Luka 8 - Biblía Axweesantá Hhohho' ar Mungú 2004

/Ameenár nee Yesu taa kone'

¹ Aluuwo Yesu iri baraá gixsaduú wa hi'iimiít nee baraá ayeemo, i Ya/abtór hhó' alki/iit ar waawuti'iimár Mungú. Eeharuuseedá' mibaá nee tsár nee inós ti koná',

² nee /ameenarka geeraawo neetlaame aa eér nee tiqti, kari hungu/uús. Umer'ín a Mariadá' ta bay Magdalene, tidár neetlaamér faanqw kawa duxún,

³ nee Yoana harér Kusa, kudá' daqaari'iimár Herode ki saayín, nee Susana nee awa hatlá' awa yaariir. /Ameenadá' inooín gina sagadiyús ar daqaari'iimar'ín.

Slaqsoó dahaasusmo

⁴ Qoomár boo/oó yaariír oo muu iwa burumburiít, nee múk baraá gixsadaá dimbadimbé daáhh, niwa dirósí hardihiyé' Yesu giri slaqsaywí báy.

⁵ «Heeko wák ina dahaasíngw áy, qoomár iwa dahaasin dahaasiingw guna tsaafimiís, bahh'alé ina paáhh baraá loohi, kuri kal/án nee muu, tsir/o guri /ák.

⁶ Oo hatlá' ina paáhh gawaá tlaa/a. Niwa ti'iít iri káh, asma hhapér kilá' i káhh gawaadae.

⁷ Oo hatlá' ina paáhh baraá laqaya', nee laqaya' niri al ti'iitiyé', laqaya' ngway tliiqiyé'.

⁸ Oo hatlá' iri paáhh baraá hhapér hho', niri ti'iít iri laqwaál oo wák tsiiru.» Kaangwí nguwa dir'ín i kaahi, ina tseé' iri oó', «Heé iaá axamis gi koóm, i axaasi.»

Gár slaqsi'i kisar intsaahhatimisi

⁹ Eeharuuse Yesu guri yaahás, «Gídaabár slaqsaywí a milá?»

¹⁰ Giri báy, «Kuungá' xu'uti aga sleeré' daanduú naaqór baraá waawuti'iimár Munguhe. Ala múk hatlae an slaqsi'ír kaahaán, as kahhó' ta qaytsiiti makawa ár, nee ta axaasi ala makawa tsaáhh.»

Gídaabár slaqsoó dahaasusmo

¹¹ Yesu giri báy, «Gídaabár slaqsaay a tí: Dahaasiingw a axweesantá Mungú.

¹² Kuduú baraá loohi an slaqsoó mukdá' gaa axaas, aluuwo Neetlaangw nay hardáh, axweesantadá' gari hingeés baraá muner'ine, kari sangw haratlinti'iiká tawa ba/an.

¹³ Kuduú gawaá tlaa/a an slaqsoó mukdá' axweesani gaa axaas, kari ilaóh ar qwal/amaaye, ala dee/áruuín i kaahh. Haratlintaaor'ín ar deelór niina. Qoomár iiara'at birna xáy, kay máy.

¹⁴ Kudá' paahh baraá laqaya', an slaqsoó mukdá' gaa axaas, baraá hotaaine kiri tliíq nee daawitame nee daqaari'iima nee qwal/amaayér slafíngw baraá yaamu, axweesantadá' mamuuwós gay hamaaresiká.

¹⁵ Kuduú baraá hhapér hho' an slaqsoó mukdá' axweesani gaa axaas, kari ooha hhe'eés ar munér ilaiwa/ame, iri laqwál ar qitla.»

Tsaa'astá baraá geetlakweema

¹⁶ «Hee i kaahh oo tsaa'asi birnga hhe'eés da/ato, ga tuuntuúk, laqaá ngiwa qaasi baraá guruú qatani. Ala gan qaas dír geehhoo', asma mukdá' daraha gwa/aateema ngiwa ari.

¹⁷ «Umuúqo gaaro ar geehhooeeká i geehhoouúr, nee umuúqo gaaro ar taa luú/ ka xu'utis iri geehhoouúr.

¹⁸ «Gimsé', iiárií qaasa hhe'eesaak, tidá' ta axamisa'. Asma umuúqo heewo oo gár koóm ka dook, nee kudá' gár koomaaká, tam tidá' geeraawo i tós i xui ka hayoh.»

Hha'aá Yesu nee aayír'ín

¹⁹ Aayoorós nee hhaeewós awa daaqaay tari amoorós káy, dirós i tseewuwto kana harslaaqaát asma muu kuwa úr.

²⁰ Yesu kuri báy nee muu, «Aayoorók nee hhaeewók awa daaqaay ta tsee/aá wa sihhimiit, kuúng tun slaa'.»

²¹ Giri báy, «Aayor'eé' nee hhaee'eé' an kudá' axweesantá Mungú axamiisá', nee ngi tlehhiitá' adoodá' i kat.»

Yesu tlawi ngiwa xasltís

²² Looarka wake Yesu nee eeharuuseerós tari tsa/án gawaá miringamo. Eeharuuse gari báy, «Gusé', a gayuuqá' i waarahhaán.» Tari tláy.

²³ Tawa hi'iiti Yesu iri guú'. Bambaao gay baraá tláwtí eér, miringamo naxés i hatsmuú slaa' ma'aywo. Naxés ta baraá tsaxwa.

²⁴ Tari Yésú tleesár áy ta kaahi, «Aáko, Aáko, aga qwaaraán.» Iri tláy, fur'a gari iigahhaát, nee ma'aydá' tsifaqamiitá'. Fur'a nee ma'aywo nay xasliitiyé', umuú gaaro iri xaslít.

²⁵ Giri báy, «Haratlintaaorhúng aa keér?» Tari da'ayuút, tari waa/oó/, tari kilooín axweés tawa kaahi, «Heewí a heemá, kwí fur'a nee ma'aywo gi hara'ayiyiím, inooín ngu iialooeemisiyá'?»

Yesu heé neetlaame aa eér nguwa hungu/uús

²⁶ Tari ti'iít yaamaá kaahaar, yaamaá múk Gerasi, kudá' naa Galiláyár qone'.

²⁷ Yesu iwa aweér, nee heeko wák oo yaamuudá' tina doogiyé' oo neetlaame aa eér. Deelór yaariire tlaba' gi tsitaatitiiká, tam i doó hootiiká. Dír i hooti a baraá /aantu.

²⁸ Heedaádá' Yesu nguwa ár iri tseé', iri dír geeraawós i tumbarara'aát, afór ur ganara tseé', iri oó', «Aníng nee kuúng a milá, Yésu, Garmoó Munguú Gáwtí dirií'? Un harhheehhe'eés, mi slahh'eemisaar.»

²⁹ Adoodá' gana oó', asma Yesu neetlaameedá' gaa iigahhaát iwa qutl. Asma daqtá yaariire gun aaeér, tam kun tsegaagiit ar qutúr daba' nee ya'aawo, nee kun xumxaaxún. Muruudá' kur tsegaagiti gun tlaqaqaat, neetlaame gun gusaasiín baraá darma.

³⁰ Yesu guri báy, «Umuuwók a heemá?» Iri oó', «Umuueé' a Daqa.» Asma neetlaamér yaariir guna eér.

³¹ Neetlaame Yesu guri harhheehhe'és mingiwa kwaáhh baraá bohóngw qwanaay.

³² Didaádae daqtá ur ar baynu i deer, ar ta deaaen gawaá tloomár wa ale. Neetlaame Yesu guri firiín baynuudá' ngiwa eer. Iri ya/án.

³³ Neetlaame heedaádá' guri geexeér, baynuudá' giri eér. Daqtá baynu iri /ét ar ti'iingw, iri /e/etiín baraá tlawi, baynuudá' niri qatliyé' baraá ma'aay.

³⁴ Mukduú baynaá de'eém adoodá' aa tleehharut kawa ár, tari diya/aát, kangwdá' kuri alki/iít baraá gixsa nee baraá ayko.

³⁵ Aluuwo muu iri tláy as kangwdá' aa tleehharuut kuwa artá ay. Tawa hardáh dír Yesu, heedaáduú neetlaame kawa hingeés kuri didií áy, i dír geeraá Yésú wa iwiiwiit, i tlabaawós kón nee fuquraangose. Tari da'ayuút.

³⁶ Nee mukdaádá' kaangwí gwa ar, adór heedaáduú neetlaame aa eér kura hungu/uús kari alki/iít.

³⁷ Muu sleémeero kuduú yaamaá Gerásír daáhh, Yesu kuna firín iwa quutli, asma naa ló'wa da'ayuutiyé'. Yesu iri dáh baraá miringamo, iri tláy.

³⁸ Heedaádá' neetlaame kawa duxún Yesu guna firín as nee inós tiwa kona'. Ala Yesu guna ki/ís, guri báy,

³⁹ «Kií/ amór doohúng, tidá' ur Mungú naa kuúngií tleéhh alki/iiteek.» Iri tláy, muruudá' uren Yesu aa dirósí tleéhh guri alki/iít baraá gixsa sleémeero.

Dasír Yairo nee /ameenidá' pasltá inqwaarír Yesu gaa kwatit

⁴⁰ Qoomár Yesu niwa kií/, muu guri ilaaóh ar qwala/, asma sleémeero kun daamaarán.

⁴¹ Heeko wák ta bay Yairo nina hardáh. Inós a heé úr oo doó saaliingw. Ina tumbarara'aát dír ya'aá Yesu, nguwa harhheehhe'eemisi iwa amór do'ós kay,

⁴² asma dasiirós tooka wák aayir'ine, ar kureeriiwós mibaá nee tsár, i slahhá', i afkú bohoóngwí dirí'. Yesu iwa amoodií tláy, muu guna ló'wa tliíq.

⁴³ Nee /ameenirka i deer ar tiqaaqiim kureeri mibaá nee tsár ar tiqtír ubíngw tseerdu. Daqaari'iimarós sleémeero gana qwaslaarér i fák, ala oo gaa hungu/uus i kaahh.

⁴⁴ Ina alaá Yésúr ót, guri pasltá inqwaari kwatít, nee hamtidár kilae tseerduuwós niri qawiyé'.

⁴⁵ Yesu iri oó', «Heé án iga kwatiit a heemá?» Umuúqo heewo iri oó', «A aningeeká.» Petro iri oó', «Aáko, múk yaariír kwí kuúng una harweér nee ugwa tliíq.»

⁴⁶ Yesu iri oó', «Hee iga kwatiít, asma aga tsaáhh adór /uuruueé' oo hungu/uumis ir gadiyuús dír heekó wa ale.»

⁴⁷ /Ameenidá' ngiwa tsáhh adór lu/uto tir asleeraaká, ina hardát ar daaraxaay, iri tumbarara'át dír geeraá Yesu. Gár ngusa kwatít gari ó' dír geeraá muu sleémeero wa ale, nee adoodá' ira hara hungú/ hamtidár kilae.

⁴⁸ Gari báy, «Dási, haratlintaaoorók iga hungu/ús. Tláw ar wayda.»

⁴⁹ Yesu iwa dír axweesantadí kahhi, hee nina hardáh oo amór doó heedá' úr oo doó saalíngw daáhh, i kaahi, «Dasiirók aa gwá'. Intsaahhatusmo mu tawó daawiitamisaar.»

⁵⁰ Ala Yesu adoorí ngiwa axaás, guri báy, «Ma da'ayumitaar, án kilooeé' na haratlintiáng, inós i hungú/.»

⁵¹ Iwa dír doó i hardáh, inós nee Petro nee Yohane nee Yakobo nee baabuú na/aydá' nee aayo kilooín tana dáh baraá do', heé hatlá' gwa dahaasiiká.

⁵² Muu sleémeero tawa na/aydá' satsuunqumiisi, giri báy, «Ma /aa/amiimara', aa gwaiká, ina gú'.»

⁵³ Kuri ló'wa wa qasén, asma inooín ka xuu' adór ira gwá'.

⁵⁴ Inós gari dawa óh, iri tseé' iri oó', «Dási, tláw.»

⁵⁵ Qeeruuwós gari i kií/, hamtidár kilae niri sihhít. Yesu giri báy, «Muruú /ayma ti hanise'.»

⁵⁶ Xwayliteérós gari ló'wa waa/ó/. Ala inós gana báy, «Kaangwí ló' mu heé bawaara'.»