Marko 4 - Biblía Axweesantá Hhohho' ar Mungú 2004

Slaqsoó dahaasusmo

¹ Yesu iri malé afaá tlawtá wa intsaahhatimís. Boo/oó yaariír guri i burumburiít. Inós iri tsa/án gawaá miringamooko baraá tlawtí dirií', as tliqa, iri iwiít. Nee boo/aydá' sleémeero gwa i burumburiit i afaá tlawtí dirii' amór yaamaá kaahaar.

² Muruú yaariír guri intsaahhatimís ar slaqsi'i. Qoomár iwa intsaahhatimisi ina oó',

³ «Iia qaasaak, heeko ina dahaasíngw áy,

⁴ qoomár iwa dahaasin, dahaasiingw bahh'alé ina paáhh afaá loohi. Tsir/o niri hardát, dahaasingwdá' guri /ák.

⁵ Oo hatlá' ina paáhh gawaá tla/u, didae hhapér yaariir i káhh. Dahaasingwdá' niri ti'iít ar gaanslaay, as hhapér bu'uut iwa kahh gawaá daanduú tla/uudae.

⁶ Tsee/amá iwa gwa/aát iri káh, asma dír dee/ár nguy sihhi i káhh.

⁷ Oo hatlá' iri paáhh baraá laqaya', laqayaadá' niri uraarayé', dahaasingwdá' kuri tliíq, iri laqwaaliiká.

⁸ Dahaasíngw hatlá' iri paáhh dír hhapér hho'. Dahaasingwdá' niri ti'iít, iri uraaráy, iri laqwaál, oo wák mamu mibeeri tám, nee oo wák mamu mibeeri lahhoó', nee oo hatlá' mamu tsiiru.»

⁹ Yesu giri báy, «Heé iaá axamis gi koóm, i axaasi.»

Gár slaqsi'i kisar intsaahhatimisi

¹⁰ Boo/aydá' yaariír sleémeero iwa diya/aát, Yesu iri kilós meét. Nee mukdá' didií meet Yesu kuri i daqáy dinkwa nee eeharuuseedá' mibaá nee tsár, kángw slaqsi'iidá' kuri yaahaás.

¹¹ Yesu giri báy, «Kuungá' naaqór waawuti'iimár Mungú aga xué', ala dír mukduú hatlá' oo tsee/aawo kan kah ar slaqsi'i,

¹² as kahhó', ‹Ta qaytsiti ala makawa ár, ta axaasi, ala makawa tsaáhh, Mungú mukuwa i warqáy nee gurtleemuú tlakweema mukuwa sláy.› »

Gídaabár slaqsoó dahaasusmo

¹³ Yesu giri yaahaás, giri báy, «Kuungá' slaqsaywí u xua'akáhe? Ala slaqsi'i sleémeero adór kir tsahha'?

¹⁴ Dahaasusmoodá' gár i dahaasin a axweesantá Mungú.

¹⁵ Dahaasingwdá' aa paahh baraá loohi, an slaqsoó mukdá' axweesantá Mungú gaa axaas, nee Neetlaangw iri hardáh, tidá' taa baraá muner'íní dahaás gari hingeés.

¹⁶ Kudá' aa paahh gawaá tlaa/a an slaqsoó mukdá' axweesantadá' gaa axaas, nee gari ilaóh ar qwala/.

¹⁷ Ala dee/ár i kaahh baraaine, nee tan hoot qoomár niinawe. Aluudaádae slahh'amaaye laqaá gusisiingw binda ti'iít as daanduú axweesantadá', tari dukuuts.

¹⁸ Nee kuduú hatlá' taa dahaás baraá laqaya' an slaqsoó mukdá' gaa axaas,

¹⁹ ala tari daawimiit as muruú slafiingw oo baraakaá yaamu. Daqaari'iimár yaamu gina uurúx, nee ilatleerír muruú dimbadimbé oo baraaká'. Gawaá adoorihe axweesantadá' pa/ángw ir laqwal gwa sleeriiká.

²⁰ Nee kudá' taa dahaás baraá hhapér hho' an slaqsoó mukdá' axweesantadá' gaa axaas, nee gari ilaóh. Axweesantadá' irí laqwál baraá muner'íne, mamu mibeeri tám, nee mamu mibeeri lahhoó', nee mamu tsiiruú wák.»

Tsaa'astá baraá geetlakweema

²¹ Yesu giri báy, «A adoomá? Hee i deéro oo tsaa'asi ga dír geetlákw i qaás, laqaá guruú qatani? Dír kay qamaamin a dír geehhoo'.

²² Umuúqo gaaro ar geehhooeeká iri geehhoouúr, nee umuúqo gaaro ar taa luú/, ka geehhooees.

²³ Heé iaá axamis gi koóm, i axaasi.»

²⁴ Giri báy, «Qaytsité', har qoomaydá' kuungá' tar qoomaamesa', kungu kuungá' i qoomeemees, nee sleeme kunguri har waarahhaas.

²⁵ Umuúqo heewo oo gár koóm ka dook, nee kudá' gár koomaaká, tam tidá' i kon ka hayoh.»

Slaqsoó dahaasíngw naa ti'iit

²⁶ Yesu iri oó', «Waawuti'iimár Mungú slaqsaywós a adór heé aa dahaasin.

²⁷ Dahaasingwdaádá' niri ti'iít, iri uraaráy umuúqo deeloóro ar adór inós i xuiiká, asma inós xweeraawo in guu', tlaatla/ango in baraá gadiyeduuwós i tláy.

²⁸ Asma balaangw in baraá hhapér wa kilós /aluus, haywi niri ti'ít, aluuwo hhaansli, aluuwo tari balaangw.

²⁹ Balaangw iwa haamaár, tsataay guri óh, asma bu'uungw aa xáy.»

Slaqsoó ilmoó haradaáli

³⁰ Yesu iri oó', «Waawuti'iimár Mungú gár kar slaqsan a milá? Laqaá slaqsoó kar qoomeesaan a umós?

³¹ Waawuti'iimarí a adór ilmoó xa'anooko ta bay haradaáli. A ilmoó niiná ló'wa ale baraá dahaasiingw sleémeerowo.

³² Ala burkwa dahaás in uráy, iri kiintuú úr tleehhiit oo xaa'aá gauuwós sleémeero gi baá/. Haleemaá uren gay tleehh, tam tsir/o maray'ín giri baraá mahhatírósí tlehhít.»

Adór Yesu ira axweés ar slaqsi'i

³³ Axweesantós gana alki/iít dir'ín i alé ar slaqsa'aá yaariir awa adoorí, ar har qoomoó inooín axaasaro taa aleesláy.

³⁴ Umuú gár aa dir'ín i axweesi, gana axweés ar slaqsi'i, ala dír eeharuuseerose qoomár tawa kilooín sleémeero gana gwa/atís.

Yesu tlawi ngiwa xasltís

³⁵ Baalaadár kilae tsiindo niwa xayé', eeharuuseerós gari báy, «A gayuuqá' i waarahhaán.»

³⁶ Mukduú hatlá' kuri geexáy, tay al tláy ar miringamoodá' inós i dirii'i, nee miringér hatlá' tay koné'.

³⁷ Fur'ár ur gina baraá tlawtí eér, ma'aay fur'a giri leexwanduúr, nay tsifaqamiitiyé' baraá miringamo, nee miringamo iri lak haáts ma'aywo.

³⁸ Yesu i guu' baraá miringamoó wa ale amór alu, sagós gwa tlakwaá'. Kuna tleés, kuri báy, «Intsaahhatusámo, a gaarookáhe diroge atén tawa qwaaraan?»

³⁹ Ina tláy, fur'a gari i gahhaát, tlawi gari báy, «Xasliít, amohhooúw.» Hamtidár kilae fur'a iri xaslít, tlawi iri ló'wa amohhoouúr.

⁴⁰ Giri báy, «Mas adoosír da'ayumitá'? Tam ay hamí haratlintaaorhúng i káhha?»

⁴¹ Daér ur giri eér, tari kilooín axweés, tari oó', «Heewí a heé adoomá? Asma fur'a nee tlawi tidá' ngaa báy ngi tlehhiitiyá'.»