Marko 11 - Biblía Axweesantá Hhohho' ar Mungú 2004

Dahmuú Yerusalemu

¹ Qoomár tawa Yerusalemurií tseewúy, inslaawoó gixsadaá Betfage nee Betania, bihhaá tloomár xaaikaari ta babay Seituúni, eeharuuseerós ar tsár gari ya/aáw,

² giri báy, «Tlawsé' ay amór gixsarqá' geraahúngií dirii'. Bara hardaté', gwarendamoó daqwaay, oo hee aa baloó daanda i tsa/aniká uqo aandá', kwaa tseék. Ngu gwedá' ngu hubá'.

³ Hee burna yaahaás, ‹Mas adoosíng /imisá'›, ta oa', ‹Aako gwarendamo gun slaa', ngu gaanslár ki/is aluuwo.› »

⁴ Tari tláy, gwarendamoó daqwaay kuri afkú doó i áy, kwaa tseék dír afkú do' tsee/aá wa ale, afaá loohír ur. Kuri gweér.

⁵ Mukko taa didií áy, tari oó', «A milá, gwarendamo mus gweditá'?»

⁶ Adoodá' Yesu ngaa báy kari dir'ín i oó'. Inooín tari ya/án, gwarendamo kway haniís.

⁷ Gwarendamoodá' kuri huúw amór Yesu, inqwaruuín kuri hhaáf gawaá daanduuwós, Yesu iri gawaadí iwiít.

⁸ Múk yaariír inqwaruuín guri baraá loohírií hhafín, nee bahh'alé haleemaá loo/ór koomá' ngina tlaaqiyé' baraá sla/atá wa ale, ngiri hhafiné'.

⁹ Nee mukdaádá' geeraá wa hi'iít nee oo aluuwo ta tseeamín, ta kaahi, «Hosana, i xirfuuti kudá' hardáh ar umuú Aako.

¹⁰ I xirfut waawuti'iimadá' hardah ar baabuúrén Daudi. I xirfuuti Munguú gawaá doori.»

¹¹ Aluuwo Yesu iri baraá Yerusalemuúrí dáh ay baraá Doó Mungú. Nee umuúqo gaaro arto ngiwa hhe'eés, naxés looa sleeme aa dát, iri ti'iít, tari tláy Betania nee eeharuuseedá' mibaá nee tsár.

Yesu /aantsí ngiwa lu'ús

¹² Looaytleér niwa Betaniár wa kií/, qwari guri loohírií áy.

¹³ /Aantsír loo/ór koom gari amorqií ár, iri amoodá' káy asma ngiwa ari wane i mamaá koón. Iwa didií hardáh, naxés gár aa ár i káhh, aqo har loo/o kilós. Asma qoomár hamnoó /aantsí aa xeeriiká.

¹⁴ /Aantsídá' gari báy, «Iimír laarí hee mamuuwók mingiwa baloó /aáy.» Eeharuuseerós i axamís.

Gusisíngw múk baraá Doó Mungú wa weerimiís

¹⁵ Tari Yerusalemú i hardáh. Yesu iri dáh baraá Doó Mungú mukdá' baraá Doó Mungú wa muruú weerimiís nee kudá' tlaxuúm guri iimu/ún gusisiingo. Meesadaá mukdá' peésár gaamiís, nee kiteeraá mukdaáduú hhookár weerimiís, giri /ankwartsín.

¹⁶ Tam heé gár koóm gwaa geemayká iwa baraá Doó Mungúr waaraahhi.

¹⁷ Giri intsaahhatimís iri oó', «Kaa gooinkáhe, ‹Dooeé' ku bay a doó saaliingw dír xoordu sleémeerowo.› Hám daxta kuungá' ugwa mar'ír fisuuse tlehhé'.»

¹⁸ Kaahamuusér uren ar Mungú nee intsaahhatuusér hara'ayár Mosewo kangwdá' kuri axaás, loohi kari leelehhiít ar Yesu kur gaasi. Asma kuna da'ayuút as adoodá' boo/aay sleémeero intsaahhatimisuuwós nguwa waa/oó/.

¹⁹ Looa iwa dát iri quútl baraá gixsaro.

Gár kahmuú /aantsí i intsaahhatimiisi

²⁰ Matlaatleero tawa waaraahhi, /aantsídá' kawa ár, naxés aa iimír baraá gamnángw wa kát.

²¹ Petro kangwdá' guri insláy, Yesu guri báy, «Intsaahhatusámo, ga/aaweek, /aantsídá' taa lu'ús aa kát.»

²² Yesu guri báy, «Mungú haratlintieek.

²³ Án a kah, heé baraá muunaáwose xurumitaaká, tloomarí ga aleesláy ngiwa bay, ‹Quútl, ti kwahh baraá tlawi›. Birnga haratlintií' adór tidá' i kaahi ir tleehharút, i tsuwá tleehharút.

²⁴ Gawaá adoorihe nun baw, umuúqo gaaro ar ta fiririinda' baraá saalingwhunge, haratlintiaak adór kara sleeré', nee a toohúng.

²⁵ Kuungá' umuúqo bara sihhité' as tawa saaliinda', barnaxes gár hee nuwa sadakuús i deer, gurtlawaak, as Baabuúhúng oo gawaá doori tlakweemaahúng ngiwa gurtlay. [

²⁶ Barnaxes kuungá' tlakweemaá muu i gurtlatleera'aaká, tam Baabuúhúng oo gawaá doori tlakweemaahúng sleeme gi gurtlayká.]»

Múk aleesleemuú Yesu gu yaahamiís

²⁷ Tari malé Yerusalemúrií hardáh. Qoomár iwa baraá Doó Mungú wa hi'iimiti, kaahamuusér uren ar Mungú nee intsaahhatuusér hara'ayár Mosewo nee bariisero kuna i daqáy,

²⁸ kuri báy, «Muruuwí aleesleemuú kur tlehhit a gaalá, nee heé aleesleemuú muruuwí kur tlehhit ngwa kuúng i haniis a heemá?»

²⁹ Yesu giri báy, «Gár wák ngi dirhúng i yaahaás, kuungá' ngi tlaxwá'. Daqaní aníng aleesleemuú muruuwí ngur tlehhiit ngu dirhúng i oó'.

³⁰ Baatiísmoó Yohane amór naa daáhh a amór Mungúhe laqaá a amór muu? Amór naa daáhh ooare'.»

³¹ Tiri kilooín i warqayé' tari káh, «Ma ooaán? Bara ooaán, ‹Amór naa daáhh a amór Mungú›, tin bay, ‹Ahaá ala, musa haratlinti'i'iiká?›

³² An ooána, ‹Amór naa daáhh a amór muu›? » Ala tay da'ayuút adoodá' ooaro, asma múk yaariír Yohane gwaa tsaáhh adór tar aarusmoó ló'.

³³ Yesu kuri báy, «A xuanaaká.» Yesu giri báy, «Tam án sleeme aleesleemuú muruuwí ngur tlehhiit ngu dirhúng i ooaaká.»