Marko 9 - Biblía Axweesantá Hhohho' ar Mungú 2004

¹ Yesu giri báy, «Án a kah, baraá tla/ángw mukwihe muko i qatliiká, ay dír waawuti'iimár Mungú tidá' hardat ar /uuru kay ari.»

Kaloó Yesu iwa warqáy

² Tam alaá deelo lahhoó' iwa waaráhh, Yesu Petro nee Yakobo nee Yohane, girira tláy ay gawaá tloomár tleer inooín kilooín. Kalaywós iri warqáy dír ilaaín wa ale.

³ Tlabaawós nay /awakukuyé' ló'wa ale, niri mirari/iyé' adoodá' hee baraá yaamuwo ngir aleeslayká /awakeesaro tam ngi hhuúnts.

⁴ Eliya nee Mose niri didaádá' wa ti'iitiyé', naxés ta axwees nee Yesu.

⁵ Petro Yesu guri báy, «Intsaahhatusámo, atén a diirí diriiaán, ka hhoóeéke isleeraá tám bira tleehhaán, oo wák a kók, kuquú Mose, kuquú Eliya.»

⁶ Asma sleémeero nina da'ayuutiyé', tam Petro iwa axweesi gár i kaahi ga xuiiká.

⁷ Naxés huunki nina ti'ít, giri geehhantés, afo nay baraá huunkidá' wa ilawáts i kat, «Kwí a Garmaaeé', sla'aarusmooeé', inós iiárií qaasaak.»

⁸ Siiwadár kilae tawa qaytsiít, naxés heé dir'ín i dirií' i kaahh, aqo har Yesu kilós.

⁹ Niwa gawaá tloomár wa awditiya' Yesu gina báy, «Tidá' taa aandé' ma heé bawaara' ay dír Garmoó Hee ni baraá /aantár wa waaslee/i.»

¹⁰ Tidá' ngaa báy kari gawaá sager'ín i óh tiri kilooín yaahamisiyé', tawa kaahi, «Gídaabárós a milá tiqá' iwa kaahi, ‹Garmoó Hee ni baraá /aantár wa waaslee/?› »

¹¹ Kuri yaahaás ta kaahi, «Ahaá baré intsaahhatuusér hara'ayár Mose ta kaahi, ‹Eliya ni ala geerií hardah?› »

¹² Yesu giri báy, «A ló' Eliya ni ala geerií hardah, nee mura' sleémeero nguwa /abeemaá i ki/isi. Ala tam adoorihe, adór taa gooín a adoomá gawaá daanduú Garmoó Heewo tidá', slahh'eemisuú yaariír nguwa slay nee kuwa waaqaqai?

¹³ Án a kah, Eliya naa qaroó hardáh, inooín adoodá' ta slai sleémeero kari inós i tleéhh, tidá' Gooi i kat.»

Yesu garmoó neetlaame aa eér nguwa hungu/uús

¹⁴ Tawa dír eeharuusér i hardáh, naxés nee intsaahhatuusér hara'ayár Mose ti tlaampa'amisiyá' ar axweesani, boo/oó yaariír inooín gaa harweér.

¹⁵ Boo/aay sleémeero inós kuwa ár, tari waa/oó/ tari amoorós i ta'aaín sleémeero, kuri taaqweés.

¹⁶ Yesu giri yaahaás, «Gár tiwa tlaampa'amisa' nee inooín a umós?»

¹⁷ Heeko wák baraá boo/aydane Yesu guri báy, «Intsaahhatusámo, garmaaeé' ngwa dirók i huúw, neetlaame gwa afa qwaarés.

¹⁸ Nee qoomár neetlaame burngwa eér, gun yaamúr sláhh, slooro gay tlaqaas, sihhina' giri qirirtliimiis, nee inós sleeme i kahaakah. Eeharuuseerók ana ádbáw as neetlaameedá' ngiwa dux, ala kaa aleeslayká.»

¹⁹ Yesu giri báy, «Kuungá' qartá haratlintaao wasl, án nee kuungá' ta al hotaatimaan ay xaylá? Nee nu hubaabiim ay xaylá? Garmaasíng amor'eé' huwaare'.»

²⁰ Kuri dirós i huúw. Neetlaameedá' Yesu nguwa aán, garmaadá' guri /araamís, guri yaamií dáhh, iri gwangwara'amiít yaamuú wa ale, slooro gari tlaqaás.

²¹ Yesu baabuú garmaadá' guri yaahaás, «Gaarí ngwa eér a iimír xaylá?» Iri oó', «Iimír tawa na/aay.

²² Nee daqtá yaariire gu dararáhh baraá asla, nee baraá ma'aay, as nguwa gaasár wa sla'. Ala bar adór ta aleesleer i deer, ti gurtleer nee ti alee/is.»

²³ Yesu guri báy, «Mas kat: Bar adór ta aleesleer i deer! Umuúqo gaaro i ya/aán dír kudá' haratlintaaór kooma.»

²⁴ Baabuú garmaadá' iri gáwtí tseé', iri oó', «Aga haratlintií', dír haratlintaaor'eé' kawa /aár alee/iisáng.»

²⁵ Yesu ngiwa ár adór boo/oó muu ira tlaáhh didae, neetlaameedá' gari iigahhaát gari báy, «Neetlaamér afa wasli nar iia wasli, án a kah, quutlé' dír heewihe, slám mu baloó i ki/aara'.»

²⁶ Neetlaameedá' iri /á/, guri ak pungahhamuúr, iri qútl, inós naxés a ád heé aa gwaa' daxta. Múk yaariír tari qo oó', «Aa gwaá'.»

²⁷ Ala Yesu guri dawa óh guri tleés, iri sihhiít.

²⁸ Qoomár Yesu iwa baraá doó i dáh, eeharuuseerós guri yaahás qoomár nee inós tawa kilooín, «Ahaá, atén neetlaameedá' duuxaro masa harslaaqataán?»

²⁹ Giri báy, «Neetlaamér adoorí taworo quutlama gi ya/aandaaká, gár ga aleeslaw a har /uuruú firo.»

Yesu gwa'araarós ngiwa malé geerií oó'

³⁰ Tari tláy, Galilaya kanara waaraáhh, Yesu gaa slaiiká amór ta kay hee ngiwa xui,

³¹ asma inós i eeharuuseerós intsaahhatimis. Gana báy, «Garmoó Hee ku qaás baraá dabaá muu, inooín kway gaas. Bar gaasaro kwa hhe'eés, deelo tám bira waaráhh i waaslee/.»

³² Eeharuuseerós intsaahhastí gaa tsahhiká, ala kuri da'ayuút yaahasto.

Heé ak úr a heemá?

³³ Tari hardáh Kapernaumu. Tawa baraá dó' i dáh, Yesu giri yaahaás, «Gadaádá' a milá ta kaangaanusa' baraá loohiro?»

³⁴ Tari xasliít, asma tawa hi'iiti tan kaangaanuus áx, heé úr a heemá dir'ine.

³⁵ Iri yaamií iwiít, kudá' mibaá nee tsár giri ateét giri báy, «Barnaxes dirhunge hee i uroó slaa', gár kuwa hariím tin niinawees muu sleémeero ba/a, nee tari sagadiyusmoó muu sleémeero.»

³⁶ Na/oó niiná guri dír tla/angw'ín i huúw, guri slaqwtós i óh, giri báy,

³⁷ «Bar hee na/oó wák oo adór kwí gwa ilaóh ar umuueé', a aníng ina ilaóh. Nee bar hee aníng iga ilaóh, heé aa ilaóh a aníng kilooeeneeká, ala a aníng dinkwa nee kudá' án iga ya/aaw tina ilaóh.»

Heé nee atén ti tlaampa'amisa'aaká i gayuurén

³⁸ Yohane Yesu guri báy, «Intsaahhatusámo, heé neetlaamér duxuúm ar /uuruú umuuwók una araán. Kuri iigahhataán asma inós nee atén ti alkoomanaaká.»

³⁹ Yesu giri báy, «Mu iigahhamiitara', asma heé muruú xuawásl gu tleéhh ar umuueé', aluuwo iri malé muruú tlákw daanduueénií axwees i kaahh.

⁴⁰ Asma heé atén ti tlaampa'amiisaaká i gayuurénií dirii'.

⁴¹ Án a kah, umuúqo heewo oo kuungá' naa wahaas ar ma'aay asma tawa múk Kristo, xuaak, hariímarós ga sláy.»

Muruú múk gee/asliím baraá tlakweema

⁴² «Heé na/oó wák baraá na/iiká' ninakwe, kuká' án iga haratlinti'ii'i gwa baraá tlakweemií gee/aasl, gár kus hhó' a tlaa/ár xoosliingw kan gawaá istósií tseék, kway kwaahh baraá tlawi.

⁴³ Gawaá adoorihe barnaxes dakók kuúng u baraá tlakweemií gee/aslín, tsateek. A tsiní slafiingw kuwa sleer dakók tawa wak, ta tawa baraá asltá baloó gwaa'aaká keer ar dabaá tsár. [

⁴⁴ Baraadaádae naanaga i qatlká, asla sleeme i gwa'aká baloó ale.]

⁴⁵ Barnaxes yaaeerók kuúng u baraá tlakweemií gee/asliín, tsateek. A tsiní slafiingw kuwa sleer yaaeerók tawa wak, ta tuwa kwahhi baraá ásltí alé tawa ya'aawók koon tsaraawo. [

⁴⁶ Baraadaádae naanaga i qatlká, asla sleeme i gwa'aká baloó ale.]

⁴⁷ Barnaxes iltók kuúng u baraá tlakweemií gee/asliín, tu/eek ka kwáhh. A tsiní tawa dat baraá waawuti'iimár Mungú tawa heé ila wák, ta tuwa kwahhi baraá ásltí alé tawa ilaawók koon tsaraawo.

⁴⁸ Baraadaádae naanaga i qatlká, asla sleeme i gwa'aká baloó ale.

⁴⁹ «Asma umuú heewo ku hhoohhoees ar asla, ar adoodá' ilahhooár muruú ta tsu/i kar díwtár hhohhoeemaamisi.

⁵⁰ «Diwi ka hhoo'. Ala barnaxes maamahhoó diwi aa faák, gár ki qaasi a milá as iwa malé maamahh. «Kuungá' baraá munerhunge adór diwi tleehhité' nee wayda ar hootaak.»