Marko 7 - Biblía Axweesantá Hhohho' ar Mungú 2004

Uunuú múk urén

¹ Múk Farisayo tana geeraawós i burumburiít dinkwa nee intsaahhatuusér hara'ayár Mose bahh'alé, tidá' Yerusalemúr daahh.

² Eeharuusér Yesu kari bahh ár ta /ayín ar dabaá taa hamatliiká ar adoodá' uunuú múk Farisayo i kaahiya', kudá' daba' kiwa hamaatli qoomár bar ta /ayín.

³ Asma múk Farisayo nee múk Yahudi sleémeero daba' birka hamatliiká ar adoodá' unuuín i kaahiya', ta /ayinaká, asma unuuín awa iimír múk urén.

⁴ Tam barta baraá boo/oó daahh, ta /ayinaká ay dír ti hamtlin. Nee muruú hatlá' sleeme oo taa dir'iní hara'ayín kun tlehhaahhiit, adór slooqi'i kiwa hamtliti, nee hutli'i, nee xooslár taa tleéhh ar muqslár sirda/aten.

⁵ Mukduú Farisayo nee intsaahhatuusér hara'ayár Mosewo Yesu kuri yaahaás, kuri báy, «Ahaá, eeharuuseerók uunuú múk urén misngi eeharahatká, masta /ayín ar dabaá taa hamatliiká?»

⁶ Yesu giri báy, «Tidá' Isaya aa aarír wa oó' daanduú hhaahhafingwhunge ar ló', adoodá' kara gooín, ‹Mukwí aníng i ilaiwawaa/ ar afe, ala muner'ín ka saaw dir'eene.

⁷ Inooín aníng i tawó xirfayeemisiyá'. Gár ta intsaahhatimisi a hara'aydaá muu hariímár axweesantá Mungú wa ale.›

⁸ «Kuungá' hara'ayár Mungú ana meeré', uunuú muu kuri eehadé'.»

⁹ Aluuwo inooín giri báy, «Ka hhoo'. Loohír hhoo' aga sleeré' ar hara'ayár Mungú kar siaasia', as kahhó' uunuuhúng kiwa ota'.

¹⁰ Asma Mose ina oó', ‹Baabuúwók nee aayoorók ilaiwawa/eek.› Iri male oó', ‹Heé baabuúwós gu /ooslisliím laqaá aayo, gár kuwa hariím a gwa'ara.›

¹¹ Ala kuungá' a kata', ‹Hee baabuúwós laqaá aayo birnga báy, gadaádá' án tiwa hariím kuungá' i haniisaro daxta a Korbani, asma Korbani gídaabárós a gár taa Mungú i haniís.

¹² Gawaá adoorihe kuungá' heedaádá' ugwa ila/é' baabuúwós nee aayo ngiwa alee/iisi.

¹³ Axweesantá Mungú kari warqesé', as unuuhúng, kudá' taa amór múk urén wa ilaoté' kiwa intsaahhatimisa'. Muruú hatlá' oo yaariír sleeme oo adór kwí oo ta tlehhahhita' i deer.»

Muruú meetagaamiís

¹⁴ Boo/aydá' guri malé ateét, guri báy, «Sleémeero iiárií qaasaré' nee ka tsahhá'.

¹⁵ Gár hee i /ayi, gu meetagaská, ala tidá' baraá muunuú heé daahh, an tidá' gu meetagaas. [

¹⁶ Barnaxes hee iaá axamiis gi kón i axaasi.]»

¹⁷ Yesu dír muu ngiwa geexáy iri dáh baraá do', eeharuuseerós guri yaahás daanduú slaqsaydae.

¹⁸ Giri báy, «Tam kuungá' sleeme gár ta xua' i káhha? A xua'aakáhe adór gár hee aa /aáy muunaáwós ngur meetagaská,

¹⁹ asma i datká baraá muunuú hee, aqo har baraá gura' kilós, aluuwo nin ti'ít, kari kwaahh.» Axweesantihe gari xu'utís adór umuúqo gár /ayma ir hariín kawa /ayi.

²⁰ Giri báy, «Tidá' baraá muunuú heé daahh an tidá' gu meetagaas.

²¹ Asma inslawoó tlákw ám ni dahhi a baraá muunuú hee, kudá' hee iwa fuqtá ay, nee iwa fiisór ay, nee iwa tsu/tár ay,

²² nee iwa tsaatusmo tleehhiti, nee iwa qahusmo tleehhiti, nee iwa muruú tlákw tlehhiiti, nee iwa al/agin, nee iwa heé mure wásl tleehhiti, nee iwa iltá tlaákw ar xumiisi, nee iwa daanduú heé kaantin, nee iwa daara/an nee iwa daktu'uuti.

²³ Muruuwí tlákw sleémeero dír i dahhi a baraá muunuú hee, nee an muruudaádá' hee gu meetagaás.»

Haratlintaaór /ameenír Sirofoinike

²⁴ Yesu iri tláy didae ay amór yaamaá inslaawoó gixsár Tiro nee Sidoni. Iri dáh baraá do', asma dír i dirii'i muu mingiwa tsaáhh, ala lu/uto taa aslayká.

²⁵ /Ameenirka dasiirós neetlaame aa eér, kangós nguwa axás, iri amoorósií daqeér, iri dír ya'aawósií tumbarara'át.

²⁶ Nee /ameenidá' ar tlahhoó Yunani, ar bartá múk Sirofoinike. Inós Yesu guna harhheehhe'és neetlaameedá' ngiwa duuxi baraá dasiirose.

²⁷ Yesu gari báy, «Lakiít na/ii i ala aaxiye', asma i hariindaaká muruú /aymár na/ii kuwa seeawérií kwakwaahhi.»

²⁸ Inós guri beér, «Adoosíng a ló', Aáko, ala tam seeawér dír muruú /aymár wa xumiis, baré muruú /ayma kudá' na/ii i paahhamiisiya' guqo /ák.»

²⁹ Yesu gari báy, «As adoosíng taa oi, kiíng tláw, dasiirók neetlaameedá' gaa geemeér.»

³⁰ Iri do'ós i wátl, dasiirós gari qatií eér, neetlaame gaa geemeér.

Yesu heé iiawasli nee afawasli nguwa hungu/uús

³¹ Yesu iri malé tláy baraá yaamaá inslaawoó Tiro, iri waaraáhh ar Sidoni ay tlawtá Galilaya, tla/ángw yaamaá Gixsadaá Mibaangw gunara óh.

³² Heé iiawasli nee afawasli kuri dirós i huúw, Yesu kuri harhheehhe'eés nguwa dákwí qaasi as nguwa hungu/uusi.

³³ Yesu heedá' gurira quútl dír muko, ditsaawós giri baraá iaá heedaádií qaás, iri tsuúq, guri tsifrangw kwatiít.

³⁴ Iri gawaá doorí qaytsiít, iri slahhaá' baraawose, guri báy, «Efata,» gídaabárós a «Gweeriít.»

³⁵ Hamtidár kilae iaá heedaádá' niri axaasiyé', nee tsifraangós iri wanana'aát, axweesani gari aleesláy.

³⁶ Muu guri báy, «Kangwsíng mu heéwí ooara'.» Ala tam inós nga adoodá' bayi, tana ak ilakaaharúy alki/ituuwo.

³⁷ Waa/oo/amooro tari harwaaraáhh, tari káh, «Mura' sleémeero tlehhemuuwo gwa qoomeés. Heé iiawasli i axamiis, nee heé afewasli axweesani gaa aleesláy.»