Marko 3 - Biblía Axweesantá Hhohho' ar Mungú 2004

Yesu heé aa dawa sol'oot nguwa hungu/uús

¹ Aluuwo Yesu iri malé dáh baraá doó saaliingw, nee baraadane heeko i deer oo dakós aa sol'oot.

² Kuri gigidín as kuwa ari, áx heedaádá' gu hungu/uúsi deelór Sabaátoro, as kahhó' kuwa sakwasleemuuti.

³ Yesu heedaádá' dakós aa sol'oot guri báy, «Baraá tla/aangw i sihhiiteek.»

⁴ Muu guri yaahaás, «Gár hariim tleehhamoro deelór Sabaátoro a milá? Gár hhoóe laqaá gár tlaakw? Hee kuwa hungu/uúsi, laqaá kuwa gaasi» Tari xasliít.

⁵ Iri gurhaamuút asma gawdeemaá muner'ín, giri ilií duxún bihhe sleémeero ar buhhta, heedaádá' guri báy, «Dakók gan'aaseek.» Heedaádá' dakós guri gan'aás, dakós iri hunguú/.

⁶ Siiwadár kilae múk Farisayo nee múk Herodewo tari ti'iít, tari kwasleemuút daanduú Yesuwo, as adór kur gaasi kawa slay.

Boo/oó afaá tlawi

⁷ Yesu tiri paraátl, inós nee eeharuuseerós, iri tláy amór tlawi, kuri eehár nee boo/oó yaariír. Mukwí sleémeero amór i dahhi a amór yaamaá Galilaya nee yaamaá Yudea,

⁸ nee gixsár Yerusalemu nee yaamaá Idumea nee gayuú Yordani nee bihhér Tiro nee Sidoni. Mukwí Yesu guri i daqáy asma kángw muruudá' sleémeero aa tlehhiít, kwaa axaás.

⁹ Eeharuuseerós gari báy, «Miringamo dir'eénií tseweesare', boo/aay miwa tliíq.»

¹⁰ Asma múk yaariír guna hungu/uumiís, awa slahh'amuú dimbadimbé ngu koomá' sleémeero kuri i tseewúy ar tliqa as kuwa kwatitár wa slai.

¹¹ Nee mukduú neetlaame aa eér umuúqo siiwaro Yesu burkwa ár, tan dír geeraawosí tumbarara'aamiit, tan tseeamín ta kaahi, «Kuúng an Garmoó Mungú.»

¹² Giri ló'wa i axwees gina báy, «Án mi xu'utisara'.»

Yesu eeharuusér mibaá nee tsár ngiwa tsawaár

¹³ Yesu iri tsa/án gawaá tlooma, kudá' inós aa slaá' giri ateét, kuri i daqáy.

¹⁴ Múk mibaá nee tsár guri tsawaár as tawa ya/abuuse as kahhó' tawa dinkwa nee inós, nee nguwa ya/aawi as axweesantá Mungú ngiwa alki/itiyá',

¹⁵ slám /uuru nguwa kona' oo neetlaame duxuungw.

¹⁶ Eeharuuseedá' mibaá nee tsár gana qaás. Inooín a kuká': Simon, kudá' aa umuú hatlá' i tsaát a báy Petro,

¹⁷ nee Yakobo garmoó Sebedayo, nee hhiyaawós Yohane, giri umuú hatlá' i tsaát, a Boanerge, gídaabárós a daaqoó tsimaahhuuse,

¹⁸ nee Andrea, nee Filipo, nee Bartolomayo, nee Matayo, nee Tomas, nee Yakoboó Alfayo, nee Tadayo, nee Simonudá' yaamuuwós aleeslaáqw,

¹⁹ nee Yuda Iskarioti, kudá' Yesu gwaa sakii/.

Yesu nee Be'elsebuli

²⁰ Aluudae Yesu iri waátl amór do'. Boo/aay iri malé burumburiít, tam inooín pa/ángw muruú /ayma kur /ayi kwaa slayká.

²¹ Múk dooín kaangw nguwa axaás tari tláy as kuwa oohi, asma ta kaahi, «Sagós aa hhitiruút.»

²² Slám intsaahhatuusér hara'ayár Mose, tidá' amór Yerusalemúr daahh ina kát, «Yesu kwaa i dáh nee neetlangwdá' úr ta bay Be'elsebuli, nee i neetlaamér duxún ar /uuruú neetlangwdá'.»

²³ Yesu muu guri ateét, guri i axweés ar slaqsi'i, giri báy, «Neetlaangw kilós duxuungo ti aleesláya?

²⁴ Nee waawuti'iima birti kilós tlaampa'aamís, waawuti'iimadá' sihhiita ga aleesleeraaká.

²⁵ Nee múk doó wák birti kilooín tlaampa'aamiisiyá', do'dá' sihhiita ga aleeslayká.

²⁶ Nee bar Neetlaangw ti kilós i slaaqw, tiri paraatliít, sihhiita ga aleeslayká, ala alhhe'eesaywós naa hardáh.

²⁷ «Heé dahamu gu aleesláw baraá doó heé /uuruú koóm i kaahh, xoosla gay hayoh, barnaxes heedaádá' /uuruú koóm gwa geerií tseegiiká, daqaní do'dá' gway sangw /awa/awín.

²⁸ «Án a kah, tlakweema sleémeero awa muu ki gurtláy, nee /ooslislingw'ine,

²⁹ ala heé Qeeruú hhoohhoó' oo Mungú gwa /ooslin, tlakweemaawós ki baloó gurtlayká, inós tlakweemaá ta baloó gurtlayká ay alhhe'eesay wasle gaa tleéhh.»

³⁰ Inós adoorí gana oó' asma adoodá' inooín tawa kaahi, «Neetlaame gwa eér.»

Hha'aá Yesu nee aayír'ín

³¹ Aayoorós nee hhaeewós awa daaqaay tari hardáh, tari tsee/áy sihhiít, hee kuri ya/aáw Yesu nguwa ateeti.

³² Qoomaadae boo/aay aa iwiít, inós kwa harweér, kuri báy, «Ga/aaweek, aayoorók nee hhaeewók ta tsee/áy dirii', kuúng tun slaa'.»

³³ Giri báy, «Aayor'eé' nee hhaee'eene' a ín heemá?»

³⁴ Mukdá' aa iwiit guri i qaytsiít, kudá' gwa harweer bihhe sleémeero, iri oó', «Ga/aawaak, aayor'eé' nee hhaee'eé' a kuká'.

³⁵ Asma umuúqo heewo oo sla'aarír Mungú ga tleéhh, kwí an hhiyaaeé' nee hho'or'eé' nee aayor'eé'.»