Marko 14 - Biblía Axweesantá Hhohho' ar Mungú 2004

Ta loohír leelehhiit ar Yesu kur oohi

¹ Deelo aa mét tsár deelór ur ar Pasaákuwo nee deeloodár Mikaátér taa sluuftisiiká kawa /ayi. Kaahamuusér uren ar Mungú nee intsaahhatuusér hara'ayár Mosewo loohír Yesu kur oohi ar naaqo kari leelehhiít, nee kuwa gaasi.

² Tana oó', «Tí a tleehhanaaká deeloorí ure, as muu muwa tlaahhír ar awaán.»

Yesu kuwa Betaníár wa sliík ar mooyaangw

³ Qoomár Yesu iwa Betaniár i dirii'i, iwa dír muruú /aymár i iwiít dír doó Simonidá' tiqtír tsatmituú koóm, /ameenirka nina hardát. /Ameenidá' i chupiito'ór koón ar taa tleéhh ar tleeír ta bay Alabasta. Chupiito'o i mooyángw koón, mooyángw ta babay nardo, kudá' tlaxo gawít. Chupiito'oodá' gari gás, mooyangwdá' guri adaá wa ku'ús gawaá ságw Yesu.

⁴ Mukko iri buúhh tari kilooín axweés, ta kaahi, «Asma milá, mooyangwqá' musku adooqár hhitín?

⁵ Asma geera mooyangwqá' burkwa weeriís, tam shiliíngi tsiire tám nee afiiri ga sláy, narkuute kay qáy.» /Ameenidá' kari i gilín.

⁶ Yesu iri oó', «Mawaak, gár kas daawitimisa' a milá? Gadiyér hhoo' nga aníng i tléhh.

⁷ Asma narkuute nee kuungá' a dinkwa umuúqo daqto, bar alee/isár wa sla'á', umuúqo siiwaro a aleesleerá' kawa alee/isa'. Ala án nee kuungá' umuú baalaaro a dinkwaarooká.

⁸ /Ameenirí adoodá' aa asleér gaa tléhh. Slaqwte'eé' gaa geerií slík ar mooyaangw, asma gana amohhe'és as deelór foolar'eé'.

⁹ Ala án a kah, umuúqo dír Ya/abtór hho' kawa alki/iiti baraá yaamu sleémeerowo, nee tí /ameenirí aa tléhh sleeme ka alki/aa/iit as inslaslaangós.»

Yuda iwa ya/án Yesu nguwa saki/i

¹⁰ Eeharusmoodá' ta bay Yuda Iskarioti, oo wák baraá eeharuuseedár mibaá nee tsare, iri tláy amór kaahamuusér uren ar Mungú as Yesu nguwa dir'ínií saki/i.

¹¹ Inooín adoorí kawa axaás tay qwalaá/, kuri báy, «Peésa ngi haniisaán bar adoosíng ngi tléhh.» Gawaá adoorihe Yuda loohi gari leelehhiít nee qoomár ádhhoe ar ngur dir'ínií saki/i.

Yesu muruú /aymár Pasaáka nguwa /aáy dinkwa nee eeharuuseerós

¹² Bál iimu/úngw deelór ur ar Mikaáteedá' taa sluuftisiiká, nee ar deelmoó bee/i oo Pasaáka kuwa gaás, eeharuuse Yesu guna yaahás, guri beér, «Dír ta sla' a diimá ar ta amohhe'eesaan ar muruú /aymár Pasaáka kuwa /ak?»

¹³ Eeharuuseerós ar tsár gari ya/aáw, gari báy, «Tlawsé' baraá gixsa. Nee heeko sirwír ma'aay ga koóm tiqo dogá', ku eehadá'.

¹⁴ Nee do'dá' inós i dahi, heé do' loó' ku beera', ‹Intsaahhatusmo i kaahi: Doó dahaaye gaálaay oo aníng nee eeharuuser'eé' ni dahaan as muruú /aymár Pasaáka nguwa /ayaan.›

¹⁵ Inós doó úr oo qoroófaOo taa amohhe'eés ngu kuungá' i laqán. Muruú /ayma ku gawaadá' wa amohhe'esá'.»

¹⁶ Eeharuuseedá' iri tleér baraá gixsa. Adoodá' kaa báy iri bó/. Muruú /aymar'ín oo Pasaáka kuri baraadá' wa amohhe'eés.

¹⁷ Qoomár tsiindowo Yesu nay hardáh nee eeharuuseedá' mibaá nee tsár.

¹⁸ Qoomár inooín tawa /ayin, Yesu giri báy, «Án a kah, heé wák dirhunge oo nee aníng al/ayiimá', án i sakii/.»

¹⁹ Tari gurhaamuút. Umuúqo heewo Yesu guri yaahamiís iwa kaahi, «A anínge?»

²⁰ Giri báy, «A heé wák baraá kuungaáká' mibaá nee tsare, oo nee án altikimiisá' baraá isaangi.

²¹ Asma Garmoó Hee inqo tawo amór gwa'arárií hi'iit adoodá' kara gooín, ala heedaádá' Garmoó Hee gu sakií/, a tsaxwaawós. Alók geeraawo a tsiní bar inós kuna laqwaliiká.»

Muruú /aymár Aako

²² Qoomár tawa /ayin Yesu mukatmo guna óh, iri sluufiís, guri parhhamiís, guri eeharuuseerós i haniís, iri oó', «Oohaak, gaarí an slaqwte'eé'.»

²³ Xooslmoó wahaangw guri óh, iri sluufiís, guri haniís, sleémeero tari wahán.

²⁴ Giri báy, «Gaarí a tseerer'eé' ar alqado ar ku'uut as múk yaariír.

²⁵ Án a kah, ma'aá sabiíbu i baloó wahaaká ay baalaadá' awa /aben ngiwa wah baraá waawuti'iimár Munguhe.»

²⁶ Tawa hhe'eés daa'ángw alaá /aymaaro, tari tsa/án gawaá tloomár xaaikaari ta babay seituúni.

Yesu tlaankuú Petro nguwa geerií oó'

²⁷ Yesu giri báy, «Kuungá' sleémeero insareehhi nu eér, nee aníng iri geexeerá'. Asma kaa gooín, ‹De'eemusmoó bee/aangw u slaáhh, bee/aangw iri diya/aat.›

²⁸ Ala bar waasle/atisaro taa hhe'eés, aníng an Galilayarí giiriím.»

²⁹ Petro iri oó', «Tam sleémeero insareehhi ngi eera, ala án i eeraaká.»

³⁰ Yesu guri báy, «Án a kah, xweeraakaá laarihe konkomoó tsár iwa uui, án kuúng iga sagaáwa tám wa satlánk.»

³¹ Petro iri ak kumiít axweesanto i kaahi, «Barnaxes gár tiwa hariím a tawa alqatlaan nee kuúng, tam adoorihe u baloó tlaankaaká.» Kudaá hatlá' sleémeero adoodá' kay oín.

Firór Yesu baraá Getsemane

³² Tari hardáh ay dirka ta bay Getsemane, Yesu eeharuuseerós gari báy, «Qoomár aníng bar fiririím kuungá' diirí iwitaak.»

³³ Petro nee Yakobo nee Yohane girira tláy. Inós iri ló'wa gurhaamuút, iri amoqwaár daawitimeero.

³⁴ Giri báy, «Aníng gurhaamír ur iga eér tsaxwaá gwa'ara. Diisíng wa iwiwiitaak, dalaaé'.»

³⁵ Iri geerií kumiít gár niinawe, iri tumbarara'aát, iri firiirín iwa kaahi: Barnaxes i ya/aán qoomaarír slahh'amu iwa pa/.

³⁶ Iri oó', «Baabuúeé', Baabuúeé', kuúng umuúqo gaaro a aleesleér. Slahh'ámuuwí dir'eene hingeeseek. Tam adoorihe adoodá' aníng ni slaa' ma tleehhaar, ala tidá' kuúng ta sla' na tleehheek.»

³⁷ Inós iwa kií/ naxés taa guú'. Petro guri báy, «Aá Símon, aga gúi? Aga aleesleeriikáhe tawa dala' tam qoomár niinawe?

³⁸ Dalaaé', firiiriimé', as iiaraa'at mutunduwa arbaá/. Muuná ga mak slaa', ala slaqwa kan daqatlaakw.»

³⁹ Iri malé firór áy, /aymi'i aqo kudaá kilá' gina inkií/.

⁴⁰ Niwa kií/, naxés naa malé guiyé', asma ilaaín naa ilu'u'uyé' gu'uteero. Gár ku bay sleeme kaa xuiiká.

⁴¹ Niwa sagaáwa tám wa kií/, giri báy, «A kumitá'a gu'uteero asma tawa hungu/usa'? A ido. Qoomaadá' aa xeér. Ga/aawaagáy, Garmoó Hee ku qaas gawaá dabaá múk tlakuuse.

⁴² Tlawaaré', diirí geexaware'. Ga/aawaagáy, kudá' aníng i sakií/ naa tseewúy.»

Saki/imá Yesu nee ooha

⁴³ Qoomaadár kilá' iwa adoodií kahhi, Yuda nay hardáh, oo wák baraá eeharuuseedá' mibaá nee tsare. Boo/oó yaariír oo paangadaá koóm, nee guhhuli'i, nee inós ti koná'. Tindi amór kaahamuusér urén ar Mungú daahh, nee amór intsaahhatuusér hara'ayár Mosewo, nee bariise.

⁴⁴ Kudá' Yesu gu sakií/, gaa layár i laqán gina báy, «Kudá' án ni ma'aas an inós. Ku otá' ku harmagahhá', ku hubá'.»

⁴⁵ Yuda iwa hardáh iri amór Yesu i huwís, iri oó', «Intsaahhatusámo.» Guri ma'aás.

⁴⁶ Inooín tindiri haratláy, kuri óh.

⁴⁷ Heeko dír bihhaadá' wa sihhimiít paángarós gana duúx, lawaalmoó kaahamusmoó úr oo Mungú guri slaáhh, guri iia tsaát.

⁴⁸ Yesu iri oó', «Misna hardaté' amor'eéní ale ar paangadu nee guhhuli'i adór múk fisusmoó oohár áw?

⁴⁹ Umuúqo baalaaro án a dirhúng i dirií' baraá Doó Munguhe, niwa intsaahhatimaamis, ala kuungá' i uhahiinda'aaká. Ala tí in tleehharút asma Gooi iwa bo/.»

⁵⁰ Eeharuuseerós guri geexeér, sleémeero tari goów.

⁵¹ Garmaako inqwaarír /awaak gaa tsiit, Yesu guri eehár. Kuri óh.

⁵² Inós kuwa óh, inqwaarirós gari geexáy, iri /akuút ar /aankwets.

Yesu i dír doó kwasleema

⁵³ Inooín Yesu kuri huúw ay amór kaahamusmoó úr oo Mungú. Kaahamuusér uren ar Mungú, nee bariiseero, nee intsaahhatuusér hara'ayár Mosewo sleémeero tari burumburiít.

⁵⁴ Petro iri amorqá' saáw wa magegeamiít, iri dáh baraá afeenír doó kaahamusmoó úr oo Mungú. I asltá axwaanemiis nee múk dír do'dá' wa gadiyuús.

⁵⁵ Kaahamuusér uren ar Mungú nee múk doó kwasleemaro sleémeero lamabu'uungw kway leelehhiít daanduú Yesuwo, as kuwa gaasár wa slai. Ala lamabu'úngw ló' kwa slayká.

⁵⁶ Asma awa yaariir lamabu'úngw lama nguna alki/iitiyé', nee lamabu'ungw'ín ti slaslayká.

⁵⁷ Bahh'alé tana sihhiít kuwa lamabu'úngw lámtí kaahi, ta kaahi,

⁵⁸ «Atén ugwa axaasaán i kaahi, ‹Doó Mungú kwí taa tleéhh ar daba', án un feé/, nee baraá deelo tame doó hatlá' u sihhitís oo taa dabár tleehhiiká.› »

⁵⁹ Ala tam baraá axweesantihe lamabu'ungw'ín taa slayká.

⁶⁰ Kaahamusmoó úr oo Mungú niri tláy, iri tla/ángw múk i sihhiít, Yesu guri báy, «Masa xaslít? Mukwí gár daanduuwoge i kaahi a umós?»

⁶¹ Ala inós aqo ina xasliít, aa ilawatsiiká. Kaahamusmoó úr oo Mungú guri malé yaahaás, «Kuúng a Kristówo, Garmoó Munguú Xiríf?»

⁶² Yesu iri oó', «Aníng an inós. Kuungá' sleeme Garmoó Hee u aandá' aa iwiít dákw doó /iyáy oo /Uuru, ni kii/ ar huunkoó gawaá doori.»

⁶³ Kaahamusmoó úr oo Mungú inqwaruuwós guri feehhimiís i kaahi, «Lamabu'úngw ta malé leelehhitaan oo milá?

⁶⁴ Aga axasí'iíke adór ir Munguú /oosliislín. Xayshé' ma katá'?» Sleémeero kwasleema kay tsaát adór gár kuwa hariím tar gwa'ara.

⁶⁵ Bahh'alé nguri iimu/uné' i tsuuquungo, kuri ila' tuuntuúk, kway tuu'uút ar kundi'i, ku babay, «Heesíng u tuu'uút ar kundaay a heemá, ooang.» Tam xuumuuse sleeme tlaaqarmaawós giri múx.

Petro Yesu nguwa satlaánk

⁶⁶ Qoomár Petro iwa baraá afeenidí kahhi, /ameenirka wák niri hardát. Inós a sagadiyuso'ór doó kaahamusmoó úr oo Mungú.

⁶⁷ Petro guri aán iwa asltá axwaanemiisi, guri ló'wa xuuxú', iri ó', «Kuúng sleeme toomák a dinkwa nee Yésuuduú Nasareti.»

⁶⁸ Petro iri tlaánk, i kaahi, «U xuaaká, tam kangwsíng kiíng ta kat u tsatsahhaamaaká.» Iri tláy amór afeeni. Konkomo iri uú'.

⁶⁹ /Ameenidá' guri malé aán. Mukko didá' wa sihhimiít guri beér, «Kwí a heé wák dír mukdá' nee Yesu ti kooma'a.»

⁷⁰ Iri malé tlaánk. Qoomár niina iwa waaráhh, mukdá' didaádá' wa sihhimiít Petro kuri báy, «Ar ló', kuúng a heé wák dír mukdá' nee Yesu ti kooma'a, asma kuúng sleeme a heé Galilaya.»

⁷¹ Iri oó', «Án heesíng ta kata' burqo xuú', ni gwaá'.»

⁷² Naxés siiwadár kilae konkomoó tsár iri uú'. Petro adoodá' Yesu geeraawo ngwa báy gari insláy, tidá' nguwa báy, «Konkomoó tsár iwa uui, án kuúng iga satlánk sagaáwa tám wa ale.» Adoodá' ngiwa insláy, hhirhheeri gay ku'uús.