MALAKI 1 - Biblía Axweesantá Hhohho' ar Mungú 2004

¹ Kaangwí a axweesantá AAKOÓ MUNGÚ ar afkú aarusmo Malaki dír múk Israeliwo.

Sla'aarír Mungú dír múk Israeli

² AAKOÓ MUNGÚ i kaahi, «Aníng kuungá' naa slaá'.» Ala kuungá' a kata', «Adór tira slá' a adoomá?» AAKOÓ MUNGÚ i kaahi, «Ahaá, Esau a hhiyoó Yakobowookáhe? Aníng Yakobo ugwa slaá',

³ ala xwaylár Esau ana aáhh, nee tlom'aá yaamaá Edomu ngay deewa'atís, nee aalir'ín ngay intsaawér i haniís.»

⁴ Barnaxes múk Edomu, kuduú xwaylár Esau, i kaahi, «Gixsaduurén kaa hhitín, ala didá' taa feé/ kay tleehhaán.» Ala AAKOÓ MUNGÚ Aleesleemusmo i kaahi, «Inooín ngi mak tleehhiyá', ala aníng maray'ín kudá' i feé/. Nee inooín kiri adoorír ateet tawa kaahi, ‹Yaamaá múk iranguuse,› nee inooín kiri bay, ‹Mukdá' AAKOÓ MUNGÚ i buhhaabuhhi daqisleém.› »

⁵ Ilaahunge kaangwí un aandá', nee tari oa', «AAKOÓ MUNGÚ ku úr baraá xoorór Israeliwo, tam ayeemaá baraá xoordaá hatlae sleeme.»

Mungú i kaahamuuseerós iigahhamiit

⁶ AAKOÓ MUNGÚ Aleesleemusmo kuungá' nun yaahamiis, «Na/aay baabuúwós gun ilaiwawaa/, nee sagadiyusmo aakoowós gun ilaiwawaa/, ala aníng bar baabuúhúng, ilaiwa/amer'eé' i amá? Nee aníng bar aakoohúng, ilaiwa/amer'eé' i amá? Kuungaá kaahamuusér Mungú, awa umuueé' ngu waaqaqa'á', kuungá' a kata', ‹Umuuwók adór ngura waaqaqa'aán a adoomá?›

⁷ Muruú /aymár tligoó koóm u duxuundá' dír kitangwduú ilahhooar'eé'. Ala kuungá' a kata', ‹Adór kura slasla/areesaán a adoomá?› Asma kuungá' an kata', ‹Kitangwduú ilahhooa a gár waaqa'atiit.›

⁸ Kuungá' ilahhooár muruú ta tsu/i ar gár taampa ngiwa hanmisa' ka hhoóe? Nee ilahhooár gár toqoori laqaá gár tiiq ngiwa hanmisa' ka hhoóe? Xáy muruú adór kwí bura hanís dír ga/aawusmoowók, ku hhoóe dirose? Gu ya/aána?» AAKOÓ MUNGÚ Aleesleemusmo ngina oó'.

⁹ Ala daxta aníng kuungá' nu firiím, gurhhooár Mungú na firiimaak, as tiwa gurtlay. Barnaxes muruú adoosíng i baraá dabaahúng daahh, xáy, Mungú nuqo hhoeemií tleéhhi?

¹⁰ AAKOÓ MUNGÚ Aleesleemusmo i kaahi, «Masók geeraawo heé wák dirhunge nin deeruut, oo afér Dooeé' ga tseék, as asla kawa tawó oohisa'aaká dír kitangwduú ilahhooar'eé' kay hanmaamisa'. Qwal/uueé' i kaahh dirhunge, tam ilahhooár dabaahúng án a ya/aamaaká.

¹¹ Asma iimír amoodá' looa iwa tsiraarihh, tam ay amoodá' i darat, umuueé' ku úr baraá xoorduuwo. Umuúqo mooyángw tsuú' kun da/aa/án nee ilahhooár hhohho' kan hanmiis asma umuueé' ku úr baraá tla/ángw xoorduuwo!

¹² Ala kuungá' umuueé' un slasla/aremisá', asma tawa kata', ‹Kitangwduú ilahhooa kay hanmaamisi kwaa slasla/areés, nee muruú /aymaadá' taa gawaadií qaás a gár waaqa'atiit.›

¹³ Kuungá' a kata', ‹Aga slaaqamiitaán muruuwí sleémeero!› Nee iri waaqaé'.» AAKOÓ MUNGÚ Aleesleemusmo tí ngina oó', «Kuungá' muruú naa /awa/awiindé', nee oo toqooraay, nee oo tiqtuuse, un ilahhooar'eé' wa hanmisa'. Xáy, aníng a ya/aáma muruú adór kwí nguwa amor'eé' hanmisa'?» AAKOÓ MUNGÚ tí ngina oó'.

¹⁴ «Heé al/aymusmo ku lu'usi, kudá' baraá daqtose gár xaslxaanslír koom ga ilahhooár wa gaamiís dír Aakoó i alé, ala laatí baraá al'axweesantose yaqaambuú hhoó' guna oó'! Asma aníng a Waawutmoó úr. Umuueé' baraá xoorduuwo i dae tlaaq. Anuú AAKOÓ MUNGÚ Aleesleemusmo tí ngina oó'.»