehharút, as tidá' Aako aa oó' ar loohír aarusmo iwa bo/, iwa kaahi,

²³ «Ga/aaweek, /amaatliito'o i tsít, na/oó garma gu xwayluúr, umuuwós kuri bay Imanueli.» gídaabárós, «Mungú i dinkwa nee atén.»

²⁴ Yosefu qoomár niwa tláy baraá gu'uteero, tidá' kwa báy nee malaykamoó Aako gari tleéhh, Maria gari duúx.

²⁵ Ala taa hara tseewuy'iiká tam ay qoomár garmaawós nguwa xwayluúr. Umuuwós guri tsaát guri báy Yesu.