Luka 9 - Biblía Axweesantá Hhohho' ar Mungú 2004

Yesu eeharuuseedár mibaá nee tsár ngiwa ya/aáw

¹ Eeharuuseedá' mibaá nee tsár gari ateét, gari aleesleemuú i haniís nee /uuru, oo neetlaame sleémeero kawa duxun nee tiqtuuse kawa hungu/uumisi.

² Aluuwo gina ya/aáw waawuti'iimár Mungú kawa alki/iiti, nee tiqtuuse kawa hungu/uumisi.

³ Yesu giri báy, «Baraá aaiihunge ma gaa huwara', hhara laqaá tlakwaay, laqaá muruú /ayma, laqaá peésa. Tam heé wák inqwar munguwa tsár wa huúw.

⁴ Doó taa i hardaté' na hootaak ay dír yaamuudá' ki geexeera'.

⁵ Múk kuungá' naa sii', bar qutlá' dír gixsadae, teerír ya'aahúng ka alií kukuá', as iwa gurbua tleehhit dir'ine.»

⁶ Tari tláy tari hi'iimiít baraá ayko, Ya/abtór hho' kari alki/iít, nee muu kuri hungu/uumiís umuúqo diiro.

Xurér Herode

⁷ Geeraharusmo Herode kangwdá' sleémeero aa tleehharuut nguwa axaás, iri amoqwaár. Asma múk yaariír ta kaahi, «Yohane naa baraá gwa'arár wa waasleé/.»

⁸ Bahh'alé ta kaahi, «Eliya nina ti'iít.» Bahh'alé ta kaahi, «Aarusmoó wák oo aaruuseedár qaro nina waasleé/.»

⁹ Herode iri oó', «Yohane una saga tsaát, daxta heewí kangós án ni axamiis a heemá? Guri artá wa slaá'.»

Yesu múk kume kooán nguwa

¹⁰ Ya/abuuseedá' niwa kí/, muruudá' taa tleéhh sleémeero kuri dír Yesú ii alki/iít. Girira tláy ar sufa ay baraá gixsár ta bay Bet-saida.

¹¹ Muu nguwa axaás kuri eehár. Giri dahi'ís, kángw waawuti'iimár Mungú guri dir'ín i axweés. Kudá' hungu/uumisuú sla'á' giri hungu/uumiís.

¹² Looa iwa darat eeharuuseedá' mibaá nee tsár guri i daqeér guri beér, «Muksíng watliseek, as tawa ki/i baraá tla/ángw áykwí alé, dír qatuuín kawa leeleehhi nee muruú /ayma, asma diirí ti diriiaan a baraá darmuú tawo.»

¹³ Inós giri báy, «Kuungá' muruú /aymárí haniisaak.» Tari oó', «Gár ta koomaan i káhh, aqo har mikaátér kooán nee siyoó tsár kilós. Muruú /ayma un tlaxór awána oo mukwí sleémeero i /ayi?»

¹⁴ Asma hhawaate kilooín a afi qoomoó kume kooán. Eeharuuseerós gari báy, «Muu iwiitisaak ar daqooráy, umuúqo daqto muu mibeeri kooán.»

¹⁵ Adoodá' kari tleéhh, sleémeero kiri iwiitiís.

¹⁶ Mikaáteedá' kooán nee siyoódá' tsár giri taataáhh, iri gawaá doorí qaytsiít, iri sluufiís, giri qasmiís giri eeharuuseerós i haniís, as kiwa múk i qasmiisi.

¹⁷ Sleémeero tari /ayín, tari aáx. Nee muruú /aymár aa meet kuna burumbuúr, katatoó mibaá nee tsár kuri hatsiís parhheemaá naa meetii'i.

Lamabu'úngw Petro aa oó' daanduú Yesuwo

¹⁸ Qoomár Yesu iwa kilós firiirin, eeharuuseerós ka dír bihhiiwósií tseew. Giri báy, «Muu iwa axweesi, mata kaáhi, án a heemá?»

¹⁹ Kuri báy, «Ta kaahi kuúng a Yohánedá' Baatimaamiís. Bahh'alé ta kaahi a Eliya. Bahh'alé ta kaahi a aarusmoó wák nina waasleé/ baraá aaruuseedár aange.»

²⁰ Giri báy, «Kuungá' ma katá', án a heemá?» Petro iri oó', «Kuúng a Krístoó Mungú.»

Yesu gwa'araarós ngiwa geerií oó'

²¹ Yesu giri báy, «Kaangwí ló' mu heé bawaara'.»

²² Iri oó', «Garmoó Hee gár kuwa hariím a slahh'eemisuú yaariír ngun sláy, nee kun siasii' nee bariise, nee kaahamuusér uren ar Mungú, nee intsaahhatuusér hara'ayár Mose, nee kuri gaas, bál tame nay waaslee/.»

²³ Sleémeero giri báy, «Umuúqo heewo bar anií eehartá wa slaa', sla'aarirós ngi gunqareesi, msalaábarós ngi gagaari umuú deelooro, aníng i eehari.

²⁴ Asma umuúqo heewo oo slafiingós gu kilós ba/amisár wa slaá', gu qwaarees. Nee heé slafiingós qwaareesaro gwa ya/an as aníng, slafiingós ku amohhoó'.

²⁵ Asma tam hee yaamu sleémeero ngi slaya, gár nguwa buiya', bar inós taa kilós qwaareés?

²⁶ Asma umuúqo heewo oo aníng isa muruumiít nee axweesante'eé', Garmoó Hee heé adoorí gun sa muruut, bal birna hardáh ar baraá xirfuuwós nee oo Baabá nee oo malaykér hhohho'.

²⁷ Tí ar ló' án ngi kuungií oó', ‹Mukko i deer baraá mukwí diirí wa sihhimita, oo baloó qatlaaká ay dír waawuti'iimár Mungú kay ari.› »

Kaloó Yesu iwa warqáy

²⁸ Alaá axweesantihe deelo dakaát iwa waaráhh, Yesu Petro nee Yohane nee Yakobo ginara tláy, iri firór áy gawaá tlooma.

²⁹ Qoomár iwa firiirin, kaloó gitsee/awós ina warqáy, tlabaawós nay /awakukuyé', niri miirii/iyé'.

³⁰ Naxés múk tsár nee inós ta axwees. Mukwí a Mose nee Eliya.

³¹ Inooín nina geehhoouyé' ar baraá xirif. Ta kángw gwa'araarós axwees tidá' i boo/eesár ay baraá Yerusalemu.

³² Petro nee mukdá' ti koomá', gu'ute girira bá/. Ala niwa daarkiitiyé', xirfuuwós kuri ár, nee mukdá' tsár nee inós al sihhimiitá'.

³³ Qoomár mukdá' tsár nee Yesu tiwa paraatliyé', Petro guri báy, «Aáko, ka hhoo' atén tawa diirí diriiaan. Isleeraá tám i tleehhaán. Oo wák a kók, kuquú Mose, kuquú Eliya.» Inós laatí gár i kaahi gaa xuiiká.

³⁴ Inós iwa adoorí kaahi, huunki nina ti'ít, giri geehhantés. Tari da'ayuút tawa baraá mahhtír huunkidí dáh.

³⁵ Afo nay baraá huunkidá' wa ilawáts, i kat, «Kwí a Garmaaeé', kudá' naa tsawaár. Inós iiárií qaasaak.»

³⁶ Afoodá' iwa xaslít, naxés Yesu a kilós. Inooín tari xasliít, kangwdá' taa ár kwaa ooiiká dír heewo deeloodae.

Yesu garmoó neetlaame aa eér nguwa hungu/uús

³⁷ Looaytleérós Yesu nee eeharuuseerós niwa gawaá tloomár wa aweeriyé', tina doogiyé' nee boo/oó úr.

³⁸ Heeko wák baraá boo/aywo ina tseé' i kaahi, «Intsaahhatusámo, án kuúng u firiím, na/ay'eé' areek. Asma an na/ay'eé' oo kilós.

³⁹ Ga/aaweek, neetlaame gun aaeér. Qoomár burngwa eér in tseeamín, slám gu /aramiimís. Nee slooro gan tlaqaas. Neetlaameedá' gu slahh'eemís, slám gu gimeeraaká, aqo ar ma/iís.

⁴⁰ Eeharuuseerók ana firiím ngiwa dux, ala gaa harslaaqát.»

⁴¹ Yesu iri oó', «Kuungá' múk de'emaaká' oo haratlintaao wásl oo aa paasl, án nee kuungá' ni al hotaatimaan ay xaylá?» Yesu heedaádá' guri báy, «Garmaawók diirií huwang.»

⁴² Iwa amoodá' kay, na/aydá' neetlaame guri yaamií dáhh, guri pungaahhamuúr, Yesu neetlaame gari iigahhaát. Na/aay guri hungu/uús, guri dír baabuúwós i ki/ís.

⁴³ Muu sleémeero adór Mungú kur úr kawa ár tari waa/oó/. Qoomár muu muruudá' Yesu aa tleéhh nguwa waa/oo/amín, Yesu eeharuuseerós gari báy,

Yesu gwa'araarós ngiwa malé geerií oó'

⁴⁴ «Axweesantí ooha hhe'eesaak baraá iaahunge, ‹Garmoó Hee ku gawaá dabaá múkwí qaas.› »

⁴⁵ Ala inooín tidá' i kaahi kaa tsaahhiiká. Inooine kaa luú/ as makawa tsaáhh. Yaahasto kuri da'ayuút, gídaabár axweesantadae.

Heé ak úr a heemá?

⁴⁶ Kaangaani kari iimu/ún ar tawa kaahi, heé úr a heemá dir'ine.

⁴⁷ Yesu tidá' taa baraá muner'íní axweesi ngiwa tsaáhh, na/oó niiná guri óh, guri dír bihhiiwós i qaás.

⁴⁸ Giri báy, «Heé na/aywí gwa umuueénár ilaoh, heé aa ilaóh a aníng. Nee kudá' aníng iga ilaoh, kudá' aníng iga ya/aaw guna ilaóh. Asma kudá' ló'wa niiná dirhunge, an kudá' úr.»

Heé atén ti tlaampa'aamisaaká i gayuurén

⁴⁹ Yohane iri ilawaáts, iri oó', «Aáko, heé neetlaamér duxuúm ar umuuwók una araán. Kuri iigahhaataán asma inós nee atén ti alkoomanaaká.»

⁵⁰ Yesu iri oó', «Mu iigahhamiitara'. Asma heé kuungá' nu tlaampa'aamisaaká, i gayuuhúng.»

Yesu kuwa Samariár wa sií'

⁵¹ Qoomár deeloorós ar kuwa gáwtí huwi iwa tseewuúr, inós iri piíhh iwa Yerusalémúr kay.

⁵² Muu gway geerií ya/aáw. Tari tláy tay dáh yaamaá Samaria, asma dirós kawa amohhe'eesi.

⁵³ Ala múk yaamuudá' gwa ilaohiiká, asma adoodá' iwa Yerusalémúr kay.

⁵⁴ Eeharuuseerós Yakobo nee Yohane adoorí kawa ár, kuna báy, «Aáko, a slá'a asla kawa ateetaan, niwa gawaá doorí wa /et, as mukwí nguwa qwaares.»

⁵⁵ Iri amor'íní warqáy, giri iigahhaát. [Iri oó', «Kuungá' qeeruú ta eeharahada' ugwa tsahhi'iiká.

⁵⁶ Asma Garmoó Hee naa hardihiiká as muu nguwa qwaareesi, ala nina hardáh as nguwa ba/amisi.»] Tari tláy, tari quútl amór hatlá'.

Múk Yesu gu eehartá wa slaá'

⁵⁷ Qoomár tawa hi'iiti loohiro heeko guna báy, «Án kuú u eehár umuúqo dír ta keera.»

⁵⁸ Yesu guri báy, «Intsaawe i mar'ór koón, nee tsir/o i maray'ín koón, ala Garmoó Hee tam dír sagós ngway qaasi i káhh.»

⁵⁹ Heé hatlá' guri báy, «Aníng i eeharáng.» Heedaádá' iri oó', «Aáko, ala ya/aám, baabuúeé' ngu ala foól.»

⁶⁰ Yesu guri báy, «Maweegáy múk adór tu'u tuaá muk'ín ngi foliitiye'. Kuúng tláw, waawuti'iimár Mungú alki/iituú aweek.»

⁶¹ Heeko hatlá' sleeme Yesu guri báy, «Aáko, án kuúng u eehár. Ala, kuúng ya/aám, múk dooeé' nguwa ala kángw báw.»

⁶² Yesu guri báy, «Heé kurmoó doosla gwa oh, aluuwo iri alií xumiis, waawuti'iimár Mungú ga hardahasiiká.»