Marko 13 - Biblía Axweesantá Hhohho' ar Mungú 2004

Yesu fee/ár Doó Mungú ngiwa geerií oó'

¹ Qoomár Yesu niwa baraá Doó Mungú wa ti'imiiti, eeharusmoowós oo wák guna báy, «Intsaahhatusámo, tlaa/eeká', nee do'wí i ge/eéra, a gár waa/oo/amo.»

² Yesu guri báy, «Adór do'wí úr kura tleéhh a ga/eéra? Ala tlaa/anoó gawaá kuqií meét i kaahh oo ta fee/iiká.»

Iimu/úngw slahh'amu

³ Tam qoomár Yesu iwa iwiít gawaá tloomár xaaikaari ta babay seituúni, iwa amór Doó Mungú i xumiisi, Petro nee Yakobo nee Yohane nee Andrea tawa kilooín, kuri yaahaás kuri báy,

⁴ «Atén i ooang, kangwsíng i tleehharuuti a xaylá, nee layár ta ari a umós, qoomár kaangwí birna tseewúy?»

⁵ Yesu iri dir'ínií axweés iwa kaahi, «Ti harmagahhe', hee munduwa al/aáy.

⁶ Múk yaariír ni hardah oo ti umuueénár ateetiím, tawa kaahi, ‹Aníng a Kristo.› Nee inooín múk yaariír kuri al/aay.

⁷ Kuungá' kángw slaqwara bura axasé', nee tsimaahhír slaqwara, ma da'ayuutara', asma muruuwí niqo geerií hardah, ala alhhe'eesáydá' aa xayká.

⁸ Asma xooro i slaqwarár eér amór xoororqá', nee waawuti'iima i slaqwarár eér amór waawuti'iimár hatlá'. Yaamaá yaariire kunseeli i ti'ít, slám giyeé ni tleér. Tí sleémeero an iimu/úngw slahh'amu.

⁹ «Kuungá' ti harmagahhe' asma tundu huwahuuw baraá maraá kwasleema, nee baraá maraá saaliingo tundu muux. Kuungá' sleeme tundu huwahuuw dír geeraá ga/aawuuse, nee dír geeraá waawitá asma aníng, as iwa dir'ínií lamabu'uunda'.

¹⁰ Ala Ya/abtór hho' aqo kan geerií alki/iit baraá xoordu sleémeero dír alhhe'eesaydá' nira hardihiiká.

¹¹ Bar kuungá' tunda uhín, tunday huúw as tunduwa sakwasleemuuti, gár ta oa' ma geerií leelehhiitara', ala tidá' siiwadaádae tindi haniisi na ooaak. Asma heé axweés qoomaadae a kuungaeeká, a Qeeruú hhoohhoó' oo Mungú.

¹² Hhiya' hhiyaawós gu sakii/ kuwa gaasi, nee baabá na/aywós gu sakii/, na/ii nee xwaylitér'ín ti dakuusiyá' sleeme, xwaylité kay tsuu/.

¹³ Kuungá' tundu aahh nee muu sleémeero asma aníng. Ala heé aa qiitl ay alhhe'eesaay an kudá' ba/ám.»

Slahh'ámuú úr

¹⁴ «Kudá' tlaákw oo Hhiturusmo bura aandé', aa sihhiít didaádá' iwa harinaká» (heé soomuús gídaabárós ngi tsaahhi), «qoomaadae múk yaamaá Yudeár i dirií' ta ta'aain gawaá tlom'i.

¹⁵ Heé gawaá do' miwa aweér as gár baraá do' ngiwa leehhi,

¹⁶ nee heé baraá qaymórií dirií' miwa kií/ iwa tlabaawós leehhi.

¹⁷ Ala /ameenár tsiihaawe nee ar na/aá ninakw gi koom qoomaadae, a tsaxwaaín.

¹⁸ Fiririimé' as kaangwí mindiwa qoomár tsaaqwárií ti'iít.

¹⁹ Asma slahh'amuú deeloodá' ku úr adór taa baloó ariiká baraá yaamuwo iimír Mungú yaamu ngiwa tleéhh ay laarí, slám slahh'amuú adór kwí baloó ki/iiká.

²⁰ Ala Aako bar deeloorí gaa /aareesiiká geeraawo, heé geeraawo ba/ám i kaahh. Ala inós deeloodá' gana /aareés as mukdá' inós aa tsawaár.

²¹ «Nee qoomaadae heeko burna báy, ‹Kristo areengw i diirí,› laqaá bira oó', ‹I amorqá',› ma ya/aamara'.

²² Asma kristo lama nee aaruusér lamuusero ni ti'iitiyá'. Inooín layu nee muruú waa/oo/amooro ngu tleehhiyá' as múk yaariír kuwa al/ayi, bir ya/aán tam mukdá' Mungú aa tsawaár sleeme.

²³ Ala kuungá' ti harmagahhe', asma án umuú gaaro ngaa kuungá' báw.»

Hardahamuú Garmoó Hee

²⁴ «Ala deeloodaádae alaá slahh'amuuwo tsee/amá in giiw, nee slahhaangw i gwa/aatiiká.

²⁵ Tsatse/uú gawaá doori i paahh, nee /uuruudá' doori gi koóm ku dingiis.

²⁶ Aluuwo Garmoó Hee kuri ar i awdiit ar huunkáy, ar /uuruú úr nee xirif,

²⁷ aluuwo malayke gari ya/aaw, badu tsiyahhaawo awa yaamu, iimír alhhe'eesaywí wa tleemu ay kuqá', as mukós kudá' aa tsawaár nguwa burumbut.»

Intsaahhatisár slaqsoó /aantsí

²⁸ «Slaqsoó /aantsí nu intsaahhatisi. Qoomár loo/orós bira páhh, ar /aben nay harmá/, a xuá' adór tluwaay nira nakaá/.

²⁹ Tam kuungá' sleeme muruuwí bura aandé' naxes naa iimu/ún, tsaahhaagáy adór Kristo nira tseewúy i dír afkú do'.

³⁰ Án a kah, muruuwí sleémeero i boo/ dír mukuú de'emaaká' ir kumiiti.

³¹ Doori nee yaamu i waarahhiyá', ala axweesante'eé' i baloó waarahhká.»

Siiwarós nee baalaaro heé ga xuú' i kaahh

³² «Ala kángw siiwadá' nee baalaarós heé gu xuú' i kaahh, tam malaykér gawaá doori, tam Garma, aqo har Baabá.

³³ Dalaaé' ti harmagahhe', asma siiwadá' a xua'aaká.

³⁴ Slaqsaywós a adór heé aa aa'aá kay, oo do'ós gwa dír lawaaleerós i geexay, nee umuúqo heewo gwa gadiyeérós i haniís. Heé afkú doó xuúm guri hara'ayín do' nguwa xun.

³⁵ Gimsé', dalaaé', asma qoomár heé do' loó' ni hardihi a xua'aaká, tam tsiindo, tam amsi, tam ságw looaytleemu, tam matlaatle.

³⁶ Laqaá munduwa baraá gu'uteérí hhaawiís.

³⁷ Nee tí naa kuungá' báw tawa dala'a, an káh sleeme dír muu sleémeerowo.»