MALAKI 2 - Biblía Axweesantá Hhohho' ar Mungú 2004

¹ «Ala daxta, kuungá' kaahamuusér Mungú, hara'ayaarí i kuungá' wa hariín.

² Axaasaro bar sla'a'aaká, nee bar baraá munér i qaasaro a sla'a'aaká, as umuueé' iwa xirfuuti,» AAKOÓ MUNGÚ Aleesleemusmo i kaahi, «nu lo'órí huúw. Aníng tsuuqaahúng in lu'ús, nee, iga qaroó lu'ús, asma tí a baraá munerhúng i qamiinda'aaká.

³ Qaytsité', aníng na/iihúng i iigahhaát, nee gitsee/erhúng an sliík ar tsuunkáy, ar tsuunkáyduú muruudá' naa ilahhooár wa hubé'. Tam kuungá' sleeme nu muruuhúng kudá' alguús.

⁴ Kuungá' kari xuá' adór aníng kuungá' nura hara'ayaarí i huúw, as alqador'eé' nee Laáwi iwa kumaamit.» AAKOÓ MUNGÚ Aleesleemusmo tí ngina oó'.

⁵ «Alqador'eé' nee Laáwi a alqadór slafiingw nee ar wayda. Aníng ana haniís as inós aníng iwa ilaiwawaa/i. Inós aníng iri ilaiwawaá/, umuueé' guri qiitliiká.

⁶ Hara'ayár ló' i baraá afkós, tam al/ayma i káhh baraá afkose. Ina hi'iimiít dinkwa nee aníng ar wayda nee gan'amu, nee awa yaariir nay warqayé', tlakweema ngay mayé'.

⁷ Asma kaahamusmoó Mungú gár kuwa hariím a intsaahhatimisuú ló' gun harmagaahh, nee muu hara'aya gari dirós i lehhiit, asma inós tawa ya/abusmooeé', anuú AAKOÓ MUNGÚ Aleesleemusmo.»

⁸ «Ala kuungá' ana warqeeré', loohi kay geexeeré', múk yaariír ugwa paslisé' baraá hara'ayaaro, alqadór Laáwi aga sié',» AAKOÓ MUNGÚ Aleesleemusmo tí ngina oó'.

⁹ «Gawaá adoorihe aníng kuungá' naa gár waaqa'atiit tleéhh, nee daqatlaakw, dír geeraá muu sleémeero, ar adoodá' hara'ayar'eé' kawa gaárí xua'aaká, ala muu una barqaantusé' baraá hara'ayar'eene.»

Muu i inkihhimuú konká dír Munguhe

¹⁰ Xáy, atén sleémeero baabuúrén a wákeéke? Munguú taa tleehh a wákeéke? Ahaá baré umuúqo heewo hhiyaawós gun muruú tlákw i tlehhiit, alqadaá baabi'iirén in hhititimaán.

¹¹ Múk Yuda adór qoomaaká gaa tleéhh, aahhi aa tleehharút baraá Israeliwo, nee baraá Yerusalemu. Asma múk Yuda Doó AAKOÓ MUNGÚ kudá' i slai gwa slasla/areés, inooín munguaá xoordaá hatlá' ngina sluufmiisiyé'.

¹² AAKOÓ MUNGÚ heé kaangwí gu tlehhiít ngu paraatli dír tlahhoó múk Yakobowo. Nee umuúqo heé AAKOÓ MUNGÚ ngu ilahhooárií hanmiisa, ngu paraatli, tam ilahhooarós sleeme mingiwa baloó haniís dír geeraá AAKOÓ MUNGÚ Aleesleemusmoowo.

¹³ Tí sleeme an tlehhitá', kitangwduú ilahhooa, un tuntukuundá' ar hhirhheeri, nee ar /aa/e, nee ar /ifo, asma ilahhooarhúng gan sangw ilaoohiiká ar qwala/.

¹⁴ Ala kuungá' a kata', «Asma milá?» Asma AAKOÓ MUNGÚ tawa lamabu'usmoó al'axweesani tla/ángw kuúng nee hareerók ar bi/i, tidá' taa sí' inós tam toge, nee harér al'axweesantók.

¹⁵ Ahaá, a Mungúheéke oo kuungá' tsaraawo naa tleehh tawa slaqwtá wák tleehhita' nee qeeruú wák? Nee inós gár i slai a milá? Nee inós gár i slai a xwaylár Mungú gu ilaiwawaa/. Gawaá adoorihe ti harmagahhe', hee tumu wák hareerós ar bi/i mingiwa sií'.

¹⁶ AAKOÓ MUNGÚ, Munguú múk Israeli i kaahi, «Asma aníng s a sla'aaká hee hareerós ar bi/i ngiwa huushi si'imawo. Aníng alsi'imuú adór kwí u aáhh, hee tumu wák hareerós ar bi/i ngiwa huushi si'imawo.»

Deelór sakwasleema aa naká/

¹⁷ AAKOÓ MUNGÚ ugwa slaaqatisé' ar /aymi'iihúng. Ala kuungá' a kata', «/Ayma'aá kura slaaqatiisaán a gaalá?» Asma tawa kata', «Umuúqo heé tlakweemaá tlehhiít ku hhoó' dír ilaá AAKOÓ MUNGUHE. Inós múk adór kwí gun sa qwalalaa/,» laqaá tawa kata', «Munguúdá' sakwasleemár ganaa' ga tleéhh i amá?»