Marko 10 - Biblía Axweesantá Hhohho' ar Mungú 2004

Yesu i kángw talaákár intsaahhatimis

¹ Yesu didaádae iri tláy, iri hardáh yaamaá Yudea ay gayuú Yordani. Boo/oó yaariír guri male i burumburiít, giri intsaahhatimís adoodá' /iisí i /imamiisi.

² Múk Farisayo guri yaahastá áy ar iiara, tari oó', «A hariímaáro hee hareerós ngiwa talaákárií haniisi?»

³ Yesu giri báy, «Gár Mose naa hara'ayín dirhunge a milá?»

⁴ Tari oó', «Mose ina ya/án hee hareerós ngiwa talaákár i haniisi.»

⁵ Ala Yesu giri báy, «Mose hara'ayasíng gana gooín asma tunduwa sage gawdén.

⁶ Ala iimír iimu/uungo Mungú yaamu ngiwa tleéhh, hhawaata nee /ameeni gina tleéhh.

⁷ Gawaá adoorihe, hee baabuúwós nee aayoorós gin geexáy, tiri haragwaaiyá' nee hareerós.

⁸ Kukaáká' tsár tari slaqwtá wák wák tleehhiit. Daxta kuká' tsár a sangw tsareeká, ala a slaqwtá wák.

⁹ Gawaá adoorihe, kuká' Mungú aa haragaás hee mingiwa paraátl.»

¹⁰ Tawa amór dó' i waátl eeharuuseerós axweesantadá' gari yaahás.

¹¹ Yesu giri báy, «Umuúqo heewo oo hareerós gaa guus, iri harér hatlá' duúx, hareerós gaa sadakuús as fuqi.

¹² Nee hare hhawaatuuwós burngwa geexeér, iri duuxór eér dír heé hatlá', inos aa fuqús.»

Yesu na/ii ngiwa tsuúq

¹³ Aluuwo muu na/aá ninakw gina amoorós i huúw as ngiwa kwatimiiti. Eeharuuseerós mukdá' na/aá koóm guri iigahhamít.

¹⁴ Ala Yesu adoodá' ngiwa ár, iri ló'wa buúhh, giri báy, «Na/aá ninakw mawaagáy i amor'eé' hardihiye', mi ila/aamara'. Asma awa adór kuká' waawuti'iimár Mungú a tooín.

¹⁵ Án a kah, heé waawuti'iimár Mungú gaa ya/aniká adór na/oó niinár ale, i dahiiká baraá waawuti'iimarihe.»

¹⁶ Yesu na/iidá' giri slaqwtósií óh, giri dabaawósií qaás, giri tsuúq.

Masoomoó daqaarmo

¹⁷ Qoomár Yesu iwa baraá aaií tlatlay, heé wák guna i daqáy ar gaanslaay guri i tumbarara'aát, guri yaahaás, «Intsaahhatusmoó hhoó', adór ni laaq a adoomá ar slafíngw alhhe'eesay wásl ngur aal?»

¹⁸ Yesu guri báy, «Mis hhooeemár ateetiín? Heé hhoó' i kaahh, aqo har Mungú kilós.

¹⁹ Ahaá baré hara'aya a xú', ‹Hee muu gaasaar, Ma fuquusaar, Ma fisisiimaar, Lamabu'úngw lama mu kaahaar, Ma al/agiimaar, Baabuúwók nee aayo ilaiwawa/eek.› »

²⁰ Masoomoodá' iri oó', «Intsaahhatusámo, tisíng sleémeero aga boo/eés iimír na/uumar'eene.»

²¹ Yesu guri i qaytsiít, guri slaá', guri báy, «Gár wák uga wa /aaruúr. Tláw, muruudá' ta koon sleémeero weeriseek, ku narkuutér i hanmís. Tók ar yaariir a gawaá doorí eér. Bara hhe'és, ni hardát, aníng ir eehát.»

²² Ala inós iri boo/áy as adoodá' Yesu ngwa báy, iri tláy ar gurhaami, asma inós a ló'wa daqaarmo.

²³ Yesu yaamu sleémeero giri xuuxuú', eeharuuseerós gari báy, «Ga/aawaak adór kar gawít múk daqaare tawa dahi baraá waawuti'iimár Mungú.»

²⁴ Eeharuuseerós axweesantós gari waa/ó/. Yesu giri malé báy, «Ná/ii, ga/aawaak dahmaá baraá waawuti'iimár Mungú adór kir gawít.

²⁵ Angamía iwa waarahh ar baraá fooxár laqwa, ka inslaahh ta daqaarmo iwa baraá waawuti'iimár Mungú i dahi.»

²⁶ Inooín tari ló'wa waa/oó/, kuri báy, «Ala barqo adoosíng heé ba/ám a heemá?»

²⁷ Yesu giri i qaytsiít iri oó', «Muu ga aleeslayká, ala dír Munguhe a adoosingeeká, asma dír Munguhe umuúqo gaaro i ya/aán.»

²⁸ Petro Yesu guri báy, «Ga/aaweegáy hamí, atén muruurén sleémeero ugwa geexawaán, kuúng uri eeharaán.»

²⁹ Yesu iri oó', «Án a kah, umuúqo heewo oo dooín ngwa geexay, laqaá hhaeewós, laqaá aayo, laqaá baabá, laqaá na/ii, laqaá qamu, as aníng nee as Ya/abtór hho',

³⁰ inós baraá yaamuukae, maraay nee hhae, nee amu, nee na/ii, nee qamu, gin sagaá wa tsiiruú wa sláy, dinkwa nee slahh'eemis. Aluuwo baraá yaamaá xaw'a slafíngw alhhe'eesay wásl gu malé sláy.

³¹ Ala awa yaariir kudá' geeraá hará' ta alhhe'eesáy kii/, nee kudá' alaá hará' ta geerií waaraahh.»

Yesu gwa'araarós ngiwa malé sagaáwa tám wa geerií oó'

³² Tawa Yerusalemúrí tsa/a/an, Yesu gina geerahaár loohiro. Eeharuuse iri waa/ó/, nee mukdá' nee inooín ti al koomá' tari da'ayuút. Eeharuuseedá' mibaá nee tsár gari ateét, adór inós ku laqi nee muu gari dir'ín i oó'.

³³ Giri báy, «Ga/aawaagáy hamí a tsa/a/amaán tawa Yerusalemú kawaan, nee Garmoó Hee ku qaas baraá dabaá kaahamuusér uren ar Mungú nee intsaahhatuusér hara'ayár Mose. Inooín ku sakwasleemuut as kuwa gaasi. Sakwasleemaro burkwa hhe'eés kway haniis amór múk xoordu.

³⁴ Inooín kway niqín, kway i tsuuqún, kway muux ar qaw'i, kway gaas. Deelo tám bira waaráhh nay waaslee/.»

Firór Yakobo nee Yohane

³⁵ Yakobo nee Yohane, daaqoó Sebedayo, Yesu nguri i daqayé', nguri bayé', «Intsaahhatusámo, gár ta dirók i firór wa sla'aan i deer, xaa ya/ameek.»

³⁶ Giri báy, «Gár ta sla'a' ar ni tleehh a milá?»

³⁷ Kuri báy, «Atén ti ya/aan tawa al iwiitaan nee kuúng baraá xirfuuwoge, heeko dakók oo doó /iyáy, kuqá' dakók oo doó basáy.»

³⁸ Yesu giri báy, «Gár ta fiririinda' a xua'aaká. Xooslmoodá' aníng ni wah, kuungá' u qitlá'a wahto? Laqaá baatísmoodá' aníng tir baatisi, kuungá' u qitlá'a?»

³⁹ Kuri báy, «Adoosíng a aleeslawaán.» Yesu giri báy, «Xooslmoodá' aníng ni wah, kuungá' u watá', nee baatísmoodá' aníng tir baatisi, kuungá' u qitlá'.

⁴⁰ Ala kángw kuungá' tawa iwita' heeqá' dakw'eé' oo doó /iyáy, kuqá' dakw'eé' oo doó basáy, kangwsíng a kwe'eeneeká. Heé kangwsíng a Mungú. Mungú kiteeriidá' gi haniis dír mukdá' ngisa amohhe'eés.»

⁴¹ Eeharuuseedár hatlá' mibaangw kaangwí nguwa axás, Yakobo nee Yohane kiri i buúhh.

⁴² Yesu giri ateét giri báy, «A xuá' mukduú adór waawituú urén baraá múk xoorduwo tan waawuti'ii'ín ar /uuru, nee inooínadá' uren muu ngun baliitiyá'.

⁴³ Ala dirhunge a adooriheeká. Heé uraay gu slaá' dirhunge, gár kuwa hariím a kuungá' nun sagadiyuus.

⁴⁴ Nee heé dirhunge kuungá' nu geerahartá wa slaá', gár kuwa hariím in lawaalamoohúng tleehhiit.

⁴⁵ Asma tam Garmoó Hee sleeme naa hardihiiká as kuwa sagadiyuusi, ala nina hardáh as inós muu nguwa sagadiyuusi, nee slafiingós nguwa duuxi tawa bu'utuú múk yaariír ngur tu/i.»

Yesu Bartimayo nguwa ila' qaytsitís

⁴⁶ Tari hardáh Yeriko. Yesu nee eeharuuseerós tari malé Yerikó wa tláy, dinkwa nee boo/oó úr. Bartimayo, garmoó Timayo, kuna afaá loohírií áy, i iwiwiit. Inós an kudaáduú taampa oo múk firaariím.

⁴⁷ Inós ngiwa axaás adór tar Yesú Nasareti in waaraahh, tseeo gari iimu/ún i kaahi, «Yésu, Garmoó Daudi, án gurtlawáng.»

⁴⁸ Múk yaariír guna iigahhamiít as iwa xasliiti, ala inós tseeooro iri ak buúhh, «Garmoó Daudi, án gurtlawáng.»

⁴⁹ Yesu iri sihhiít iri oó', «Ateetare'.» Heedaáduú taampa kuri ateét, kuri báy, «Dae maweek, sihhiitáng, Yesu u ateetín.»

⁵⁰ Inqwaarirós gari amorqií kwaáhh, iri tláy amór Yesu ar gaanslaay.

⁵¹ Yesu guri báy, «Adór ta sla' ar u laaq a adoomá?» Heedaáduú taampa iri oó', «Intsaahhatusmooeé', gár ni slaa' a ilaaeé' nin qaytsitiyá'.»

⁵² Yesu guri báy, «Tláw gimáy, haratlintaaoorók ugwa hungu/ús.» Siiwadár kilae ilaawós niri qaytsitiyé', nee Yesu tari koné'.