Marko 2 - Biblía Axweesantá Hhohho' ar Mungú 2004

Yesu heé tiqtír sol'omit nguwa hungu/uús

¹ Alaá deelór niinawe Yesu iri male dáh baraá Kapernaumu, kari axaás adór ir dóí dirií'.

² Múk yaariír ina burumburiít, tam pa/aangw aa meetiiká dír afkú do'o. Inós axweesantá Mungú gari dir'íní alki/iít.

³ Múk tsiyáhh heé tiqtír sol'omituú koóm kunguri dirósí huuw, kungwa himbeét.

⁴ Inooín Yesu i tsewuwto kuwa harslaaqaát as boo/oó muu, daanduú do' kuri fooxiís afi qoomaadá' inós i dirii'i. Fooxisaro kuwa hhe'eés, tiqtusmoodá' kuri didár aweeriís ar hhaftuuwós.

⁵ Yesu haratlintaaór mukdá ngiwa ár, tiqtusmoodá' guri báy, «Garmaaeé', tlakweemaawók kaa gurtláy.»

⁶ Nee baraá tla/angw'ine intsaahhatuusér hara'ayár Mose bahh'alé i deer ar iwiwiit, ta baraá muner'ín i kaahi,

⁷ «Asma milá mis adoorí kah? I Munguú /ooslislín. Heé tlakweema gurtleemuuwo gi aleesláw a heemá? A har Mungú kilóseéke?»

⁸ Ala Yesu adoodá' i baraá muner'íní axweesiyá' gari adaá tsaáhh baraá qeeruuwose giri báy, «Asma milá adoosíng mas baraá munerhúngí aldakwtá'?

⁹ Gár ák inslaahh a gaalá, a heé tiqtír sol'omituú koóm kuwa báya, ‹Tlakweemaawók kaa gurtláy›, laqaá kuwa bay, ‹Sihhiít, hhaftuuwók gagaareek, tláw.›

¹⁰ Ala kuungá' xuaak adór Garmoó Hee aleesleemu ngur kón baraá yaamuwo oo tlakweema ngiwa gurtlay.» Tiqtusmoodá' guri báy,

¹¹ «Án a kah, sihhiít, hhaftuuwók gagaareek, waátl amór do'ók.»

¹² Siiwadár kilae heedaádá' iri sihhiít, hhaftuuwós guri gagaár, iri ti'iít geeraá muu sleémeero, muu sleémeero iri waa/oó/, Mungú kuri xirfayeemiís, tay káh, «Kureeriiwo gár adoorí aga baloó araaniiká.»

Yesu Laáwi nguwa ateét

¹³ Yesu iri malé tláy ay amór afaá tlawi, nee boo/aay sleémeero iri amoorós i daqáy, inós guri intsaahhatimís.

¹⁴ Qoomár iwa waaraahhi, Laáwuú Alfayo guna ár, aa iwiít baraá doó ohmér koódi. Guri báy, «Eeharáng.» Laáwi iri tláy, guri eehár.

¹⁵ Qoomár Yesu iwa dír muruú /aymaárií iwiít, dír doó Laáwiwo, ohomuusér koódi ar yaariir nee tlakuuse tana al iwiít nee Yesu nee eeharuuseerose, asma múk gwa eehar ku yaariír.

¹⁶ Intsaahhatuusér hara'ayár Mose nee múk Farisayo kuwa ár, inós iwa al/ayna' nee ohomuusér koódi nee tlakuuseero, eeharuuseerós kari báy, «Asma milá mis al /ayiná' nee ohomuusér koódi nee tlakuuseero?»

¹⁷ Yesu adoodá' ngiwa axaás, giri báy, «Múk slaqoo hhó' i qwaslaarmoó leelehhiitiiká, aqo har tiqtuuse. Aníng naa hardihiiká as múk hota ganaá' nguwa ateetiim, ala nina hardáh as tlakuuse.»

Yaahasa daanduú gwaawito

¹⁸ Qoomár eeharuusér Yohane nee múk Farisayo tawa gwaawín, muu iri hardáh dír Yesu, kuri báy, «Ahaá baré eeharuusér Yohane nee eeharuusér Farisayo i gwaawiwiín, eeharuuseerók gaálay i gwaawawiin.»

¹⁹ Yesu giri báy, «War/aá garmoó duuxuxuúm mihar gwaawiná' qoomár barta dinkwa nee garmaadá' duuxuxuúm? Qoomaadá' sleémeero tawa dinkwár i dirii'i nee garmoó duuxuxuúm, gár tas gwaawin i káhh.

²⁰ Ala deelo i hardát ar garmoó duuxuxuúm kuwa hingeesi, nee deelaadá' an baalár tawa gwaawin.

²¹ «Hee i kaahh oo warqamoó /abén gwa waraáq ar inqwaarír qaren. Ala burungwa hiriít, warqamoodá' /abén inqwaaridá' aa gwa' ga hhitín, nee didá' aa feehhit i ló'wa doogiín.

²² Tam hee i kaahh oo difaáír /aben ga qamaamiím baraá tlakoó kaahari oo qarén. Biringa qaás, difaáidá' tlakw'iidaá kaahari gi tsú/, difaáí iri ku'út, nee tlakw'iidá' niri hhitiruutiyá'. Ala difaáír /aben dír ki qamaamin a baraá tlakw'aá /abén.»

Yaahasa daanduú deelór Sabaáto

²³ Yesu nee eeharuuseerós tawa waaraahhi ar baraá qamaá angaáno deelór Sabaátoro, eeharuuseerós angaáno guri giqeér guri pikimís guri /ák.

²⁴ Múk Farisayo Yesu kuri báy, «Ga/aaweek, eeharuuseerók baré adór hariimaaká gan tlehhít bál deelór Sabaátoro.»

²⁵ Giri báy, «Aga soomusi'iikáhe adoodá' Daudi aa tleéhh qoomár inós nee mukdá' ti alkoomá' tawa qwariimiít,

²⁶ tana dáh baraá Doó Mungú qoomár Abiatari tawa kaahamusmoó úr oo Mungú. Inós ina dáh baraá Doó Mungú, mikaáteedá' taa qaás as Mungú gari /aáy, tidá' hariimaaká /aymaaro, aqo har kaahamuusér Mungú kilós. Mikaáteedá' gari haniís sleeme dír mukdá' nee inós ti al koomá'.»

²⁷ Giri báy, «Deelór Sabaáto kana tleéhh as hee, ala hee kwa tleehhiiká as deelór Sabaáto.

²⁸ Gawaá adoorihe Garmoó Hee an Aakoó deelór Sabaáto sleeme.»