Marko 8 - Biblía Axweesantá Hhohho' ar Mungú 2004

Yesu múk kume tsiyáhh nguwa /aymiís

¹ Qoomaadae boo/oó úr ina malé burumburiít. Muruú /ayma iwa faák, Yesu eeharuuseerós gari ateét gari báy,

² «Aga gurhaamuút asma boo/aywí, asma deeloorí tamaawo án nee inooín a dinkwárií diriaán, ala daxta muruú /ayma aa faák.

³ Án bira geemáw tawa qwákwár watli, /ara/eeri gi loohírií eér, asma bahh'alé amór ta dahhi ka saaw.»

⁴ Eeharuuseerós guri beér, «Mikaátér bu'uut mukwí /aymisiro heé baraá darmuuwihe ga sláw a heemá?»

⁵ Gari yaahaás, «Mikaáte ka koonda' a magá'?» Tari oó', «A faanqw.»

⁶ Yesu giri báy, «Boo/aay iwiitisaak.» Mikaáteedá' faanqw gari óh. Mungú guri sluufiís, mikaáte gari parhhamiís, gay eeharuuseerós i hanmiís kawa múk i qasmiisi.

⁷ Sleeme siyoó ninákw ku kón oo niiná. Iri malé sluufiís as siyó, giri báy, «Dír múk i qasmiisaak sleeme.»

⁸ Muu iri /ayín iri aáx. Alaá /aymaaro tawa hhe'eés, parhheemaá naa meetiye' kiri sleés, katatoó faanqw iri haáts.

⁹ Múk aa /ayin a afi qoomoó kume tsiyáhh. Yesu muu guri deelór i oó'.

¹⁰ Siiwadár kilae Yesu nee eeharuuseerós tari gawaá miringamoó i tsa/án, tari tláy ay yaamaá ta bay Dalmanuta.

Múk tlákw i layár leelehhiit

¹¹ Múk Farisayo iri dír Yesu i hardáh, as kuwa yaahamiisi, asma layár gawaá dooraá daahh kana dirósií slaá', as kuwa tlaampa'amiisi.

¹² Baraawose iri slahhaá', iri oó', «A milá mukú de'emaaká' mis layár leelehhiit? Án a kah, layár ta laqan i káhh dír mukú de'emaakae.»

¹³ Yesu giri geexáy iri malé tsa/án gawaá miringamo, iri gayuú hatlá' oo tláwtií waaraáhh.

Gadaádá' ta mikaátérár sluuftimiisi ar múk Farisayo nee oo Herode

¹⁴ Eeharuuse muruú /ayma gwa gunqaarés huwto, aqo har mukatmoó wák kilós kun kón gawaá miringamoowo.

¹⁵ Yesu giri gurbuú' giri báy, «Ga/aawaak, ti harmagahhe' nee gár ta mikaátér sluuftimiisi ar múk Farisayo nar múk Herode.»

¹⁶ Tay kilooín axweés tawa kaahi, «Gár adoorí ngisa oó' asma mikaáte kawa koomanaaká.»

¹⁷ Yesu tidá' ta axweesi gari tsaáhh, giri báy, «A milá muruusíng ta axwesa' daanduú mikaáte kawa koonda'aaká? Tam hamí a xua'aakáhe, sleeme aga tsahhi'iikáhe? Tundu sage wásle?

¹⁸ A ilaá koondá', a xumisa'aakáhe? A iaá koondá', a axamisa'aakáhe? Sleeme a inslasleera'aakáhe

¹⁹ tidá' mikaáte kooán ngiwa parhhamiís nee ngiwa haniís dír múk kume kooán? Parhheemaá naa meeti'i kataatoó taa hatsisé' a magá'?» Kuri báy, «A mibaá nee tsár.»

²⁰ «Nee mikaáteedá' faanqw naa múk kume tsiyáhh i haniís, parhheemaá naa meeti'i katatoó taa hatsisé' a magá'?» Kuri báy, «A faanqw.»

²¹ Giri báy, «Aga tsahhi'iikáhe tam hamí?»

Yesu taampár Bet-saida ngiwa hungu/uús

²² Tawa hardáh gixsár Bet-saidaro, heé taampa kuna amór Yesu i huúw. Yesu kuri harhheehhe'eés nguwa kwatiiti.

²³ Yesu heeduú taampa guri dawa óh, gurira ti'iít baraá gixsaro, guri ila' i tsuúq, guri dabaawós i qaás, guri yaahaás, «A xumísa daxta?»

²⁴ Heeduú taampa iri qaytsiít, iri oó', «Muu u mak ga/áw, ala a adór xaai tawa hi'iimiti.»

²⁵ Yesu ilaá heedaádá' giri malé kwatiít, heé taampa iri qaytsita hhe'eés, ilaawós niri ganaaiyé' xumsooro, umuúqo gaaro iri geehhoouwa hhe'és.

²⁶ Yesu guri báy, «Waátl amór do'ók, tam baraá gixsa mar oohaar.»

Lamabu'úngw Petro aa oó' daanduú Yesuwo

²⁷ Yesu nee eeharuuseerós tari tláy amór gixsadaá Kaisarea Filipi. Tawa hi'iiti loohiro eeharuuseerós gana yaahaás gana báy, «Muu iwa axweesi mata kaáhi, án a heemá?»

²⁸ Kuri báy, «Ta kaahi kuúng a Yohanedá' Baatimaamiís. Bahh'alé ta kaahi a Eliya, bahh'alé ta kaahi a aarusmoó wák baraá aaruuseedár aange.»

²⁹ Yesu inooín giri yaahaás gina báy, «Kuungá' ma katá', án a heemá?» Petro guri báy, «Kuúng an Kristo.»

³⁰ Yesu giri báy, «Tí ló' ma heé bawaara'.»

Yesu gwa'araarós ngiwa geerií oó'

³¹ Yesu giri iimu/ún intsaahhatimisuuwo iwa kaahi, «Garmoó Hee gár kuwa hariím a slahh'emisuú yaariír gun sláy, nee kuwa siasi'i nee bariise nee kaahamuusér uren ar Mungú, nee intsaahhatuusér hara'ayár Mosewo, kuri gaas, deelo tám bira waaráhh i waaslee/.»

³² Inós axweesantí gana gwa/atís ooaro. Yesu kurir bihhií suruúk nee Petro, guri iigahhaát.

³³ Yesu iri amór eeharuuseerós i warqáy, Petro guri iigahhaát guri báy, «Tláw, aluueé' ki/eek, kuúng Neétlaangw, asma inslawaywók oo Munguheeká, oo múk tawo.»

³⁴ Boo/ayduú muu guri ateét, nee eeharuuseerose, giri báy, «Umuúqo heewo bar aníng i eehartá wa slaa', gár kuwa hariím a sla'aarirós gan gunqarees, msalaábarós gari gagaar, aníng iri eehar.

³⁵ Asma umuúqo heewo oo slafiingós gu kilós ba/amisár wa slaá', gu qwaarees. Nee heé slafiingós qwaareesaro gwaa ya/an as aníng, nee as Ya/abtór hho', kwí slafiingós gu ba/amis.

³⁶ Asma hee tam yaamu sleémeero ngi slaya, gár nguwa buiya' a milá bar slafiingós aa qwaár?

³⁷ Laqaá hee gár i duuxi a umós, ar slafiingós ngur ki/isi?

³⁸ Asma umuúqo heewo oo aníng i samurumiít, nee as axweesante'eé', baraá mukuú de'emaaká' oo fuquuse nee tlakuuseero, heé adoorí ku samuruut nee Garmoó Hee, qoomár Garmoó Hee birna hardáh ar xirfuú Baabuúwós dinkwa nee malaykér hhohho'.»