Marko 16 - Biblía Axweesantá Hhohho' ar Mungú 2004

Waasle/uú Yesu

¹ Deelór Sabaáto iwa waaráhh, Maria Magdalene nee Salome nee Maria aayór Yakobo mooyaangw kuna tlaáxw oo slaqwtá Yesu kar sliki.

² Bál deelór Jumaapíli matlaatleero qoomár looa niwa tsiiríhh tari amór /aantár káy.

³ Loohiro niri kilooín axweesiyé' ta kaahi, «Heé tlaa/adár gawaá afkú /aanta ga gwangwaraá' a heemá?»

⁴ Tawa qaytsiít, naxés tlaa/adá' kana ár kaa gwangwaraá', slám ka ló'wa yangaariir.

⁵ Tari dáh baraá /aanta, masoomoó inqwaarír /awaák nga tsiit kuri ár, aa iwiít bihhaá doó /iyáy, tari waa/oó/.

⁶ Inós giri báy, «Ma waa/oo/amimara'. Aníng a xuú' kuungá' heé ta leelehhita' a Yesú Nasareti, kudá' taa gawaá msalaábár i kikií'. Aa waasleé/. Diirihe i kaahh. Ga/aawaak, didá' geeraawo kway qaás a diirí.

⁷ Ala tlawsé', Petro dinkwa nee eeharuuseero ki beera', ‹Yesu aa Galilayárí giirín. Amoodae u aandá' adoodá' ngira geerií oó'.› »

⁸ Tari tsee/áy ti'iít, tari ta'aaín dír /aantaro, asma daaraxaay gina áy nee waa/oo/amo. Taa sangw heéwí ilawatsiiká asma nina da'ayutiyé'. [

Yesu Maria ngiwa harati'iít

⁹ Bál Jumapíli matlaatleero Yesu iwa waasleé/, heé aa geerií harati'iít a Maria Magdalene, tidár aáng neetlaamér faanqw ngiwa duxún.

¹⁰ Inós mukdá' aáng nee Yesu naa aldinku'umaamisiye' guri ádbeemuú eér. Inooín qoomaadae ta kumiit tsuunqumis nee /aa/eewo.

¹¹ Inooín kawa axaás adór Yesu ir slaáf, nee adór inós ngura aán, taa ya/aniiká.

Yesu eeharuusér tsár ngiwa harati'iít

¹² Alaá tihe múk tsár guri harati'iít baraaine ar slaqsoó dimbé. Inooín qoomaadae ta loohír i dirii' ta áykwí waatl.

¹³ Nee kuká' nay tlayé', kaangw kuri ilahaniís amór kudaá hatlá'. Ala naa malé ya/ani'iiká.

Ya/abtór eeharuuseedá' mibaá nee wak

¹⁴ Alhhe'eesaywo eeharuuseedá' mibaá nee wak qoomár tawa /ayin gari harati'iít. Giri i gilín asma haratlintaaowasler'ín nee asma muner'ín kawa gawdén, asma inooín axweesantá mukdá' inós gwa ar, alaá niwa baraá /aantár wa waasleé/, kaa haratlintii'iiká.

¹⁵ Aluuwo Yesu giri báy, «Tlawsé' baraá yaamu sleémeero, Ya/abtór hho' alki/iitaak dír muu sleémeero.

¹⁶ Oo gaa haratlintatii' kway baatiís ba/ama ga sláy. Oo gaa haratlinti'iiká ku sakwasleemuut.

¹⁷ Nee layuuká' ti koná' nee mukdá' gaa haratlintii': Neetlaame ka duxún ar umuueé', ta axwees ar tsifrír /aben,

¹⁸ dayshe tamka ohín, laqaá gár tsu/uut barka wáh, gár gi aw i káhh tam ar niiná. Dabaaín birka gawaá tiqtuusér i qaás, i hungaagú/.»

Yesu iwa gawaá doorí tsa/án

¹⁹ Aako Yesu axweesantá dir'ín ngiwa hhe'eés, kurira tláy gawaá doori, iri iwiít dákw doó /iyáy oo Mungú.

²⁰ Inooínadá' tari tláy, Ya/abtór hho' kari alki/iít umuúqo diiro. Aako nee inooín tay al gadiyuús, /uuruú axweesantós guri geehhooatís ar layaá naa tleehharumiitiye' qoomaadae.]