Marko 5 - Biblía Axweesantá Hhohho' ar Mungú 2004

Yesu heé neetlaame aa eér nguwa hungu/uús

¹ Tari hardáh gayuú tlawi baraá yaamaá múk Gerasi.

² Hamtidár kilae Yesu niwa gawaá miringamoó wa aweér, tina doogiyé' nee heeko neetlaame aa eér, i amór /aantaá daahh,

³ asma inós in amór /aantaá hootaatín. Tam heé ila/aro gwa aleeslay i kaahh, tam tseegamooro. Tam qutúr sleeme ila/aro guna harslaaqaát.

⁴ Asma daqtá yaariire ku tsegaagiit ar qutúr daba' nee ya'aawo, ala gun tlaqaqaat. Tam heé /uuruuwo gwa aleeslay i kaahh.

⁵ Nee deelo sleémeero xweera nee tlaatla/aango amoodár /aantu gin wa iwaawiit, nee gawaá tlom'i. Nee slám in tseeamaamín nee tin tlaaqaaqán ar tlaa/e.

⁶ Heedaádá' Yesu nguwa amorqá' saáw i ár, guna i ta'aaín, guri i tumbarara'aát,

⁷ iri tseé' ar afór ur i kaahi, «Yésu, Garmoó Munguú Gawa, án nee kuúng a milá? Un firiím ar umuú Mungú, mi slahh'eemisaar.»

⁸ Asma geeraawo Yesu neetlaame gana báy, «Kuungá' neetlaáme, dír heesíng geexawaak.»

⁹ Yesu guri yaahaás, «Umuuwók a heemá?» Iri oó', «Umuueé' a Daqa, asma atén ti yaariír.»

¹⁰ Heedá' neetlaame aa eér Yesu guri ló'wa harhheehhe'eemiís, asma neetlaameedá' mingiwa guús baraá ayaá hatlá'.

¹¹ Nee daqtá ur ar baynu i deer didaádae ar ta de'en bihhaá tloomár wa ale.

¹² Neetlaameedá' Yesu guna harhheehhe'eemís guri beér, «Atén ti gus amór baynu asma kiwa awaan.»

¹³ Yesu iri ya/án. Neetlaameedá' heedaádá' guna geexeér, baynu giri eér. Daqtadár baynu sleémeero iri baráy /ét ar ti'iingw, iri /ét baraá tlawi. Baynuudá' niri baraadií qatliyé', faaror'ín a kume tsár.

¹⁴ De'eemuusér baynu iri góp, kangwdá' guri baraá gixsár wa alki/ít nee inslaawaydae. Muu niri ti'iít as gadaádá' aa tleehharut kawa ari.

¹⁵ Tari amór Yesú ii daqáy, heedaádá' geeraawo neetlaame aa eér kuri ár, aa iwiít, i tlabaawós kón, nee fuquraangose. Inós an kudaádá' geeraawo daqtadá' koóm. Tari da'ayuút.

¹⁶ Mukdá' tlehhemi'iidaádá' gaa geerií ar, adór heedaádá' neetlaame aa eér qoomár geeraawo aa /imiís kari alki/iít, nee kángw baynuwo.

¹⁷ Yesu kuri firín iwa tlay ayaaine.

¹⁸ Qoomaadá' inós iwa tsa/a/an gawaá miringamoó i alé, heedaáduú geeraawo neetlaame aa eér guri firín as tiwa kona' nee inós.

¹⁹ Ala Yesu gwa ya/aniká nee inós tiwa kona'. Guri báy, «Tláw amór doohúng nee amór mukók, gár afhhamít ar Aako naa kuúng i tleéhh alki/iiteek dir'ín i alé, nee adór inós ura gurtláy.»

²⁰ Iri tláy baraá yaamaá Dekapoli, muruudá' slahhaá' oo Yesu aa inós i tleéhh guri iimu/ún alki/ituuwo. Muu sleémeero iri waa/oó/.

Dasír Yairo nee /ameenír inqwaarír Yesu gaa kwatit

²¹ Qoomár Yesu niwa gayuú hatlá' oo tlawtá wa kií/ ar miringamo, qoomár iwa afaá tlawtí dirii'i múk yaariír guna i burumburiít.

²² Heeko úr oo doó saaliingw guri didí áy. Umuuwós a Yairo. Inós Yesu nguwa ár, iri dír ya'aawósí tumbarara'aát,

²³ guri ló'wa firín guna báy, «Dasir'eé' tooka niina i afkú bohóngw i dirí'. Xa qwaláng, dakók i qaaseek, i hungu/, miwa gwá'.»

²⁴ Tiri koné' nee inós. Mukdá' yaariír guri eehár ar tliqa.

²⁵ Nee /ameenirka i deer ar tiqaaqiim kureeri mibaá nee tsár ar tiqtír ubíngw tseerdu.

²⁶ slahh'emisuú yaariír gwa slaasleér ar dabaá qwaslaarér yaariir. Muruuwós sleémeero iri faák, sleeme aa gaa buiiká, aqo har tiqtirós gana albúhh.

²⁷ Kángw Yesu nguwa axás, iri baraá tla/ángw múk ar ót ay alaá Yesu inqwaarirós gari kwatít,

²⁸ asma ina baraá muunaáwós i ó', «Inqwaarirós kilós bara sangw kwatiít, a hunguú/.»

²⁹ Hamtidár kilae tseerduuwós nay qawiyé', gari kilós tsáhh baraá slaqwtose adór ira hungú/.

³⁰ Hamtidár kilae Yesu gari tsaáhh adór /uuruuwós oo hungu/umis ir gadiyuús dír heekó wa ale. Iri amór múk i warqáy iri oó', «Heé inqwaarir'eé' gaa kwatiit a heemá?»

³¹ Eeharuuseerós guri beér, «Múk yaariír adór ur tliqiít u ga/eerakáhe? Kuúng mas malé yaahamís tawa kat, ‹Heé án iga kwatiit a heemá?› »

³² Iri qaytsiít bihhe sleémeero, asma heé adoodá' gaa tleehh nguwa artá wa slai.

³³ /Ameenír aáng iri daaraxát daeero, asma gaa xú' gár ga wa tleehharut, iri hardát amór Yesu, iri dír ya'aawós i tumbarara'át, looeema sleémeero giri dirós i alki/ít.

³⁴ Yesu gari báy, «Dasir'eé', haratlintaaoorók kiíng iga hungu/ús, tláw ar wayda, adoosíng tara hungú/ koomeek.»

³⁵ Iwa baraá axweesantadí kahhi, mukko nina hardáh, i amór doó heedaádá' úr oo doó saalíngw daahh, ta kaahi, «Dasirók aa gwá', gár Intsaahhatusmo kus malé daawitimiisaan daxta i káhh.»

³⁶ Ala Yesu axweesantadá' ngiwa axaás kawa axweesi, heé úr oo doó saaliingw guri báy, «Ma da'ayuumiitar, án kilooeé' na haratlintiáng.»

³⁷ Tam heé aa ya/án i kaahh oo nee inós ti koomá', a har Petro nee Yakobo nee Yohane, hhiyoó Yakobo.

³⁸ Tari hardáh dír doó heedaádá' úr oo doó saaliingw. Yesu múk yaariír guri ár oo aa amoqwaar. Inooín ta /aa/amín nee ta ló'wa tsuunqumiis.

³⁹ Iwa baraá dó i dáh, gina báy, «Masa amoqwadé'? Nee mas /aa/amiindá'? Dasi aa gwaiká, in gú'.»

⁴⁰ Kuri ló'wa waaqaseesén. Inós mukduú hatlá' nguwa tsee/áy duúx, baabuú dasiidaádá' nee aayoorose ginara tláy, nee mukdá' nee inós ti koomá', tari dáh amoodár dasi i diri'.

⁴¹ Dasiidá' gari dawa óh, gari báy, «Talita kum,» gídaabárós, «Dási, án a kah tláw.»

⁴² Dasi iri sihhít, iri hi'iimít, asma a dasír kureeraá mibaá nee tsár gaa eer. Adoodá' kari ló'wa waa/oó/.

⁴³ Giri ló'wa hara'ayín gina báy, «Kaangwí mu dír heé i ooara'.» Giri báy, «Dasi muruú /aymár i haniisaak.»