Marko 1 - Biblía Axweesantá Hhohho' ar Mungú 2004

Alki/ituú Yohanedá' Baatimaamiís

¹ Gaarí a iimu/úngw Ya/abtór hho' daanduú Yesu Kristo, Garmoó Mungú.

² Adoodá' baraá kitaábuú aarusmo Isayuwo kara gooín, «Ga/aaweek, ya/abusmooeé' u geeraawók wa ya/aáw, oo loohirók ga amohhe'eés.

³ Afór hee iiárií qaasaak ar baraá darmuú wa tseeamiim, ar kah, ‹Loohír Aako amohhe'eesaak, nee waarahhmaawós gan'aasaak.› »

⁴ Ala Yohanedá' Baatimaamiís niri hardáh, iri baraá darmuú wa baatimiís. Iri alki/iít iwa kaahi, «Hhu'u'umé' tundu baatimiisi as Mungú tlakweemaahúng ngiwa gurtlay.»

⁵ Xoorór yaamaá Yudea sleémeero nee múk Yerusalemu sleémeero kuri i daqáy, kiri baraá yaaér Yordanír wa baatimiís, as tlakweemaaín kiwa hhu'u'ún.

⁶ Tsitoó Yohane kuna tleéhh ar se'éngw angamía, nee afeetloowós a himú kaahari, nee muruú /aymaarós a ingigi nee danú sla/a.

⁷ Inós iri alki/iít, iri káh, «Heé aleesleemuú koóm oo án i baá/ ni aluueé' wa hardah. Tam aníng a hariimaaká niwa xupuu' him'ér ya/ataawós ngiwa slakwekwe'ees.

⁸ Aníng nuna baatimiís ar ma'aay, ala inós nu baatimiis ar Qeeruú hhoohhoó' oo Mungú.»

Yesu kuwa baatiís

⁹ Deeloodae Yesu iri hardáh, i amór gixsár Nasaretír daahh, ar baraá Galilaya, nee Yohane guri baraá yaaér Yordanír wa baatiís.

¹⁰ Siiwadár kilá' iwa baraá ma'áy wa ti'iít, doori gina ár naa gweeritiyé', nee Qeeruú hhoohhoó' oo Mungú i gawaawósí awdiit adór hhooki.

¹¹ Afo nay gawaá doorí wa ilawáts, i kat, «Kuúng a Garmaaeé', sla'aarusmooeé', oo aníng iga qwal/atis.»

Yesu kuwa iiaraa'ár

¹² Siiwadár kilae Yesu kuri huúw nee Qeeruú hhoohhoó' oo Mungú baraá darma.

¹³ Ina baraá darmuú wa hoót deelo mibeeri tsiyáhh, kuna iiara'ár nee Neetlaangw. Yesu i dinkwa nee makaá sla/a, nee malayke guna sagadiyús.

Yesu múk tsiyáhh oo siyoó ohiím nguwa ateet

¹⁴ Tam alaá Yohane kuwa tseék, Yesu iri Galilayár káy, Ya/abtór hho' ar Mungú gari alki/iít,

¹⁵ iri káh, «Qooma aa bó/, nee waawuti'iimár Mungú naa tseewuúr. Hhu'uu'umé', nee Ya/abtór hho' haratlintiaagáy.»

¹⁶ Qoomár Yesu iwa waaraahhi dír afaá tlawtá Galilayaro, Simon guna ár, nee hhiyaawós Andrea, ta baratsufoó kwakwaahh baraá tlawi, asma inooín i siyoó ohaahiná'.

¹⁷ Yesu giri báy, «Qwalaasé', án eehararé', án kuungá' nu intsaahhatís adór muu ngur amor'eé' huwaahuba'.»

¹⁸ Siiwadár kilae baratsufay'ín kuri geexáy, Yesu kuri eehár.

¹⁹ Yesu gár niinawe iwa geerií kumiít, Yakoboó Sebedayo nee hhiyaawós Yohane giri ár. Inooín sleeme ta baraá miringamo, ta baratsufay'ín amohhe'eemiis.

²⁰ Siiwadár kilae giri ateét, baabuúín Sebedayo kuri geexáy baraá miringamo dinkwa nee mukdá' ta bu'un, tari daqáy, Yesu kuri eehár.

Heé neetlaame aa eér

²¹ Tari tláy ay Kapernaumu, siiwadár kilae bál deelór Sabaátoro Yesu iri dáh baraá doó saaliingw, iri intsaahhatimís.

²² Intsaahhatimisuuwós kuri waa/oó', asma Yesu inooín gina intsaahhatimís adór heé hara'ayár koóm, aa intsaahhatimisiiká adór intsaahhatuusér hara'ayár Mose.

²³ Qoomaadae baraá doó saalingw'ine heeko i deer oo neetlaame aa eér, iri tseé',

²⁴ Yesu guri báy, «Atén nee kuúng a milá, Yesú Nasareti? Ahaá, nina hardáti as atén tiwa qwaares? Án kuúng u xuú' adór tar heemá, Kudá' Hhoohhoó' oo Mungú.»

²⁵ Yesu neetlaameedá' gari iigahhaát, gari báy, «Xasliité', ti'iité'.»

²⁶ Neetlaameedá' hee guri pungaahhamuúr, iri tsé' ar afór ur, guri geemeér.

²⁷ Tari ló'wa waa/oó/ sleémeero, tam tiri yaahamisiyé' tari káh, «Gár adoorí a milá? A intsaahhasár /abéne? Ahaá baré ar aleesleemuwo tam neetlaame gan hara'ayiyín, inós gway ilaiwaawá/.»

²⁸ Siiwadár kilae kangós iri tsiyaayaaxaát umuúqo diiro baraá yaamu sleémeero awa bihhér Galilaya.

Yesu múk yaariír nguwa hungu/uumiís

²⁹ Tindiwa baraá doó saalíngw wa ti'iít, tari hardáh dír doó Simon nee Andrea, dinkwa nee Yakobo nee Yohane.

³⁰ Aayór harér Simon i qatií dirí', ga/atani gaa ót, kangós kwihe Yesu kuri ádbáy.

³¹ Yesu gari harasuruúk, gari dawa óh, gari tleés, ga/atani gari geemeér. Aayoorí inooín giri sagadiyús.

³² Qoomár tsiindo looa iwa dát, kuna múk yaariír i huwahuúw oo tiqtuuse nee oo neetlaame aa aeér.

³³ Nee múk gixsa sleémeero ina burumburiít afkú doó i ale.

³⁴ Múk yaariír oo tiqtír dimbadimbé ga koóm guri hungu/umiís, neetlaamér yaariir gari hingeemiís, sleeme neetlaame gaa mayká iwa axwes, asma gwaa xú'.

Yesu ii Ya/abtór hho' alki/ituú áy

³⁵ Nee matlaatlér boo/e iri tláy iri ti'iít ay dír muu iwa kahhi, iri firín didaádá' wa ale.

³⁶ Simon nee kudá' ti al koomá' kway leelehhiít.

³⁷ Inooín kuwa sláy kuri báy, «Muu sleémeero i kuúng leelehhiit.»

³⁸ Inós giri báy, «Qwalaasé' amór hatlá', amór gixsadaá tsewen, as Ya/abtór hho' ngiwa alki/iit amorqane sleeme, asma gaarí an gár aníng nisa hardáh.»

³⁹ Iri daqáy baraá ayaá Galilaya sleémeero, iri alki/iít baraá maray'ín awa saaliingo, nee neetlaame gari hingeemiís.

Yesu heé tiqtír tsatimit nguwa hungu/uús

⁴⁰ Heé tiqtír tsatmit ina hardáh dirós, guri i tumbarara'aát, guri firiirín iri oó', «Kuúng bar slá', án i aleesleér iwa hheehhe'es.»

⁴¹ Guruuwós iri tláy, guri dakós i gan'aás, guri kwatiít, guri báy, «Án a slaá', hhoohhooúw.»

⁴² Nee hamtidá' tiqtirós tidár tsatmit iri qútl, inós iri hunguú/.

⁴³ Guri hara'ayín kángw kilá' wa ale, guri quutliís hamtidár kilá',

⁴⁴ guri báy, «Ga/aaweek, hee mu /aymuú bawaar, ala tláw ti laqaan dír kaahamusmoó Mungú. Muruudá' Mose aa hara'ayín haniiseek asma hungu/umaawók, as tí iwa lamabu'uungw tleehhit dir'ine.»

⁴⁵ Ala heedá' iri ti'iít, kangwdá' guri alki/iít ar axweesanoó yaariír, nee guri tsiyaayaaxán, tam Yesu pa/aangw gwa slayká oo iwa dahi baraá gixsa ar geehhooeema. Ala iri tsee/aá wa iwiwiít dír muu iwa kahhi, nee umuúqo diiro kuri i daqaaqáy.