Marko 6 - Biblía Axweesantá Hhohho' ar Mungú 2004

Yesu kuwa Nasaretír wa sií'

¹ Yesu nina amoodá' wa tláy iri kií/ ayaaín, nee eeharuuseerós ti koná'.

² Bál deelór Sabaátoro múk yaariír guna baraá doó saalíngw wa intsaahhatimís. Inooín intsaahhatimisuuwós kuri ló'wa waa/oó/, tari oó', «Kwí amór tí sleémeero ngiwa sláy a amá? Sagalooarí taa heewí haniís a sagalooár adoomá? Nee muruú xuawásl kwí i tlehhiiti a milá?

³ Kwí a kudá' peehhoó hhaslaslitakáhe? Aayoorós a Maria, hhaeewós a Yakobo nee Yose nee Yuda nee Simon. Hhaeewós awa dasu a kudá' ayaarén i diriiá'áke?» Kuri insareéhh.

⁴ Yesu giri báy, «Aarusmo dír kuwa ilaiwawa/iiká i káhh, aqo har dír ayaawós nee dír mar'eefoowós nee dír múk dooín.»

⁵ Ala inós gár aa tleéhh iri káhh baraá muruú xuawaslene baraá ayaadaádae, aqo har tiqtuusér niina gana dabáy qaás, gari hungu/uús.

⁶ Inós iri ló'wa waa/oó/ as haratlintaaor'ín wasle. Yesu iri baraá inslaawaydá' wa hi'iimiít iwa intsaahhatimisi.

Eeharuuse mibaá nee tsár kawa ya/aáw

⁷ Eeharuuse mibaá nee tsár gari ateét gari iimu/ún ya/abtooro tiwa tsár wa koomakona', gari /uuruú i haniís oo neetlaame kar duxun.

⁸ Giri hara'ayín iwa kaahi, «Bar aa'aá keerá' gaa ma huuwara', aqo har hhara kilós. Muruú /ayma mu huwaara', tam tlakwaay, tam peésár baraá tlin'iiwo.

⁹ Ya/ata' dahaasaak, inqwar mu tsadér wa huwaara'.»

¹⁰ Giri báy, «Umuúqo diiro bara hardaté', dír doó wák wa hootaak ay dír deelorhúng i fak didae.

¹¹ Dír kuungá' tunduwa ilaohiiká, nee axweesantahúng kawa slaiiká axaasaro, quutlé', didá' geexawaak, teeri ka alií kukuá', tawa gurbua dir'ine.»

¹² Gawaá adoorihe Ya/abtór hho' kari alki/iít, as muu sleémeero iwa hhu'u'un.

¹³ Neetlaamér yaariir kari duxún, tiqtuusér yaariir kari di/tár slikín, kari hungu/uumiís.

Gwa'arár Yohanedá' Baatimaamiís

¹⁴ Waawutmo Herode kaangwí guna axaás, asma kángw Yesu umuúqo diiro kwaa axaás. Muu i kaahi, «Yohanedá' Baatimaamiís naa waasleé/, gawaá adoorihe /uuruuwí in baraawós wa gadiyuus.»

¹⁵ Bahh'alé ta kaahi, «A Eliya.» Bahh'alé ta kaahi, «Kwí a aarusmo adór aaruuseedár bál geera.»

¹⁶ Ala Herode tí ngiwa axaás iri oó', «Heesíng a Yohane kudá' naa saga tsaát nina waasleé/.»

¹⁷ Asma Herode muu guna ya/aáw, Yohane kuri óh, kuri tseék. Gár adoorí ngisa tleéhh a as Herodia, harér Filipo hhiyoó Herode, tidá' Herode aa duúx.

¹⁸ Asma Yohane Herode guna báy, «Adoosíng harér hhiyaawók kawa dúx i gan'aká.»

¹⁹ Herodia loohi gana leelehhít ar Yohane ngur gas, ala gaa sleeriiká.

²⁰ Asma Herode Yohane gu da'ayumiit, asma ga xuu' adór tar heé hota ganaá', nee oo hhoohhoó' dír Munguhe. Inós guna amohhe'eemiís asma mukuwa gaás. Axweesantá Yohane gana axamiís ar qwal/amaaye, ala axweesantadaádá' inós guri sakwasleemút.

²¹ Herodia deelór pa/aangw nguwa sleér, an deeloodá' ur ar xwaylár Herode kawa inslaslay. Baldae Herode múk yaariír guna dír do'ós i dahi'ís, waawituú baraá gixsadár ayaawós nee múk urén oo askaári, nee múk urén oo yaamaá Galilaya.

²² Dasír Herodia niri hardát iri nét, Herode guri qwal/ás, nee mukdá' didí dirií' sleeme. Waawutmo Herode dasiidá' gari báy, «Án firiimáng umuúqo gár ta sla'a, án ngi haniís.»

²³ Lo'o gari /aáy gana báy, «Umuúqo gár ta sla'a ngi haniís, tam waawuti'iimar'eé' qasisaro a ya/aám.»

²⁴ Dasi iri tleér ay amór aayoorós, gari yaahás gana beér, «Gár ni firiim a milá?» Aayo gari beér, «Ságw Yohanedá' Baatimaamiís na firiimeek.»

²⁵ Hamtidár kilá' dasi nina kí/ ar gaanslaay ay dír waawutmo, guri firiín, «Gár ni slaa' a ságw Yohanedá' Baatimaamiís hamír kilá' baraá xooslmoó i qaasang.»

²⁶ Waawutmo iri gurhaamuút ló'wa ale. Ala si'ima gaa aslayká as lo'oodá' aa /aáy, nee as mukdá' didá' wa /ayiím.

²⁷ Hamtidár kilae waawutmo askaarmo guri ya/aáw ságw Yohane kuwa leehhi. Askaarmo iri tláy baraá doó tseegamo. Yohane guri saga tsaát,

²⁸ sagós nguri huúw ar baraá xooslmo, guri dír dasiidí haniís. Dasi guri dír aayoorósí hanís.

²⁹ Eeharuusér Yohane kaangwí nguwa axás tari tláy, slaqwtá Yohane kari leéhh, kari foól.

Yesu múk kume kooán nguwa /aymiís

³⁰ Yesu ya/abuuseerós guri i burumburít, tidá' sleémeero ar naa tleehhiyé', nee tidá' taa intsaahhatimís kari dirós i alki/iít.

³¹ Giri báy, «Qwalaasé' kuungá' kiloohúng amór muu iwa kahhi. Hungu/usé' gár niinawe.» Asma múk yaariír i hardarah nee kuqá' i tlatláy, inooín pa/ángw tar /ayin sleeme iri qwaár.

³² Tari tláy gawaá miringamo inooín kilooín amoodá' muu iwa kahhi.

³³ Tawa tláy, múk yaariír giri tsaáhh, tari amoodí tláy ar gaanslaay ar ya'a' baraá gixsadu sleémeero, tari giirín hardahamuuwo.

³⁴ Inós iwa gawaá miringamoó wa aweér, múk yaariír guri ár, guruuwós iri tláy, asma ngiwa ár a adór bee/ángw de'eemusmoó koomaaká. Muruú yaariír guri dir'ínií intsaahhatimís.

³⁵ Looa iwa niinawuúr eeharuuseerós guri i daqeér, guri beér, «Yaamuukaáká' a darmuú tawo. Hám daxta looa aa dát,

³⁶ mukwí geemaweek i tlay, ta áykwí ki/i, nee baraá gixsadu, i muruú /aymar'ín leelehhtuú aye'.»

³⁷ Ala Yesu giri báy, «Kuungá' na muruú /aymár i haniisaak.» Kuri báy, «Muruú /aymár shiliíngi tsiire tsár un tlaxór awána kway haniisaán kuwa /ayi?»

³⁸ Giri yaahaás, «Kuungá' mikaáte ka koonda' a magá'? Tlawsé' araak.» Arto kawa hhe'eés tari oó', «Mikaáte kooán nee siyoó tsár.»

³⁹ Giri báy, «Muu iwitisaagáy gawaá gitsór naa/, múk niiná dirqá', kuqá' dirqá'.»

⁴⁰ Tari iwiít ar daqooraay, diirí mibeeri kooán, tiqá' tsiiru.

⁴¹ Mikaáteedá' kooán nee siyoódá' tsár giri óh, iri gawaá doorí qaytsiít, iri sluufiís, mikaáteedá' gari dír eeharuuseerósí qasmiís kawa múk i hanmiisi. Nee siyoódá' tsár guri qasmiís dír muu sleémeero.

⁴² Muu sleémeero iri /ayín tay aáx.

⁴³ Eeharuuse katatoó mibaá nee tsár guri dalá/ parhheemaá naa meeti'i dír mikaátér wa ale nee siyó.

⁴⁴ Múk aa /ayin sleémeero a kume kooán, hhawaate kilooín.

Yesu i gawaá tlawtá wa hi'iimiit ar ya'a'

⁴⁵ Eeharuuseerós gari báy, «Tsa/amé' gawaá miringamo, geerií hi'iité' ay gayuú Bet-saida.» Qoomaadae inós i deelór kah dír boo/ayduú muu.

⁴⁶ Deelo ooaro ngiwa hhe'eés, iri firór áy gawaá tlooma.

⁴⁷ Tsiindo niwa xayé', miringamo i baraá tla/ángw tlawi. Yesu a kilós amór yaamaá kaahare.

⁴⁸ Eeharuuseerós gari ár i baraá tlawtá wa daawimít, asma miringamo gan'aasa ga ya/a/anká asma fur'a gu ila/aán. Qoomár ságwlooa tleemu iwa xeér, inós i gawaá ma'áy wa hi'iimiit, i amor'ín káy. Qoomár iwa lak waaraahhi,

⁴⁹ kuwa ár i gawaá ma'áy wa hi'iimiit, inooine a hhaantamo. Tari tseé'.

⁵⁰ Asma inooín sleémeero inós kuwa ár, tari amoqwaár. Ala siiwadár kilae inós giri báy, «Ma amoqwaqwadiimara', hee a aníng. Dae mawaak.»

⁵¹ Iri gawaá miringamooín kudií tsa/án, fur'a iri xaslít. Tari baraá muner'íní waa/oó/,

⁵² asma kaa tsaahhiiká gídaabár mikaáteedá' a umós, asma muner'ín adoodá' gaa ya/aandiiká.

Yesu tiqtuuse ngiwa Genesaretír wa hungu/uumiís

⁵³ Tlawi kingiwa faák tari hardáh yaamaá Genesareti, miringamo kuri tseék.

⁵⁴ Inooín tindiwa gawaá miringamoó wa aweér, Yesu kuri tsaáhh nee muu.

⁵⁵ Tari haratláy sleémeero, yaamuudá' kiri harweér, tiqtuuse kari huwahuúw umuúqo dír kwi axaasi.

⁵⁶ Nee umuúqo dír aa kayi baraá gixsaduuwo nee tla/ángw ayko tiqtuuse kana dinkwarí burumbuúr didár boo/aay. Kuri harhheehhe'eemiís kuwa kwatiiti tam pasltá inqwaarirós. Nee kudá' sleémeero ngwa kwatimiitiye' tari hungaaguú/.