Marko 15 - Biblía Axweesantá Hhohho' ar Mungú 2004

Yesu kuwa huúw dír geeraá Pilato

¹ Looa niwa tleér matlaatleero kaahamuusér uren ar Mungú nee bariiseero, nee intsaahhatuusér hara'ayár Mosewo, nee múk doó kwasleema sleémeero niri kwasleemutiyé'. Yesu kuri tseék, kuri huúw, kway dabaá Pilató i qaás.

² Pilato guri yaahaás, «Kuúng a Waawutmoó múk Yahudíro?» Inós guri báy, «A adoosíng kuúng ta kat.»

³ Kaahamuusér uren ar Mungú guri sakwasleemút muruú yaariire.

⁴ Pilato guri malé yaahaás, «Mas ilawatsaká? Muruú yaariír oo tuwa sakwasleemuuti u ga/eéraáke?»

⁵ Ala Yesu aa malé ilawatsiiká. Tam Pilato adoodá' gari waa/oó/.

Kwasleemár Yesu kuwa gaasi

⁶ Umuúqo deelór ur ar Pasaákuwo heé wák baraá múk taa tsegiiti, oo muu i gweerár wa slai kun gweer.

⁷ Heeko ta bay Baraba kuna tseék dinkwa nee múk hatlá', asma tana slaáqw as axweesantá waawitá kawa sií', muu kuri tsuú/.

⁸ Boo/aay iri hardáh dír Pilato, kuri iimu/ún firooro adoodá' /iisí i tlehhaahhiti ngiwa dir'ínií tleehhi.

⁹ Pilato giri báy, «Xayshé', a sla'á'a waawutmoó múk Yahudi nguwa gweer?»

¹⁰ Asma inós gana geerií xuú' adór kaahamuusér uren ar Mungú ngura amoodií húp as da/tá tawo.

¹¹ Ala kaahamuusér uren ar Mungú boo/oó muu gway fuqunií qás as Baraba kuwa gweeri.

¹² Pilato giri malé báy, «Ala kwí ta babeera' a waawutmoó múk Yahudi adór ngu laaq?»

¹³ Tari tseé' ta kaahi, «Kikiieek gawaá msalaába.»

¹⁴ Pilato giri yaahaás, «Gár aa tlakweés a milá?» Ala inooín tari ló'wa tseeamín, tawa kaahi, «Inós na kikiieek.»

¹⁵ Pilato Baraba guri gweér, asma adoodá' muu i slai gana slaá' tleehhamooro. Yesu kuri muúx ar qaw'i, guri haniís kuwa kikii'i.

Askaári i Yesu niqiín

¹⁶ Askaári guri húp ay baraá boómár ur. Askaári sleémeero kari didií burumbuúr.

¹⁷ Kuri tsiitiís ar inqwaarír sirdaa/aat, slamángw laqaya' kuri tlaatlaáw kuri gawaá sagósí qaás.

¹⁸ Kuri taaqweemiís ta kaahi, «Waawutmoó múk Yahudi laawaay.»

¹⁹ Kuri saga muúx ar daa'a, kuri i tsuuqún, ta hara geeraawósí tumbarara'amiit, as kuwa ilaiwawa/i ar niqaay.

²⁰ Niqaywo kuwa hhe'eés, inqwaaridá' sirdaa/aat kari hingeés, kuri tlabaawós i ki/ís. Kuri tsee/áy huúw as kuwa kikiiár ay.

Yesu kuwa kikií' gawaá msalaába

²¹ Loohiro heeko wák oo baraá gixsár káw kuna harakeés as msalaábár Yesu ngiwa gagaari. Umuuwós a Simonú yaamaá Kirene, baabuúín Aleksanda nee Rufo.

²² Yesu kuri huúw ay dirka ta babay Golgota, gídaabárós a «Fartá saga».

²³ Difaáír taa mooyángw manemánér aleedoók, kana mak dirósií haniís, as ngiwa wahi, ala gari sií'.

²⁴ Kuri gawaá msalaábár i kikií'. Inqwaruuwós kuri qasmiís, tsawdo kari tleéhh as umuú heewo gaarós ngiwa slay.

²⁵ Kuwa kikií' a qoomár looár tám.

²⁶ Gadaádá' kusa sakwasleemuút kaa gawaadií gooín ar /aymi'iiká', «Waawutmoó múk Yahudi.»

²⁷ Fisuusér tsár nee inós kina alkikií' gawaá msalaabadu, kooko dakós oo doó /iyáy, kuqá' dákw doó basáy. [

²⁸ Gooi iri bó/, tidá' kah, «Kuna tla/ángw tlakuusér i harafaár.»]

²⁹ Múk yaamuudae waraáhh Yesu guri tloqmiís, ta hara sager'ín muumukuumiis, ta kaahi, «Aháeéy, kuúngudá' Doó Mungú gu feé/, kway tléhh baraá deelo tám i alé,

³⁰ kár ti kilók ba/amis, ti aweeris gawaá msalaábaro.»

³¹ Kaahamuusér uren ar Mungú sleeme guna niqiín, inooín dinkwa nee intsaahhatuusér hara'ayár Mosewo, ta kaahi, «Awa hatlá' gina ba/amís, ga/aaweek, inós kilós ba/amisaro ti aleeslayká.

³² Kristo, Waawutmoó múk Israeli, daxta ni aweeri gawaá msalaábaro, atén ku araán, daqaní u haratlintiaán.» Tam mukdá' nee inós taa alkikií' sleeme kuri tloqmiís.

Gwa'arár Yesu

³³ Looár lahhoó' iwa xeér, iimi iri gíp yaamu sleémeero ay looár gwaleél.

³⁴ Looár gwaleele Yesu iri tseé' ar afór ur, «Eloi, Eloi, laama sabaktani», gídaabárós a «Munguúeé', Munguúeé', án misa geexeér?»

³⁵ Múk dír iisaapaydá' wa axamiís iri oó', «Ga/aawaagáy, i Eliyá ateetín.»

³⁶ Heeko wák niri amorqá' wa ta'aaín, warqamooko guri tikiís baraá difaáír qarqaar, guri siíhh gawaá afkú daai, Yesu guri wahaás ar warqamoodá' i kaahi, «Lakiité' u araán, axáy Eliya ngu aweerisár aya.»

³⁷ Yesu iri tseé' ar afór ur, iri tsatiít.

³⁸ Inqwaarír baraá Doó Mungú, ar do' gwa qasis, iri tla/a feehhít gáwtá wa ale ay baraay.

³⁹ Geeraharusmoó askaári, kudá' inós gura qon aa geeraawós i sihhiit, adoodá' ira gwaá' ngiwa ár, iri oó', «Ar ló' heewí a tsuwá Garmoó Mungú.»

⁴⁰ /Ameenarka amorqá' saáw wa xuumiis i deer. A ín Maria Magdalene nee Maria aayor'ín Yakobodá' niiná nee Yose, nee tooka a Salome.

⁴¹ Kuká' an kudá' nee inós ti komkakoomá' Galilayaro, nee ngu alee/iimamisá'. Nee /ameenár hatlá' ar yaariir i deer, tidá' nee inós naa al Yerusalemúrí tsa/ane'.

Foolár Yesu

⁴² Baldá' a deelór tiwa amohhe'eemisiya', asma looaytleérós a deelór Sabaáto. Qoomár tsiindowo,

⁴³ Yoséfú Arimatayár daáhh nina hardáh. Inós a heé ilaiwa/amér koóm oo doó kwasleema, nee inós sleeme i waawuti'iimár Mungú daamaarán. Inós guruuwós guna gawdeés iri dáh ay amór Pilato, slaqwtá Yesu gari firín.

⁴⁴ Aluuwo Pilato iri waa/oó/ as adoodá' iwa tseewa gwaá', geeraharusmoó askaári guri ateét, as nguwa yaahasi axáy aaqo gwaái.

⁴⁵ Geeraharusmoó askaári iwa oó', «Aa gwaá'», Pilato iri ya/án slaqwtá Yesu ngiwa haniisi.

⁴⁶ Yosefu inqwaarír taa tleéhh ar kitaáni gari tlaáxw, slaqwtá Yesu gari gawaá msalaábár wa aweeriís, gari untsuús ar inqwaaridá', gari qaás baraá baa'ár taa foól gawaá tlaa/a. Tlaa/ár hatlá' gari gwangwaraá' gari afkú baa'aadár tuuntuúk.

⁴⁷ Ín Maria Magdalene nee Maria aayór Yose didá' Yesu kway qaás kari xuuxuú'.