Marko 12 - Biblía Axweesantá Hhohho' ar Mungú 2004

Slaqsoó qaymór Sabiíbu ar taa saayín

¹ Yesu iri dir'ínií axweés ar slaqsi'i, giri báy, «Heeko xaaikaari ta bay sabiíbu gina dahaás, giri yaáw. Bohoongw guri foól oo ma'aá mamaá xaaidá' ngiwa tsoo/iti. /Aampár xuuma gari tleéhh. Qaymoorós gari dír múk i saayín. Inós iri aa'aá káy.

² Qoomár bu'uungw iwa xeér, lawaalmoowós guri ya/aáw amór mukdá' aa qaymór i saayín, asma hariímár heedaádá' qaymo loó' kawa haniisi.

³ Laawalmoowós kudá' kuri óh, kuri muúx, kwa gaárií haniisiiká, kuri guús.

⁴ Lawaalmoowós oo hatlá' guri malé ya/aáw amor'ínií ale. Kwí kway saga tlaqiís kway mureekeemiís, kway baramaanuús.

⁵ Lawaalmoó hatlá' guri ya/aáw. Kwí kway gaás. Nee awa hatlá' awa yaariir bahh'ale kina muúx, bahh'ale kina tsuú/.

⁶ Garmaawós kuduú sla'aarusmo an heé aa meet, nee kwí sleeme alhhe'eesaywo gway ya/aáw, i kaahi, ‹Inós ku ilaiwaa/ asma tawa garmaaeé'.›

⁷ Ala mukdá' taa qaymór i saayín tari axweés ta kaahi, ‹Kwí an aaliitmo, gaasare', aali daqaní a toorén.›

⁸ Kuri óh, kuri gaás, kuri tsee/áy kwaáhh baraá qaymór sabiíbuuwo.

⁹ «Xáy daxta, seebuduú qaymór sabiíbu adór i laqi? Inós in hardah, mukdá' aa qaymórií saayín nguwa tsu/i, qaymoodár sabiíbu gari múk hatlá' i saayín.

¹⁰ Tam gooirí aga soomusi'iiká xáy? Tí kah, ‹Tlaa/adá' qwatsiiruuse aa sí', aa tlaa/ár ur tleehhít ar do' ira gawdúy.

¹¹ Axweesantí amór i dahh a amór Aako, ala a waa/oo/amo direne.› »

¹² Adór Yesu kur oohi kay leelehhiít, asma slaqsaydá' ira axweés, kuna tsaahh adór heé aa káh tar inooín. Ala boo/aay kuna da'ayuút, ooharo kuri máy tari tláy.

Yaahasa daanduú bu'utuú koódi

¹³ Múk Farisayo bahh'alé nee oo Herode kuri amór Yesu i ya/aáw as kuwa yaahamiisi ar iiara, as kuwa oohár wa slai.

¹⁴ Tawa dirós i hardáh, kuri báy, «Intsaahhatusámo, a xuaán adór kuúng tar heé ló', tam kángw uroó hee u yaahamiská, tam hhohhoartós, ala loohír Mungú adoodá' ir gana' tinar intsaahhatimís. Xáy, i ganá'a waawutmoó múk Roma kuwa koódírií hanisaan, laqaá i gan'aká?

¹⁵ A hanisána, laqaá a hanisanaaká?» Yesu hhaahhafingw'ín nguwa tsaáhh, giri báy, «Ahaá a milá, mihar iiara'adá'? Peesmo huware', án u ár.»

¹⁶ Kuri huúw. Giri báy, «Slaqsaywuú gawaaká' nee gooirihe awa heemá?» Tari oó', «Awa waawutmoó múk Roma.»

¹⁷ Yesu giri báy, «Ar waawutmoó múk Roma amoorós ti hanise', nee ar Mungú amór Mungú ti hanise'.» Kuri ló'wa waa/oó/.

Yaahasa daanduú waasle/

¹⁸ Múk Sadukayo kudá' káh, waasle/ i kaahh, Yesu kuna i daqáy, kway yaahaás, ta kaahi,

¹⁹ «Intsaahhatusámo, Mose gaarí ngina aténií gooín iwa kaahi, ‹Hee bira gwaá', harér aa geexáy bir na/oó koondaaká, hhiyaawós ngi aali, as doó hhiyaawós nguwa tleesi.›

²⁰ Hhaeekaari faanqw i dayá'. Oo geera ina duuxún iri gwaá', na/oó aa geexáy i kaahh.

²¹ Oo tsár hareedá' gari aál, iri malé gwaá'. Na/oó aa dír hareedí geexáy i kaahh. Oo tám aqo male adoodá'.

²² Tam inooínadá' faanqwamaawo hareedá' ngina aliitiyé', ala aa laqwaliká. Alhhe'eesaywo hareedá' iri gwá'.

²³ Bál waasle/uuwo /ameenidá' a harér heemá? Asma inooínaadá' faanqwamaawo tana alhoót nee hareedá'.»

²⁴ Yesu giri báy, «Aga qwadi'iikáhe adoosinge, asma tidá' taa gooín a xua'aaká, tam aleesleemuú Mungú sleeme u xua'aaká.

²⁵ Asma alaá waasle/uuwo muu a adór malaykér gawaá doori, slám duuxo i káhh.

²⁶ Daanduú waasle/uú múk aa qatli, án kuungá' nu yaahaás, ‹Aga soomuusi'ikáhe baraá kitaábuú Mosewo, didár kángw kitkintiro?› Didae gár taa gooín a tí: Mungú Mose guna báy, ‹Aníng a Munguú Abrahamu nee Munguú Isaka nee Munguú Yakobo.›

²⁷ Inós a Munguú tu'uwooká, ala a Munguú múk slaáf. Gawaá adoorihe kuungá' aga ló'wa qwadé'.»

Hara'ayár ak ur

²⁸ Heeko wák baraá intsaahhatuusér hara'ayár Mosewo ina hardáh, giri axaás tawa kaangaanusi, gari tsaáhh adór gár aa oó' ir ganá'. Guri yaahaás, «Baraá hara'aya sleémeero ar ak afhhamít a gaalá?»

²⁹ Yesu guri báy, «Ar ak afhhamít a tí, ‹Iia qaasaak, múk Israeli, Aakoó Munguúrén, inós kilós an Aako.

³⁰ Nee kuúng Aakoó Munguúwók na slaeek ar muunaáwók sleémeero, nee ar qeeruuwók sleémeero, nee ar fuquraangók sleémeero, nee ar /uuruuwók sleémeero.›

³¹ Ar tsár ar slahhaa' a tí, ‹Inslaawmoowók slaeek adoodá' kuúng tir kilók sla'.› Hara'ayár hatlá' ar afhhamít ar tí tsár ga baa/ i káhh.»

³² Intsaahhatusmooduú hara'ayár Mose guri báy, «Intsaahhatusámo, tisíng taa ó' ar ló' nee i ganá' adór Mungú tar wak, oo hatlá' i kaahh, aqo har inós.

³³ Nee hee inós nguwa slai ar muunaáwós sleémeero, nee ar fuquraangós sleémeero, nee ar /uuruuwós sleémeero, nee inslaawmoowós nguwa slai adoodá' inós tir kilós slai, adoorí in ganá' ta hikwaá adoodá' koomá' kiwa ilahhooár wa da/i nee ilahhooár muruú ta tsu/i.»

³⁴ Yesu ngiwa tsaáhh ar adór ngura i ilawaáts ar sagalooa, guri báy, «Kuúng tu ak saweeká dír waawuti'iimár Munguhe.» Aluudae heé gwa malé qiitl yaahasto i kaahh.

Yaahasa daanduú Kristo

³⁵ Qoomár Yesu iwa baraá Doó Mungú wa intsaahhatimisi, gina báy, «Intsaahhatuusér hara'ayár Mose masta kaahi, Kristo a Garmoó Daudi.

³⁶ Daudi inósuú kilá' ar aleesleemuú Qeeruú hhoohhoó' oo Munguhe ina oó', ‹Mungú Aakooeé' guna báy. Iwiít bihhaaeé' awa doó /iyáy tam ay dír wakuuseerók ngi baraá dabaawók i qaás.›

³⁷ Daudi inósuú kilá' gun Aakoowós ar ateetín. Daxta adór tar garmaawós?» Axweesantá Yesu boo/oó yaariír gana axamiís ar qwala/

Yesu eeharuuseerós ngiwa gurbuú'

³⁸ Gár aa intsaahhatimís a tí, «Ti harmagahhe' nee intsaahhatuusér hara'ayár Mose, kudá' tlabaá tlet dahamisuuwo ngi sla'á' barta hi'iimiit, nee ngi sla'á' kiwa taaqwemisi ar ilaiwa/ame dír boo/aywo.

³⁹ Inooín kiteeraá geera ngi tsawdaaditiyá' baraá maraá saaliingo nee doó kiwa dahi'isi muruú /aymaaro.

⁴⁰ Slám malé alé muruú kwaeeli kun /aa/aay, nee firór yaariir kan firaarín ar hhaahhafiingw. Inooín sakwasleemár ur ngi slayá'.»

Ilahhooár kwaalo'o

⁴¹ Looarka wake Yesu ina iwiít dír bihhaá sandakmoó ilahhooa, adór ilahhooa ngir hanimisiya' gana ga/áy. Daqaarér yaariir peésár yaariir gana qamiín.

⁴² /Ameenirka wák ar kwaalo'o, slám a narkuto'o, niwa hardát, senti tsár gana qás, hariímarós a adór sentimoodá' niiná.

⁴³ Yesu eeharuuseerós gari ateét, gari báy, «Án a kah, kwaalo'orqár narkuto'o hariímár aa qás ka ló'wa ur mukquú hatlá' sleémeero ba/a,

⁴⁴ asma kuqá' sleémeero peésár taa qaás a tidá' aa met dír afer'ine, ala /ameenirír narkuto'o tidá' sleémeero i koon gana qás, tidá' geera ar muruú /aymaarós.»