Luka 7 - Biblía Axweesantá Hhohho' ar Mungú 2004

Yesu lawaalmoó geeraharusmoó askaári nguwa hungu/uús

¹ Alaá Yesu axweesantós sleémeero dír múkwí ooaro ngiwa hhe'eés, iri tláy ay Kapernaumu.

² Lawaalmoó geeraharusmooko askaári i tiiq, i afkú bohoóngwí dirii'. Askaarmoodá' lawaalmoowós kudá' gu ló'wa slaa'.

³ Inós kángw Yesu nguwa axaás, bariisér múk Yahudi gari amoorós i ya/aáw, as Yesu kuwa firin lawaalmoowós nguwa hungu/uusár ay.

⁴ Inooín tawa dír Yésú ii hardáh, kuri ló'wa harhheehhe'eés tari oó', «I hariín heewí adór i kaahi kawa tlehh,

⁵ asma xooroorén ga ló'wa slaa'. Nee inós a kudá' atén taa doó saalíngwí tleehh.»

⁶ Yesu nee inooín tiri koné'. Iwa dír bihhaá dó' i tseewúy, geeraharusmooduú askaári mulqeerós gari amoorós i ya/aáw, kuri báy, «Aáko, ma tawó daawitaar, asma aníng a hariimaaká kuúng tawa baraá dooeé' dat.

⁷ Gawaá adoorihe sleeme ana tsaáhh adór nir hariimaaká niwa amoorók kaw. Ala /aymu na ooang, lawaalmooeé' i hunguu/.

⁸ Asma aníng sleeme múk i baliít i deer, slám askaárír án ni baliit i deer. Kwí bura báw, ‹Tláw!› aqo in tláy, nee kwí bura báw, ‹Qwaláng!› aqo nin hardah. Nee lawaalmooeé' bura báw, ‹Adoorí tleehheek,› aqo gan tleehh.»

⁹ Yesu tí ngiwa axaás, heedaádá' guri waa/oó/, iri warqáy amór boo/aydá' ngwa eehar, iri oó', «Án a kah, tam baraá múk Israeliwo haratlintaaór ur ar adór tí aga baloó ariiká.»

¹⁰ Nee mukdá' taa ya/aáw iwa kií/ amór do', tawa hardáh naxés lawaalmoodá' aa hunguú/.

Yesu garmoó kwaalo'ór Naini nguwa waaslee/atís

¹¹ Aluudae Yesu iri tláy dír gixsarka ta bay Naini. Nee eeharuuseerós tina koné', nee boo/oó úr oo muu.

¹² Dír dahmuú gixsa kuwa áy, tuuarka kana didií áy, kingi tsee/áy loohiis. Inós a na/oó garma oo wák dír aayoorose, slám aayoorós a kwaalo'o. Múk yaariír oo baraá gixsa nee inós ti koná'.

¹³ Qoomár Aako ngiwa ár, guruuwós iri tláy, gari báy, «Ma /aa/amiimaar.»

¹⁴ Yesu iri tseewúy, xaaiidá' kingir gagarin giri kwatiít, mukdaádá' ga loohiís tari sihhiít. Iri oó', «Gárma, án a kah, kuúng tlawáng.»

¹⁵ Heedaáduú tuua iri tláy, iri iwiít, iri ilawaáts. Guri aayoorós i haniís.

¹⁶ Muu sleémeero iri da'ayuút, Mungú kuri xirfayeemiís ta kaahi, «Aarusmoó úr naa ayaarén wa ti'iít,» nee «Mungú naa mukós ba/amisár áy.»

¹⁷ Tí Yesu aa tleéhh iri tsiyaayaaxát yaamaá Yudea sleémeerowo, nee baraá yaamu sleémeero awa inslaawaydá'.

Múk Yohane aa ya/aáw

¹⁸ Eeharuusér Yohane kaangwí sleémeero guri amór Yohane húp. Eeharuuseerós ar tsár gari ateét,

¹⁹ gari ya/aáw amór Yesu, kuwa yaahasi gídaabá, «Kuúng an kudá' hardáha, laqaá heé hatlá' un daamaán?»

²⁰ Inooín tawa dirós i hardáh tari oó', «Yohánedá' Baatimaamiís taa amoorók i ya/aáw i kaahi, ‹Kuúng an kudá' hardáha, laqaá heé hatlá' un daamaán?› »

²¹ Nee hamtidár kilae múk yaariír oo tiqtuuse nee oo slahhahhaá' guna hungu/uús, nee oo neetlaame aa eér, nee taampaá yaariir niri qaytsitiyé'.

²² Yesu mukdá' tinda ya/aáw guri báy, «Tlawsé', tí taa aandé' nee taa axasé' Yohane ti beere', gídaabá taampu i xumiisiyá', taqooraay i hi'iimiit, múk tiqtír tsatmit ku hheehhe'eemiis, múk iiawasle i axamiis, tu'u ki waaslee/atimis, nee liitlakuuse ka Ya/abtór hhó' i alki/iit.

²³ Heé amohhoó' a kudá' insarehhmoó koomaaká daanduueene.»

²⁴ Mukdá' Yohane aa ya/aáw iwa tláy, Yesu kángw Yohane guri alki/iít dír boo/ayduú muu, iri oó', «Tawa baraá darmuú keeré', maga qaytsuú eeré'? Gár taa qaytsuú eeré' a gitsoodá' fur'a i dingimísa?

²⁵ Bar gitsorooká, ala a milá? A heé inqwaruú hhohhó' gu tsitaatíta? Ala baré múk inqwaruú hhohhó' gu tsitaatiít, nee kudá' diihhooár /aáy i baraá maraá waawitá.

²⁶ Ala maga qaytsuú eeré'? Ana aarusmoó artá eerí'i? A ló', án a kah, slám a kudá' úr ta aarusmowo.

²⁷ Kwí an kudá' tí kasa gooín, ‹Ga/aaweek, aníng ya/abusmooeé' u geeraawók wa ya/aáw, oo loohirók ga geeraawók wa amohhe'eés.›

²⁸ Án a kah, baraá múk /ameena naa laqwali, heé úr oo Yohane gu baá/ i kaahh. Ala kudá' niiná baraá waawuti'iimár Munguhe kun úr ta inose.»

²⁹ Muu sleémeero nee ohomuusér koódiro adoorí kawa axaás, looeemaá Mungú kiri ya/án, asma kiwa baatimiís ar baatiísmoó Yohane.

³⁰ Ala múk Farisayo nee intsaahhatuusér hara'ayár Mose sla'aaridár Mungú daanduuine kana sií', asma inooín baatiísmoó Yohane kwa ya/aniká.

³¹ Aako iri oó', «Mukuú de'emaaká' slaqsoó ngur qoomees a umós? Nee gár ngir slaqamis a milá?

³² Nee a slaqamís nee na/aá naa iwiitiye' dír boo/aay, ti didá' wa ateetiná' ta kaahi, ‹Filiímbi ngiwa ufaahhaán, aga neti'iiká, tawa tsuunqumisaán, aga /aa/i'iiká.›

³³ Asma Yohánedá' Baatimaamiís niwa hardáh, i mikaátér /ayiiká, tam difaái ga wahahanká, kuungá' a kata', ‹Neetlaame gwaa eér.›

³⁴ Garmoó Hee niwa hardáh, i /ayín nee i wahán, kuungá' a kata', ‹Ga/aawaagáy, hheehhusmoowí nee xuufutusmo, mulqumoó ohomuusér koódi nee tlakuuse.›

³⁵ Ala sagalooár Mungú adór tar ló' kingina laqán nee mukdá' sleémeero gaa ya/an.»

Yesu iwa dír doó Simoniduú Farisayo

³⁶ Heeko wák oo Farisayo Yesu guna dah'ís, iwa dír do'ós wa /ayin. Iri dáh baraá doó heedaáduú Farisayo, iri iwiít dír muruú /ayma.

³⁷ /Ameenirka wák ar baraá gixsadá' ar tlakuso'o, ngiwa axás adór ir dír /aymárí dirii'i baraá doó heedaáduú Farisayo, chupiito'ór mooyaangw ar taa tleéhh ar tleeír ta bay Alabasta ngina húp,

³⁸ iri alaá Yésú ii sihhít dír ya'aawós, i /aa/amiín. I hhirhheeraá paahhamís gawaá ya'aá Yesu, nee gi se'éngw sagós ar fitsít. I ya'aá Yésú slikiín ar mooyaangw, gi hara ma'amís.

³⁹ Heedaáduú Farisayo oo Yesu gwaa dír do'ós i dah'ís, adoodá' ngiwa ár, ina baraá muunaáwós i oó', «Heewí geera bar aarusmo, /ameenirí gu kwatimiit gaa tsaáhh adór tar heemá nee a /ameenír adoomá, asma a tlakuso'o.»

⁴⁰ Yesu iri ilawaáts, iri oó', «Símon, gár ni kuúng i ooár wa slaa' i deer.» Iri oó', «Intsaahhatusámo, ooang.»

⁴¹ Guri báy, «Heeko wák peésarós kana kiriík nee múk tsár. Oo wák shiliíngi tsiire kooán, kuqá' shiliíngi mibeeri kooán.

⁴² Inooín sleémeero bu'utuwo kuwa harslaaqaát, tsaraawo giri gurtláy. Xáy baraá mukwí tsare heé inós gu ak slaá' a heemá?»

⁴³ Simon iri oó', «Án ngi slaá' a kudá' taa peésár úr wa gurtláy.» Guri báy, «Adoosíng taa ó' i ganá'.»

⁴⁴ Iri warqáy amór /ameenidá', Simoni gway báy, «/Ameenirí a ga/eéra? Án nina baraá do'ók i dáh, kuúng ma'aá ya'aaeé' ngir slawawa/aas ngaa haniská, ala /ameenirí ya'aaeé' ngaa hhirhheeriwós i taxmaamís, giri fíts ar se'éngw sagós.

⁴⁵ Án kuúng iga ma'asiká, ala /ameenirí iimír án niwa dáh, ya'aaeé' gina ló'wa ma'amaamís.

⁴⁶ Kuúng sagw'eé' ugwa di/tár slikiká, ala /ameenirí ya'aaeé' gina mooyángw ar slík.

⁴⁷ Gawaá adoorihe án a kah, sla'aarirós tidá' ur gan laqaqaán as tlakweemaawós awa yaariir kiwa gurtláy. Ala heé taa tlakweemaá niiná wa gurtláy, sla'aarirós ka niina.»

⁴⁸ /Ameenidá' gari báy, «Tlakweemaawók kaa gurtláy.»

⁴⁹ Mukdá' nee inós taa al iwiit dír muruú /ayma, naxés ta baraá muner'ín i axwees ta kaahi, «Inósuuwí a heemá tam iwa tlakweemaá gurtlatlay?»

⁵⁰ Ala Yesu /ameenidá' gari báy, «Haratlintaaoorók iga ba/amís. Tláw ar wayda.»